Coronavirus Zei Ruangah Dah Iralrin A Herh? A Ruang Fiang Tein Na Hngal Cang Maw

Tuluk ram chung i Coronavirus ruang a zawmi hna lakah acheu dengmang cu an damh khawh ṭhan hna tiah theih a si. Korea zongah an damh ṭhanmi an um leen. Korea cozah nihcun, anmah Korea miphun si hna seh, an ram chung i phung ninglo khuasa an si ah siseh, an ram chung khuasa mi paohpaoh Coronavirus nih a tlunh sual ahcun, a lak bakin nan thlop colh hna lai tiah nawl an chuah. An damh ṭhan khawh komi tlangrai caah zeicahdah iralrin a herh i Asia lei minung pawl nih mask an ihuh dih hnga ti ruah awk a um.

Japan ram nihcun khuati aa thlen hlan tiang hngakchia High School sianginn a kharter dih hna. Japan ram tuah dingmi Summer Olympics zong “ni 140 lawng” aa duh cang tiah Tokyo khualipi mipi luhchuahnak lamkam an taarmi billboard nganpi ah cun aa ṭial. Cu caṭialnak tangah cun, “A Ni Thawn Uh” tiah nganpi in mi pakhatkhat nih an ṭial hnawh chihmi hmuh khawh a si. Zei ruangah dah East Asia rampi pathum “Tuluk, Japan le Korea” nih Coronavirus cu mah tluk cun an doh i an ṭih hnga?

Coronavirus nih a tlunh cangmi minung paohpaoh an cuap damh khawh a si ti lo ruangah a si. Minung nunnak an khamh khawh hmanh ah, an cuap tu cu a rawk beh. A rawk cangmi cuap an tharter kho ti lo. Zawtnak rungrul nih a tlunh hna le cangka in an zaw colh lo. An tak a hung linsa, an khuh cang hnu lawngah Coronavirus nih a ka tlunh sual hnga maw tiah lunghrinhnak ngeih a hung si. Cuti i an lung a hung hrin, an hun ichek tikah cun, an cuap a rak rawk cang.

Zawtnak aa hun ilangh ahkhin cun, an cuap cu a rak rawk cang tiah an ti. Mask hruk san tlai maw? Mask hruk san a tlai lo ti cu, sullam ngeilo bia a si. Hnarkua le kaa in ichawnh bik simi Coronavirus in ikham khawhnak dingah mask hruk san a tlai lo ti cu, siibawi hrim nihcun a chim in an chim awk a si lo. Zawtnak nih a kan tlunh ti aa hngal lomi pa/nu nih mask ihruk loin mibu sinah aa chawhvah huar ko ahcun, zawtnak rungrul zeizat ko dah, midang cungah a thlah lai?

Ṭih tuk awk cu si leem lo nain, iralrin a herh. Iralrin lo ahcun, a herhlo cuap rawh zawtnak vaa imih fawite. Kut thiang tein iṭawl lengmang ding, kut iṭawl hnu ah, rungrul thahnak kut-hnawh sii (sanitizer) in iṭawl chap dingin, biatak tein icawnpiak a si.

Credit: Salai C Alexander

 265 total views,  2 views today

This function has been disabled for Chin 11 News.