Coronavirus Ningcanglo In A Tawlrel Caah Trump Hi Tuanvo Ngei Bantuk Sualphawt Khawh A Kun Lai Maw?

(America journalist le political writer minthang Neil Baron nih a tialmi hi rel cio dingin kan in siaherh hna, Trump hmai milhtu Fox News zong tazacuai lio pi asi)

Dr. Fauci nih a chim bangin, coronavirus nih a tu bantuk taitai in US hi a chiatchuah awk a si lo. Vawleicung ah a rumbik le econmy thawngbik ai ngeih i, minung 330 million lenglo an umnak US hi vawleicung ah virus nih minung a thahbiknak ram a si. A ram chung milu nakin a let 4 hrawngin a ngandeuh mi China hmanh ah hi taitai in minung an thi lo.

Vawleicung minung miluzat i 4.2 percent hi US miluzat a si. Asinain, vawlei pumpi i Virus nih a tlunhmi miluzat in kan zoh tikah cun, 30 percent tiang a phan i, virus in a thimi milizat in tah ah cun 19 percent tiang a phan. A dang ram 12 ah cun virus karhsonak hi a zor ngai ko cang. US nih rian a phih lio ah China cu a rian a on cuahmah cang.

Federal cozah pi hi thadeuh in timhlamhnak rak ngei sehlaw cu US ah hin a thimi an tlawmdeuh lai i, an economy zong hi a him deuh ko hnga. Amah nakin a sifak deuh mi le a hmedeuh mi ram pawl bantuk tal in rak i tinlam sehlaw cu….

Bianabia ah, South Korea cawlcanghnak nih US a ning a zahter. January ah khan S. Korea ah minung 4 an zaw, asinain, a mipi hna cu heh tiah khulrangtein test a tuah colh hna. February canceu in khan, minung 170 test a tuah hna. US belte nih cun minung case 1,090 lakah minung pakhat te lawng test a tuah khawh ceu khi a si. February dih lei sang khan cun, S Korea nih cun mawtaw ai monghmi tiangin khan nifatin tein screen test a tuah hna. March 1 in cun S. Korea ah mizaw thar an hmu sitsai ti hna lo. Cu lio hrawngah cun, ramdang pawl nih minung a thong a sang in test an tuah khawh hna lio ah, US nih cun nikhat ah minung za hualham lawng test a tuah khawh.

Africa ram 54 telhchih in, Continents pathum sinah virus dohnak hriamnaam le siiai China nih heh tiah bomhnak a kuat hna lio ah, US belte nih cu a ram chung hman ding hmanh ai ngei ti lo i ramdang sinah bomhnak lawng a hal. “Kan duhherhmi thilri a chuahtu company tampi kan i ngeih ko hna. Mask zong million in kan chuah cuahmah lio pi a si. Thawdawpnak seh zong kan ngei. Oxygen dawtpnak seh zong kan i ngeih” tiin Trump nih mipi sinah uangthlar ngaiin a chim. A ngaingai ti ah cun, amah pumpak bakin S. Korea president Moon cu phone in a hei chonh i, bomhnak a hal. Cu phone a chonhmi belte cu White House nih an cinkenmi cauk chungah an khumh lem lo.

American mipi hman dingah US nih Embassy an chiahnak ram poah cu bomhnak hal cio dingin a embassador pawl a fial hna. N95 Masks 200,000 cu Thai airport US nih a rak ramh riangmang i Germany in US lei ah a kuat diam. Cu ruangah cun Germany nih US cu a thangchiat ngaingai. US hi phaisa a ngeibik a si ko nain, bomhnak lawng a kawl, tiin France nih a thangchiat ngai ve.

Trump nih ngandamnak kong i an i kilvennak hauruangpi hi hnahnawh rak pe hlah sehlaw cu, a tu bantuk taitai in cun US ah mithi an um theng lai lo i, an economy zong hi a tumtuk hnga lo. Pulrai a tlung lai, tiin Obama officials pawl nih Trump officials pawl cu ralrin an pek ko nain, zeiah an relpiak duh hna lo. Obama official nih hin a tu a tuan lio mi official pawl nakin thil an rak thei deuh.

Chanthar chungah tih a nungbikmi pulrai a tlung kho mi a si, cu bantuk pulrai cu US nih dohkhawhnak thazaang kan i ngeih lo. Ngandamnak kongah runvennak biatak tein kan tuat lo ah cun minung kan nunnak nih le kan economy nih a kan hlanhtuk te lai, tiin ralrin cu a tu le tu an pek ko nain Trump nih zeiah a relpiak hna lo.

A chapbei ah, Department of Health and Human Service le Centers for Disease Control (CDC) ca i bomhnak phaisa budget an halmi zong tampi phih hna, cun lakhruak in a cangmi thil tawlrelnak caah, tiin an halmi $30 million zong cu 2019 in khan a phih top hna.

Pulrai dohnak rian a hruaitubik Homeland Security Advisor Tome Bossert zong cu a rian in a phuah beh. Trump nih ai hmanmi a National Security Council advisor nih le virus kan dohnak rian hi a thenhmal dih i, a remhsiam than ti fawn lo. WHO nih vawlei cung ram 120 ah test tuahnak tilri an kuat hna lio ah kan CDC nih pakhat te hmanh an cah ve hna lo.

A phichuak cu tuk a sum ko. Tuanhngan tein test tuah i, mizaw le midam thenhmal zau a hau, cun quarantine chiah zok an hau. Cu zong cu thilri in siseh, timhlamhnak in siseh an tuah kho colh fawn lo. Test tuahnak thilri an chambau tuk i, CDC nih an sermi testnak thilri tamdeuh cu hman tlak an si fawn lo. CDC nih an tuahmi test result 472 cu an website ah an tar ko, asinain ramdang nih an hmuhmi result zat he ai thlau tuk tikah an ning a zak than i, an phiat dih than.

Thawdawtnak seh, siiai, le a dangdang uniform hruk ding pawl zong ai za ti lo. I kilvennak thilthuam a chambautuk fawn. Sibawi pawl nih an hmancia mask pawl cu an suuk than i an hman than hna. Thilri le siiai kongah state pakhat le pakhat an i cuh, Federal Emergency Management Agency zong ai cuh ve. Cu tikah thilman cu an kaiter chinchin. A ruang cu, cozah lei nih zeitin dah kan phawtzamh hna ning a si lai, timi kongah timhlamhnak an ngeih lo caah a si.

2009 i H1N1 lio ah cozah pi nih state kip ah hmaihuh, thawdawpnak, thuam le kuthruk an kuat khawh dih hna. Trump cozah chan ah cun, cozah pi hi thil kuatu tilawng a si lo, cucaah state pawl, nanmah tein thazaang chuah cio u, tiin Trump nih a ti cang hna. Cu hrimhrim nih cun a state pawl khat le khat dawtter rian a ngeihmi zeiah a rel lo a langhter.

Kum 70 chung ti awk hi, vawleicung pulrai dohnak ah US hi biapibik a si zungzal – Ebola, tuberculosis, malaria, yellow, AIDS, Zika, hei ti bantuk. Cun Ram 67 kawpin Global Health Security Agenda zong a thoktu a si. Trump belte nih cun cu vialte hmunhma i hruaitu dirhmun a ngeihmi kha a kaltak dih.

Ebola zawtnak a hrampi tiang in coih dih dingin vawleicung hruaitu pawl Obama nih an lung a rak lak khawhmi kha Trump nih a cawn awk a thei lo. Zawtnak do dingin minung ngandamnak lei official minung 3,000 telhchih in minung 10,000 bak Obama nih West Africa ah cun a thlah hna. Cu lio ah cun a zualhmatcem a si dingin an zumhmi dirhmun in 80% an thumh khawh.

US ram chung zongah Ebola dohnak rian Obama nih a tuahpi hna. Sizung, thlonak hmunhma, ngandamnak department le mizaw thloptu pawl vialte zong ready tein um dingin a chiah dih hna. US ah minung 11 an zaw, minung 2 lawng an thi.

Coronavirus tu cu Trump nih ningcanglo tuk in a tawlrel tikah, faaktuk le caktuk in a karh i, a chachap lo ah a palh lo bantuk in a hmai ai milh lehlam rih. Obama, governors pawl, democrats e media pawl, cun WHO tiangin heh tiah an thang lehlam a chiat hna.

Ni tlawmpal chungah a thimi hi zero tiang ah khan thumh colh ko lai, ti hna in a ti salam. Amah tein a lo ding cu a si lo, asinain khamnak sii kan chuah khawh deng cang, tiah a chim. Fauci belte nih cun khamnak sii chuah dingah thla 18 tal kan rau lai, ti a si.

Washington nih biatak deuh tein kar rak hlang sehlaw cu, Mardi Gras hi kan kham khawh ko hnga, tiah New Orleans Mayor LaToya Cantrell nih a chim. A tu ah cun, US county vialte lakah Orleans Parish ah a thimi an tambik cang.

Fox News nih mipi sin i thawngpang diklo a phanmi hi mipi ngandamnak caah tihnung a si, tiah NU, UC Berkeley le CU i professors 100 nih an chim. Virus tawlrelnak kongah a hmanlo mi thawngpang na thanh, tiin Fox News cu taza an cuai lio pi a si.

Daitlang ngaiin asiloah i ruah lo pi in minung thah cu daithlan ruangah i ruah lo piin thah sualmi a si, tiin chim khawh a si. Mah le tuanvo lak lo belte cu sual a si. Cucaah, tutan Trump tuahsernak hi cubantuk sual cu a kuai kho maw? Minung 40,000 nih an tanhtakmi an chungkhar pawl kha hal phot ko ne hna….

Credit: Chelsea Bawi

 

 239 total views,  1 views today

This function has been disabled for Chin 11 News.