Coronavirus kong update: US Laimi ralring tein le Khualeng kal bak lo ding: Thiangi pa

Coronavirus kong update kan van tuah ţhan. China ram ah zawtnak a karhning rate a hung ţum deuh. A thimi zong an hung tlawm deuh. An cozah nih donghnak bik update an tuahning ah nizan cu 44 lawng an thi. Nain, Tuluk ramleeng lei ah virus a zualhma chin thluahmah ve.

Tuchun ni ah vuleipum huap in zawtnak cases an hmuhmi cu 84,146 a si i a thimi 2,876 an si. Hi chungah Tuluk ram ah cases 78,832 a um i 2,788 an thi. Tuluk ramleeng ram 59 le Diamond Princess tinbaw cungah cases 5,314 an hmuh cang. Cu chungah 88 an thi.

Tuluk ramleeng ah zawtnak a hluarbiknak cu South Korea a si i cases 2,337 an hmuh. Cu chungah 16 an thi cang. Nizan thok khan cun Tuluk ram nak in S. Korea ram ah zawtnak a karhning a cak deuh. A pahnihnak a hluarbik mi ram cu Italy a si i tuchun tiangah cases 888 an hmuh. Cu chungah 21 an thi cang. A pathumnak cu Iran a si i cases 388 an hmuh. Cu chungah 34 an thi. Nizan lawnglawng ah 8 an thi. Tuluk ramleeng ah Iran hi mithi an tambiknak a si.

US ah cun cases 60 lawng confirm a si ko rih. Nain, kan cozah cu an thinphang pah in a lang. Ruahphak loin Italy le S Korea bang a puak thut kho an ti i a hlankan ralrinak an tuah cuahmah. Mipi zong thlalau nawn in kan um pah cang si lai, hmun cheukhat ah cun ei le din, hmaikhuh (mask) ti bantuk an i cawk ong cuahmah hna. Nizan ah kan HHS secretary Alex Azar nih hmaikhuh cu 30 million stockpile ah kan chiah cang tiah a chim. Nain, kan herh te khawh tiah kan ruahmi estimate cu 300 million a si e a ti. 

Governor Larry Hogan le heath lei ţuanvo ngeitu nih thawng an thanhning ah Maryland ah minung pathum lunghrinnak nganpi he quarantine an tuah lio hna a si. An symtom umtuning an zoh tikah CDC standard he aa kaih ti a si. Sample an laak hna i CDC nih an buaipi cuahmah. Nihnih-thum chungah result a fiang lai tiah an ti. Ralring tein um cio kan hau ko hna. US ramleeng ah khuatlawn bak lo hi i vennak biapi ngai pakhat a si.

Catialtu: Thiangi pa

 308 total views,  1 views today

This function has been disabled for Chin 11 News.