Coronavirus Kong Theihtlei By Victor Khen Sang

A tulio kan vuleipi mithmuh lo ralhrang bang akan namtu Novel Coronavirus ( Covid -19) kong hi theih phu hrimhrim asi. Aphunphun purhdah nak aum cio nain ram uktu cozah hna sin in theihnak le hrilhfiahnak ahcun rili chung ummi ngasa kan eimi (Seafood) rawl chung in achuak mi asi ko rua ti hi zapi ifunnak i zumh cemmi cu asi. Hi kong achuahnak zumhning le purhdahnak 3 in an țialmi mi ka vun langhter tuah hna lai.

(1) Hi virus kong achuaknak ahram in rak lunghrinhnak arak ithoknak cu 1996 ah Canada ah arak rami Chinese Virologist Scientist Dr. Xiangguo Qiu le a pasal Keding Cheng hi Winnipeg Virologist Laboratory ah rianțuan mi an si. Dr. Qiu cu 2014 lio i Africa ram ahnin dihtu Ebola zawtnak hrik kha ahmu hmasatu le adamhnak sii aser hmasatu ah atelmi minthang taktak asi. Amah hi China nih athlitein an hman mi mingiatu -Spy asi lai tiah an purhdah ngai ngai nain asi hrim lo tiah China le adangdang news nih an țial tawn. An lunghrinhnak aruang cu alengchuak lo ding thil Laboratory chung ah an hmuh mi pawl kha athlitein a pasal hecun China cozah sin ah an kuat tawn hna.

Cucu Canada Federal Police (RCMP) nih March 2019 lio ah Air Canada vanlawng cung ah an rak tlaih. Cunak cun an nupa cawlcangh dan kha an ngiat cang hna i țihnung dirhmun an si cang an ti caah July 2019 ah an tlaih hna i China ram ah an kuat țhan hna. Hi hna nuva hi China an va phak tikah Wuhan National Biosafety Laboratory ah rian an va țuan i cu ka an țuannak zawn cun Virus an thongthamnak ah an i thlah phoih sual caah kham manh loin an umnak khua cun ai thok colh i vulei pi ah akarh dihnak asi tiah purhdah ngai asi. Hlanlio Israel Mossad Spy arak țuanmi Dany Shoham nihcun mah Biosafety Lab an tuahnak hi China cozah nih athlitein Biology Weapon an sernak hmun asi tiah hi zawtnak hrik achuah cang ka in ahohmanh nih bia an chim hlan ah aphuan colh. Asinain cu abia kong ahcun China an thinhun tuk caah Israel zong nih Sholam cu cozah rian ațuan ti lomi asi caah amah ruahnak achimmi asi ti in abia an tan piak colh ve.

(2) Mah Coronavirus hi March 11, 2019 lio i US Congress ah Robert Redfield (Director Of Centre For Disease Control and Prevention) nih bia chim lio ah adamhnak sii kan hmuh rih lomi zawtnak asi tiah Coronavirus min atelh cang caah US ralkap nih an sermi in ai thokmi asi tiah China nih an i tlaih colh ve. October 2019 lio i Wuhan ah tuahmi Military World Games ah US ralkap aza in an rak i tel ve i mah lio ah athlitein an vun phurh mi zawtnak hrik asi tiah Chinese Foreign Ministry in biachimnak nawl ngeitu Mr. Zhao Lijian nih Redfield hmanthlak ken bak in apuan ve. Cucaah US nih nan ser i China ram ah nan vun kan thlah hnawh mi asi cu el awk aum lo ti in Zhao chim hnu cun Chinese ambassadors kip nih abia kha an peh piak ve. China nih an zumh dan ahcun US nih an kan thlah hnawh i mah hi zawtnak hrik in China sipuazi cawl kho lo ding in le China kan lam pit ding in an kan tuah hram hrimhrim mi asi ko tiah an zumh. US nihcun chim awk theih lo tuk ah mikip nan kan puh cang an ti ve hna.

(3) Mah coronavirus timi cu minung sermi Laboratory in achuak mi asi hrimhrim lo, caan saupi arak i uam cang mi zawtnak hrik asi tiah Immunologist Scientist pawl nihcun an zumh. 2003 lio i arak chuakmi (SARS – Severe Acute Respiratory Syndrome) ah khan rak hmuh cang mi asi nain anem deuh in rak ruah mi asi. Cun avoihnihnak cu 2012 ah Saudi Arabia ram ah an rak hmuh mi (MERS – Middle East Respiratory Syndrome) he khan an virus umtuning hi akhat ko ti asi. Mah Coronavirus le SARS, MERS virus pawl hi one family an si ti asi.

December 31,2019 ah China nih Wuhan in achuakmi virus kong hi an vun chim nain anem deuh mi tlangrai sawh sawh ah ruah piak an si i SARS-Cov2 tiah amin an bunh piak hna. Asinain chikhat ah vulei pumpi avun kan huap dih colh caah asawh sawh asi ti lo ti in atulio vulei pi kan buainak hi asi. Achuah cang ka in China nih aruah awk an ngalh lo caah vulei cung ram țhangcho deuh ah ahrik (virus) kawl ding in bomhnak avun hal cio hna. Covid -2 tiah tlangrai zawtnak hrik anem mi ah an ruah mi cu Covid -19 ti in atu ahcun vulei pi akhuh ko cang. WHO nih March 11 in “Pandemic” ati hnucun Vulei pi nih innkang darkhing an tuk tluk asi cang.

Minung kan pum hi ti (molecular) atambik asi i kan titsa le vun cung ummi mit hmuh khawh lo ti pawl kha mah Virus nih an chilh khawh tikah kan tongh mi kip ah virus ataang i kan pum chung tiang aluh colhnak asi ti asi. Abik in virus hi atlawmbik ni 9 chung cu athlaknak hmun paoh ah anun khawh caah ralrin aherh khunnak asi ti asi. Ahrik thahnak an hmuh hlan chung cu ahrik um lai ti zumhnak hmun paoh kha hrial aherh caah minung le minung hmanh ton lo khawh chung iton lo le hmun kip an phih i ralrin nak lawngte in kan khah lio asinak hi asi.

Zei asi paoh ah tukforhnak le Satan rianțuannak vialte hna cu Khrih zumtu kan caah cun țihnung mi pakhat hmanh aum lo. Kan Baibal thiang chung ah kan hmuh cu; 1Korin 10:13 “Nan in khawh lo tiang in tukforhnak kha nan cung ah ka tlun ter lai lo” akan ti bantuk in kan umnak cio in thlacam ko hna usih. Pumpak, chungkhar, Khrifa buu, kan ram le miphun ca in kan vuleipi angandamnak ca hrim ah thlacam cio ko hna usih.

Cațialtu

Victor Khen Sang

March 18, 2029

 512 total views,  1 views today

This function has been disabled for Chin 11 News.