Coronavirus Dohnak Caah An Ram Mi Minung 25000 Hrawng Hmunkhat Ah Thlacam Nak An Ngei

Tulio zawtnak tihnung bik mi cu hngakchia bikin upa bik tiang nih theih le hngalh dih a si ko cang I thinpang ngai in um lio cio a si ko hna. Khuazei ram talnih dam khawh nak sii an ser kho cang hnga maw tiah thawngpang hlat cio a si I ram tampi hna cu  an ram chung puai le zung, dawr vialte zong a khar dih cang mi an um hna.

Hi tluk in lungrethei le thinphang in kan um cio dih hna lio ah Bangladesh ram Lakshmipur state chung ah a um mi Raipur City  ah minung 25000 hrawng nih COVID-19 a tlau khawh nak hnga ding ah le hi zawtnak nih minung thihnak a phakter cuahmah mi chung in damnak kan hmuh khawh nak hnga tiin Central Eidgah thlacam nak an ngei hna tiah Dhaka Tribune nih a langhter.

Hi thlacam nak puai hi Raipur City chung ah a um mi aiderganj Syed Manjil nih a hruai mi hna a si I tuchun (3/18/20) zinglei nazi 7 in an thok I zanlei nazi 7 pm tiang pehtlai tein an tuah mi tlacam nak puai a si tiah theih a si.

Cu thlacam nak puai ah cun muslim pawl lawngte an si hna I an thlacam thawng le anmah bible an rel thawng nih Raipur City chung cu a khuh dih I zeidang thawng theih ding hi a um lo. Asianin hi thlacam nak an tuah ding mi hi Raipur City chung police nih cun kan theih pi mi hna an si lo tiah zong an chim ve. Cu ruang ah hi bantuk in khuapi chung dihlak nih chun nitlak thlacam nak an tuah mi kong he pehtlai in Raipur MP lei pehtlaih le thawngpang hlat an I zuam ko hna nain kan pehtlai kho rih hna lo tiah Dhaka Tribune nih an langhter.

Ref: Dhaka Tribune

 255 total views,  2 views today

This function has been disabled for Chin 11 News.