Coronavirus A Tlun Ruangah US Lei Mipem Hi Trump Nih Phihchung A Timh

Coronavirus nih kan ram ngandamnak le chawlehnak a hnursuantuk caah, kan ram lei mipem hi phihchung dingin nawl ka chuah lai, tiah Trump nih Monday ah khan a chim. Hmuhkhawhlo Raal kan doh lio pi a si caah le, a Liangnganmi kan American mipi hna an rian hi kilvenpiak an hauh cang caah, kan ram chung peemvaihnak (immigration) hi phihchung dingin nawl ka chuah chom lai, tiah a chim.

Zeituak in dah phihkharnak a tuah lai, zeican dah a rauhter lai, US ramri palnak hi teh zeitin dah a tawlrel kun lai, green card ai ngeih cangmi hna hi teh zeitindah an si ne lai? timi kong cu theihfian a si rih lo.

White House lei zong nih hi kongah chimchapmi an ngei lem ti lo. Cun DHS lei zong nih zeibia an chim duh rih lo. Coronavirus ruangah siseh, cun karso lo dingin kham an duh ruangah hin US lei peemvaih hi a tlawm deuh ngaingai. Refugee pawl thuttonak sersiampiak nak rian zong ai din cang, visa office pawl zong khar an si cang, citizen peknak rianpi zong cu an tuah lo in a um ko rih. Immigrant kong i tuanvo ngeitu pawl zong Trump biachimmi ah cipkhap an ti rih lo.

Hi hi policy kong a si lo. President nih thanh a duhmi thawngpang pakhat a si. Kapkhatlei lawng vun i hmaithlak a duh cang caah a si ko. Mipeem pawl nih ram chungah heh tiah thatnak an tuah len ve ko nain, anih caah cun mipeem pawl an sual kawl cu a fawibik a si ko, tiah National Immigration Forum i executive director Ai Noorani nih a chim. Coronavirus ruang i phihmi a cheukhat khua pawl cu on than ai timh caah le, 2016 i presidential campaign a tuah lio tein mipeem tlawmter a timh pengmi kha a tak in hun tuah a duh cang caah a tu bantukin in bia a chim hi a si.

US i virus kan kham khawh nak ding ah cun China le Europe ram lei ah khual tlawn bak lo dingin biachahnak a tuahmi zong a tu le tu a chim lengmang ko rih. Tutan coronavirus a tlun cu vanthat ah ai ruah i, asylem seekers pawl tiang zong in phih dih dingin a cozah pi cu riantuanter a timh cang.

Thitha in check lo mi le an singing dothlat lo mi pawl US i chaklei a rammi zawn in a hung luh cu Trump nih a theih tikah, cuka zawn paoh cu a ningpi in phih lawlaw ding tiangin a duhnak a langhter. A huaha lo i khualtlawn lo dingin nawl a chuahmi cu nihin ni tiang zulh a si. Mexico le Canada lei tiang zong in tlawn lo dingin nawl kan chuah chap lai, tiah Department of Homeland Security nih an chim.

Hngakchia thlu lo upa thlu lo in, US ramri ah tlaihkhih a tongmi ramdangmi mipeem paoh cu a ran khawh chungin US ram chungin thawl dih dingin a cozah nih nawl a chuah i, a tak zongin a zulh cuahmah.

Credit: Chelsea Bawi

 222 total views,  1 views today

This function has been disabled for Chin 11 News.