CNF Sinah Lunglawmhnak Le Theihternak Cakuat

CNF kan pale nih Pu Zing Cung minthut he Nawlnak statement nan chuahmi zoh tikah piangpuh cun nan chim lo nain mah te cio in ruahdamh awk țha pah in ka hmu ko. A dang kong cu bia a sauh lai caah chia ko ning law Ralkap țhawnternak ding kong he pehtlai lawng in chim ka duh. Kum a tlingmi paoh nih Chin miphun zalonnak cawlcanghnak ah i tel ve ding le hrial awk a țha lomi a si timi catlang te hna aa tel tikah a hman tuk le a ropui tuk in ka hmu. Ralkap țhanternak kong he i pehtlai ko seh tiah saduh ka that. NCA a țhumi nan si caah nan biachim ah ralrin a herhnak a um cu a hman ko lai nain hawi dang cio bang kaa in chim lomi zong kha a thli tein siseh, langhngan in siseh tuahsernak in cawlcangh nak ding ah caan țha bik nan ngeih lio caan a si. Cucaah lawmhnak ka chim ve. A sinain cu hlan bak tuk sawh i, Chin miphun kan lung aa rual a herh. Kan țan rual a herh timi bantuk sawh a simi “biakaa” chim phuan sawh a si ahcun a thar in CNF cawlcanghnak vialte beidong an si țhan sual lai ti zong ka phang. NCA nih ralkap țhawnter a kham vialte cu kan hngalh cio ko nain Miphun kan si ve caah kan himnak le upat kan co ve nak bik lam kha kawl ve a herh ko.

Laimi vialte nih Prophet ngan ka sinak le ka fimnak bia theihter ka duh mi cu: Vawlei cungah hin Tlangval minung zakhat ah 50 paoh cu Ralkap si duhnak an ngei dih ti si. Doctor le Actors bantuk si duh nak in Ralkap si duh nak aa ngeih mi hi Miphun vialte ah an tam deuh tuk. US te hna le, Europe te hna kan zoh tik zong ah Ralkap țuan bak loin nuam tuk in a nung kho miphun an si nain Ralkap a lutmi an chambau bal lo. An ram nih a herh ning zat an ngei zungzal. Cubantuk in Ram chiat bik nak a ummi ram pawl zong ah ni khat hmanh nun le thih nak kong a fiang lo mi Ralhrang ram hmanh ah Ralkap cu an har tuk lem lo i, IS bantuk zong nih Ralkap cu thong tam tuk an pumh khawh hna. Zei bantuk Miphun mino vialte hi zaceo paoh cu Ralkap thi an ngei dih ko. Cu lawng hlah Minung paoh poah nih cun doctor le pastor le phungki hmanh nih khin Ralkap thi an ngei ve ko. Chim duh nak cu 100 ah 50 hi cu ralkap thi an ngeihmi kha zei dang thi an ngeihmi nak in a sang deuh ti bia.

Kawl ram kan zoh zawng ah Kachin,Karen, Shan,Arakan le miphun dang vialte hi Ralkap milu kong ah an buai tuk bal lo. A hlan ahcun kuanzen kong lawng ah an rak buai. Nain a tu ahcun kuanzen kong zong ah an buai tuk ti hna lo. A si kun ah zei ruangah dah Laimi hi Ralkap kan har timi bia-hal nak a um. Kan pupa chan ah le, Ralkap tlak uar bik mi an si țung. A tu CNF chan ah hin zei ca dah Chin Ralkap hi an der bik. Timi biahalnak dong loin a um. Laimi maw Ralkap luh kan duh lo, kan ral maw a chia? A si hrim lo. Ralchiat le Ralthat timi cu zingzan rian men a si. Rakhan miphun hi pumpak cio in ka hawi an tam tuk nain a ho hmanh a ralțha hleimi an um lo. An ral hmanh maw a chia deuh ti awk lawng a si. Nain Miphun nih a kalpi mi Policy cung ah Ralțhat le Ralchiat te pawl cu aa hngat. Laimi zong hi miphun dang cio bang, 100 ah 50 paoh nih cun Ralkap si duhnak thi an ngei dih ko. Nain a kan hruaitu hna nih Policy tha mi an hman lo tikah, CNA va luh zong le, Tio kuang i tar thih va bawh he aa lo. Kawl ralkap luh zong le sulllam ngei lomi a si tikah a ho hmanh nih Ralkap thi an ngeih mi kha linhter loin a dang thi an ngeih chihmi tu kha an zulh. Cucaah CNA a thazang a karh kho lo. Micheu nih cun Rakhan vial AA ah an lut dih, Laimi vial CNA ah kan lut lo an ti țheo. A palh. Policy nih bia a chim. CNA nih AA style in kal ve seh law Rakhan nih AA ah an luh mi nak in Laimi nih CNA ah kan luh mi a tam deuh lai. Tahchunhnak lak ding a tam tuk nain cu kong cu za rih seh. Mifim nih cun ka cabia tlangkhat an rel ah an tlaih khawh ko. Nain mihrut ve nih cun tangcheu hmanh nih fiang ding in ka țial zong ah an fiang ve lo.

hngalh a herh rih mi pakhat cu a tu lio kan dirhmun boruak hi Chin miphun vialte lungrual ter nak ding caah a donghnak caan țha a si bang, lak zia thiam lo ahcun cheuhmal dih nak a thok zong a si cang. Cun Ralkap thar dirh a fawi lio bik caan a si. Micheu nih cun Ralkap thar a ho nih dah dirh lai nan ti lai. AA an dirh hlan ah khin Arakan ah Hriam tlai bu hnih thum an um cang. Bangladesh hram bunh le Karen ram hram bunh an si. A tu zong ah an um rih ko. An der taktak khi a si ve. Cu lio ahcun a tu bantukin AA pi chuah ding hi a ho hmanh nih an zum lo. Arakan mipi zong nih an zum lo i, ALP te pawl zong nih an rak ruat ban lo. AA dirh an timh ah hin Karen ram hrambunh,Bangladesh hram bunh zong nih a thar dirh hlah uh. Thih daan kan in pek dih hna lai an ti. An rak buai ngai. Nain A ho hmanh nih rak hngalh huaha lomi Tun Myat Nain te pawl nih an va dirh. Upa cheu khat nih tha an rak pek ve hna. Cu zong cu langhngan pi cun si ve lo. Va dirh ko uh. Nan hnu lei ah kan um ko an ti. Ziah tiah cun Tun Myant Niang te pawl nih khan cun ALP style an duh lo nak pawl kha a rak um ve. An nih cu a țhawngmi dirh an i timhnak pawl kha an upa te he an i ruah a si. ALP bantuk a dang dirh ding ahcun ho hmanh nih tha an pe hnga lo i, an mah zong nih an huam ve lai lo.

Nain Phun dang te dirh an duh mi cungah khan tha petu upa te an rak ngei. Mit hmuh in an țhang ko. Ziah tiah cun Policy kha a biapi. Chan he aa tlakmi policy. Dir hmun he aa tlakmi policy kha hman thiam a herh. A tu ahcun an ruak phak loin an thang. Laimi zong nih kan mah kan Ram he aa tlakmi policy ngeih ahcun Ralkap thar dirh zong va siseh, CNA țhawnter zong va siseh a fawi tuk cang. A hlan chan bantukin zei dah kan ei lai tiah buai chan a si ti lo. Zei meithal dah ti chan a si ti lo. I zuam ahcun a ngah dih mi a si cang. Micheu nih cun CNA tlawmte hmanh kan cawm kho lo hi, Ralkap tam deuh hna seh law, zei in dah kan cawm hna lai nan ti țheo. Thil nan hngalh lo ning cu Nih chuak khi a si i a ngai ngai ahcun Minung tam lawlaw ah khan i cawm fawi deuh. Ralkap zakhat cawm nak in Thongkhat cawm hi a let zakhat in a fawi deuh.

Ralkap thonghra cawm le bang cu a let thongkhat in a fawi deuh. Hi kong hun fianter ahcun a sauh lai caah chia rih sih. Cu lawng si loin India nih hin a thli tein Ralkap a thawngmi kan ser khawh ahcun a kan bawmh hrimhrim lai. CNF/A an dirh kaa zong ah hin a bawmh ko hna. Nain an cawl ning a zoh hna tikah tapung tlaktlai level an phak lo caah a zoh khenh duh hna lo. Micheu nih cun Kawl cozah le India an i dawt ruangah a ngah lo. India Ralkap nih CNA a kah ti bantuk kha nan van chim lai. Hi bantuk kong tiang in kei mah nih ka hngalh dih ko. Hi zawn ah na hngal lo hih, lih in na țial nan van ti nak ding zong ah hin kei mah nih a let zakhat in ka hngalh rih thiam. Nan ruat phak lomi ka chim caah a si. Tuluk zong nih khin Kawl cozah he an i daw tuk ko nain a kiangkap pawl khi a bawmh ve hna. Palaung te hna um nak cu thilman sung chuahnak zong a si lo. Nain a bawmh dih hna…ziah tiah cun hawi dang tapung cu Tuluk ram ah vaa thup loin Kawlram chung bak ah khan an dir…Nain Laimi nih rak dirhmi paoh cu Mizoram chung lawng ah an rak dir i Myanmar chung hrim ah hmunkhuar ding in an luh ngam lo tikah India nih a bawmhnak ding hna lam a um ti lo. Northeast tapung pawl he țanți lai tih ruang zong ah a si lo. Nain bawmh awk tlak in a hmuh hna lo ca tu ah khan a si. Cu hlei ah a tu ahcun India nih a pemh tuk cang. Tuluk nih Arakhan state tiang in India zuam cawh in a cawl ning vialte a hmuh cang.

Tuluk zong nih Tlangcung hriamtlai pawl a bawmh ngai hna ruangah Kawl cozah he i huat cu chim lo, Kawl cozah cung ah Nawl a ngeih chin kha a hmuh cang. Cucaah cun Laimi nih Ralkap țhawngmi, thahchunhnak ah Paletwa peng khi a za te si lo hmanh ah a zatceo paoh controlled aa timmi, kha India nih van hmu seh law bawmh colh a duh cang lai. Kawl ralkap nih AA a țhawl khawh lo ding kha an pemh dih cang. A thawl khawh hna lo ahcun Kum tin in Billion tangka a luannak ding tiah India cozah nih aa ruahchihmi project vialte kha zan mang an si dih. Cu zong cu Tuluk “letchiat” kut aa tel kha an hmuh. Inn Țek Lai ralkap lawng nih a țhawl khawh hna lai ti kha an hngalh. Paletwa kha Chin Ralkap thongkhat nih a lak cuahmah a si ahcun India cozah a țhu sawh lai lo. Mizoram cozah he hmanh kan i dawt bik lio caan a si. Paletwa kan lak khawh ahcun India cozah project vialte kha nun a fawi tuk cang.

Ziah tiah cun Sittwe le Paletwa kar lak cu Kawl cozah zong nih humhim aa fawih deuh lai. Mah hi cu a tlangpi ka chim nak lawng a si. AA kan doh zungzal lai, Kawl ralkap kan doh zungzl lai ka tinak a si lo. AA nih meithal puah hau lo tein Chin Ralkap thongkhat Paletwa in an luh a hmuh ahcun hnatlaknak zong a co hlan khawh i Chin Ralkap Hawi zong ah a cang kho. Kawl ralkap te kan do lai lo maw nan ti lai. An nih zong cu doh rilmal ta. Nain Long-term in doh a herh mi a si. KIA style in maw, KNU style in maw, AA style in dik doh an ngah ve lai. Ziah tiah cun hawidang cio bang Ralkap thazang kan ngei lai….Laitlang atmosphere timi boruak vialte kan thlen khawh colh. Mino vialte lungchung ah tanghra awn i, siangcachim rianțuan duhnak thinlungnak in Chin Ralkap i luh duh deuh nak atmosphere a si cang lai. Mah vialte hi zingzan rian lawng a si.

Note: India cozah i bochan ding ka ti lo hih.

A tawinak in a tlangpi ka hun chimmi an si. Point pakhat cio hi fianter ahcun cahmai zakhat lawng te chuak ding an si. Na palh, na hngal lo nan ka ti nak a um ahcun na thluak nih a tawinak te ka tialmi a pemh khawh lo a si lai. Cun Ralkap thar dirhnak kong si loin CNA zong țhawnter a fawi bik lio caan a si ti nak a si.

Adonghnak ah nawl ka duh mi cu a hrut deuh mi pawl kha nan si. Nan i fian ve ding le nan uar ve ding in ca țial ka duh ko nain a caan ka ngei lo. Nan level san deuh tikah ka țialmi hi rel țhan ti u law fullstop hmanh hrelh lo in nan ei dih te ko lai.

By: Prophet Ngan Siang Bawi

 424 total views,  1 views today

This function has been disabled for Chin 11 News.