CNA Ralbawi Pahnih That Ci Le Uk Lian Thang An Rak Tlaih Hna Ning

Kan Lai ralkap ah nihin tiang an min kan hlam pengmi hna pahnih Uk Lian Thang le That Ci an kong lam an rak tonmi, nihin tiang a si ning taktak a ho hmanh nih chim le phuang a um rih lo. Tlanglo khua bawi a rak tuan belmi nih an kong lam an rak tlaih hna ning a chimmi vun ruah ah lung a zur ko mu!  

Nikhat cu Uk Lian Thang le That Ci hi Bawm ram in Mizoram Farkawn in Lai tlang lei ah a herhmi tete tuah dingah kai an rak i tim. Hi lio caan hrawng hi Thantlang peng Tio tiva kap um mi cu, CNA/CNF hna ruangah harsatnak kan ton le Kawl ralkap kut kan tuar hi a tam saling bak si. A sinain zei hmanh chim khawh mi le tuah khawmi kan ngei lo. An kan ti ning poh in um a rak si.

Uk Lian Thagn le That Ci an rak kai lio caan hi Furpi Tio tiva a lanh lio a si caah, Lawng in kal a hau mi a si. Tlanglo khuami ti lei a thiammi  hna cu Tio Tiva ah lawng a mawngin in riantuan mi an rak um. Uk Lian Thang le That Ci cu Farkawn in an rak zuang i, Tiva an rak phak ah Tlanglo lawng mawngpawl cu rak kan laa tu law tiah varal in an hei auh hna. Tlanglo lawngmawng hna nih cun Tlanglo ah Ralkap an um i, Tio tiva ah an rak ra lai. Rak hngak rih ko uh.. Ral kap an kir in kan rak in lak te hna lai tiah an ti hna.

Cu ticun chun ni tlak deng an hngak hna nain kawl ralkap cu  Tio Tiva ah an rak zuang ve hlai lo. Cu caah Uk Lian Thang le That Ci nih cun a tu tiang an rak rat lo mi cu rat an i tim lo i si lai. Rak kan la cang ko uh tiah an hei ti than hna. Lawng mawng pawl zong cu tu tiang tiang rak lo cu Ralkap hi rat an i tim lo si ko lai tiah hna ngam in Uk Lian Thang le That Ci cu lawng lawng cun an vun lak hna. Tlanglo lei  Varal an phan bak ah Kawl ralkap cu Tlanglo in Tio Tiva ah hung phan ve. Ralkap he vun i ton ahcun zei hmanh chim ding a um ti lo. Kan zam lai i, kan luat kho lai maw? ti lawnglawng ruah ding a um cang.

Zei hmanh chim manh loin Tilawng cung cun an tum i, Uk Lian Thang le That Ci cu an ruksai bek he, Tio tiva pawng ramh bua lak ah an zam colh. Cu ahcun Kawl ralkap nih Lawng mawng pawl cu an tlaih colh hna i, thlam ah an hren hna. Ral kap pawl nih ho te dah an si tiah an hal hna tikah kan theihmi hna an si lo. Rak kan la uh an ti i, a ho si kan thei hna lo. Kan nih cu ti a tan kho lomi Lawng in kan lak  hna i, phaisa cu zat in kan lak hna tiah an ti. A ho an si kan thei hna lo. Rak kan la uh an ti i, kan lak ko hna, phaisa kan hal hna lai kan ti ah nan rak ra i, an zam colh ko tiah an ti hna. Ral kap pawl nih cun tlanglo lawng mawng cu an hro len hna nain kan theihmi hna an si lo ti kha an chim peng caah fak in an ti hna lo.

A sinain kan mah lei ram  varal a si caah ralkap pawl nih mei thal he an kawl colh hna. Uk Lian Thang le That Ci zong cu an zam nak hmun  burbuk phen ah Uk Lian Thang hi a bawk i, a pin deuh ah That Ci hi a rak i dup ve an ti.

Ralkap pawl cu an bawi le nawlpek mi tuah lo ahcun an bawi le nih fak tuk in an vuak ve hna tiah lung dawng loin an kawl hna. A donghnak ahcun Ralkap Senthum pa nih Uk Lian Thang hi a va hmuh. Cu tikah Uk Lian Thang nih ral kap Senthum pa cu a rak lem i, nan bawi le sin ah na ka hmuh hi ka chim hlah law, phaisa tlawmpal le ka Suimilam hi man fak mi a si. Hihi kan pek lai tiah Uk Lian Thang nih cun a rak lem, Senthum pa cu a lung a rak tling ve. An vun i lem dih bak ah an vanchiat ning cu  ralkap dang an sin an vun phan colh. Cu  tikah Senthum pa nih cun a lemnak  cu a lungtling ko nain ralkap dang an rat tikah a hawi le tih in Uk Lian Thang Cu meithal he a hmuah chih colh. Ralkap dang cu an vun phak tikah That Ci zong cu an vun tlaih colh ve.

Uk Lian Thang an vun tlaih bak ah a chim mi cu fak nak ka pe hlah uh! CNA ralbawi ka si. Ralbawi cu faknak pek phung a si lo. Cun hi pa zong hi faknak pe hlah uh, Farkawn minung a si. Ka Kuli phur tu menmen a si a ti hna. Cu ti cun Uk Lian Thang cu Tlanglo lei ah That Ci he cun an kai pi hna. That Ci  cu Kuli menmen in an ruah caah zei ti hmanh in an ti lo.

Tlanglo khua an hung phak hlan deuh ah hin Tlanglo khuabawi pa cu thih bak a duh ve cang. Zei ca tiah Uk Lian Thang hi na hmuh belmi a si maw tiah an rak hal tikah ka hmuh belmi a si lo tiah a rak ti hna. Uk Lian Thang kan hal ve lai i, kan i hmu bel ko a ti ahcun kan in that lai tiah ralbawi pa nih Tlanglo khuabawi cu a rak tlerh ve cang.

Uk Lian Thang le That Ci cu Tlanglo khua an hung phak cu Tlanglo Biakinn chungah an chiah colh hna, ralkap nih cun an cawngh colh hna. Uk Lian Thang tucu a lu an khuh nain faknak cu an pe lo. That Ci tu cu khua chungah zalong ngaiin a um kho lo. A ruang cu kuli a si a ti caah an zumh i, zei ti hmanh in an ti lo.

Uk Lian Thang cu Tlanglo Biakinn chung ah an chiah i, Ralbawi pa nih akut tang ralkap cu Tlanglo khuabawi pa cu a va kawh ter. Kawl ralbawi pa nih Uk Lian Thang hihi nan i  hmu bel maw tiah a vun hal. Tlanglo khuabawi cu a zun aa ceh lo lawng. Zei ca tiah Uk Lian Thang nih kan i hmu bel ko a ti ahcun Tlanglo khuabawi pa cu Ralkap kut tuar colh ding a si. Nain Uk Lian Thang cu Lai Ralbawi mifim a si caah kan i hmu bel lo tiah a vun ti cu, Tlanglo khuabawi nih cun a tu hi maw thihnak in  ka luat ti tluk bak in kaa ruat a ti.

Kha lio ah Tlanglo khuabawi  cu mifim ca thiam a si caah Uk Lian Thang caah bawmh pakhat a hal. Cu a halmi cu Saya hi lai ralkap pa hi, Minung a si  ve caah zaan a hngilh kho lai lo. Thaizing  Thantlang lei kal ding nan si caah, Zu langtan tein ka kawl piak lai , thinthi tein aa hngilh khawhnak dingah tiah kawl ralbawi pa cu a hal piak. Kawl ralkap bawi cu mifim a si ve caah Tlanglo khuabawi pa nih a hal piakmi cu a cohlan piak ve.

A sinain That Ci cu khua chungah zalawng tein a um kho  ko. Tlanglo khua nu khua pa nih Pa Ci nang cu Kuli ah dawh an in ruah ko hih. ‘Zam ko’ An in ti lem lai lo. Cun Tlanglo Siangin chuk khin tli law, na luat ko lai. Chuk lei zuan ahcun kuan fang zong nih mi a kheng kho taktak lo an ti. Cu caah zam ko tiah ruahnak an pek. Nain That Ci kha taksa ah khuaihli nih a rak tlunh caah a zam kho ding a si lo. Cu caah kei cu hi ti hin ka a um lai i, Thantlang hrawng cun an ka thlah than ko lai tiah a ti.

Zing khua a hung doi cun Kawl ralkap cu an thilre he Uk Lian Thang Cu Thantlang lei ah Rang an cit ter i, Tlanglo khuami kuli phur le That Ci  le tin an kal pi hna. Lam Pi zong ah That Ci cu hi lam hi cucu a si i, na luat ko lai zam ko tiah an ti. Nain a khuaihli hma ruang ah maw a si lo ah ka luat ko lai ti cu dah a ruah hnga a zam duh  lo.

Cu ticun Tlanglo in Vanzang khua an phak bak ah, Vanzang khuami nih nan batuk lai kan mah nih kan in chawng hna lai i, nan nih cu va kir ko uh. Kan mah vanzang nih Thantlang tiang kan chiah hna lai tiah an ti. Cu ahcun Tlanglo khua mi cu Vanzang khua in an kir hna. Hi lio ahhin That Ci hi kir ve seh law, Ralkap nih an tlaih lai tiah an zum bak lo an ti. Tlanglo khua nih Pa Ci nang zong kan mah sin ah rak kir ko. Ral Kap pawl zong nih an in sut hlam lo hih. Kuli taktak ah dawh an in ruah ko hih tiah Tlanglo khuami nih an ti.

That Ci nih cun si hrim, Kuli taktak ah dawh an ka ruah ko hih. Thantlang tiang cu ka va lan lai i, ka rak kir colh te ko lai tiah a ti hna. Nain Thantlang an vun phak bak cu kawl ralkap nih an rak don hna, That Ci cu aa ruah ning bantuk a si ti lo. Lungler , ral bawi a rak tuan mi pa nih CNA ralkap pawl an hman thlak le an mui a rak theih dih hna.

Thantlang an vun phak bak cu Lungrel ralbawi  (Buhmu Nginh Aye ) nih ziah a bawi deuh pei rangcit ter ding a si cu, Uk Lian Thang cu rang nan cit ter tiah a vun ti hna i, Thantlang lawng ah That Ci a si hi an theih i, Thantlang khua ah an tlaih colh hi a si.

Thantlang in Hakha lei an lanh hnu cu theihmi zei hmanh kan ngei ti lo. An thaih hna in Thantlang tiang an tonmi tete hi ka theih khawhmi a si.

Note: Ni hin ni tiang Ram le Miphun caah riantuantu vialte Upat kan in pek hna! Hi nanrak tonmi nan tuanbia hi mipi nih theih awk a tha ko rua tiah kan ruah caah mipi hmuh khawh dingin kan rak tialmi a si. Ram le Miphun caah nun pek in riantuantu vialte upat kan in pek hna!

Credit: Tlanglo Khuabawi Hlun

 

    

 152 total views,  1 views today

This function has been disabled for Chin 11 News.