CNA/F Hi Thazaang Pe Cio Hna Usih! Kan Ralkap Zong Nih Mipi Kan Lung Thawhnak Kan Tuah Piak Ve Uh!
CNF/A $25 Million Project Hi Thazaang Pe Hna Usih! Asinain Mipi Lunglak Khawh Nan i Zuam Ve Cu A Herh!
=======
Kum 2023 chungah miphun dothlennak le ralhrang kan tei khawhnak dingah CNF/A nih $25 million project an suai timi vun theih cu a ropui in tha a thơ tuk hringhran. Ralhrang teikhawhnak ding ahcun kan thapi kan chuah cio cu a herh hrimhrim ko, zaangzel in tuan ahcun mipi hi zahzah kan thih hlei ah kan sungh rih lai caah kih le kih, lum le lùm bakin biakhiahnak ngeih a herhmi asi ko.
CBCUSA nih 2022 chungah dothlennak caah le humanitarian caah Khrihfabu kip sinin 1/10 chungin 5% cu rak thawh a si, khuakip nih ting tampi vun thawh cio asi rih, pumpak in thơ mi an tampi rih. Kum 2023 caah CBCUSA nih 15% ah an kaiter, hi chung ah 10% cu dothlennak caah hman adang 5% cu ralzaam caah hman dingin suaisam asi. Khrihfabu kip nih 1/10 chungin biatak tein a vun dirkamh khawh ahcun $25 million project hi a tlamtling kho taktak lai zumh a um taktak ko.
Khrihfabu kip nih dirhkamh lo ahcun thilharsa taktak ding asi cang in ka hmu, a ruang cu mipi an cei tuk cang, theipar tam an hmuh rih lo caah a tha chiacangmi an tâm cang, mi a zum ti lomi an karh chin lengmang cang. Khrihfabu nih dirkamh lo ahcun $5 million hmanh hi kan hmuh khawh ti lai ka zum tuk ti lo, a ruang cu a cunglei ka tialmi nih khin kan thazaang a vun kan derter ngai cang caah a harsa ngai ko cang lai. Live tlangau le concert hrawng hin cun zeipipa a work tuk ti lai ka zum lo, a ruang cu kum 2 chungah kan kal cang i theihcia deuh lawngte ahkhan kan i nawlh lengmang bantuk asi in ka ruah.
CNF/A nihhin a riantuannak, a hriamnam le a cawlcanghnak tete hi thuh rumro i tim loin public ahhin vun langh taktak ve cang sehlaw mipi cu kan lung a thơ put than ko hnga. Thil hme in thil ngan tiang in thuh rumro in a thuh mi le mipi nih zeizei hmanh an theih khawh ti lo tikah, theipar um lomi riantuannak ah an ruah caah an mawh ve lo. “Van Ralvennak nan ti le pakhat zong kum 2 chungah nan cawk khawh mi a um tung lo, Thantlang helicopter pakhat hmanh nan thlak khawh tung lo, Meithal nan cawkmi zong kan hmuh tung lo, Meithal le zenkuan kan i zalo nan ti zungzal, $ million kan thawh mi cu teh?” timi comment pawl hi ka hmuh a tam taktak cang.
CNA $25 million project hi a fawi lo, CDF-Hakha nih $2 million 2023 chungah ah i tim ve, Thantlang an um rih, KKG a um rih, mah pengtlang le khuakip an um rih, thil fawi cu asi lai lo. Hi bantuk phu tamtuk a um tikah le budget tamtuk rak suai cio ve a si tikah phu khát le khát zong i rem lo nak lam a tâm khun tawn. 2022 chung hmanh ah Malaysia ah a zaam mi thong tamtuk an um, zen kuan le meithal ngeihlo ruang zongah a zaam mi an tampi fawn.
Social media chan a si cang i hihi zeitindah hman zia kan thiam lai i ralhrang zong thihphaihnak ah hman kan zeitindah kan hman khawh lai, ti deuh hi kan ruah awk a si cang. I thuh le hman i timh lo cu chim lo zeitluk in dah kan langh ve cang a herh mu. Ka hmuh ning ahcun tuning in kan pale CNA nih an riantuannak an thuh peng ko rih asi ahcun tukum pin hi cu 90% tluk minung nih cun thazaang an chuah duh ti lai ka zum lo, mipi lungthin ka cuan chung ve ning ah.
Nan riantuannak hi Pathian thawngin a tlamtling ngaingai ko, theipar tha nan chuah tuk ko, nan i zuam tuk ko, zumhtlak nan si ko, cu vialte cu mipi nih tam chinchin an theih khawhnak hnga i zuam u. Confidential le top secret asilomi hna hi cu post ko u ca, zeidah nan tih? Ralhrang nih a hmuh lai cu maw nan tih deuh mipi lungthin nikhat hnu nikhat a zor deuh chin lengmang sual lai dah?
Ka phak tawk in kan riantuannak I lutlai tete ka tuannak ah, pakhatnak i kai timh bikmi cu mipi thinlung lak hmasa a si zungzal. Mipi thinlung kan lak khawh hmasa hnu ahcun zeidang riantuan cu a fawi te cang, mipi thinlung lakkhawh loin riantuan cu a har taktak khi asi. Cucaah thil hi thuh ding tampi a um rual in mipi lunglaknak ah nan riantuannak photo le video hi cu kan hmuhter lengmang ko u.
Pakhat le pakhat ka hal hna i ziah thla 100% bakin a safe tukmi photo le video post zong hi mah ti rumro hin an huat, an khắp viar? tiah ka hal tawn hna, kan pule pahnih hi a zual hma bik an si an ka ti. Online le Live hi a rem deuh lomi a lo, an ka ti. An min zong ka vun chim te hna lai a hnu ah. Cucaah dothlatnak ahcun a thli thup thil tampi thuh ding a um rual in civil war asi caah mipi thinlung a daihnak hnga lo Chinland Club le CNA page pawl zong nih zingzaan in zeimawzat cu nan riantuannak photo he video he kan dangh lehlam u ca, thup naisai hlah u, tu hnu cu ka hmuhmi paoh cu ka post cang lai, confidential le top secret a si lomi cu.
Nan Live le concert nih a a zat ti lo, nan video le photo zong kan đang lengmang hmanh u, phaisa cu caktuk in a lụt luaimai ko lai. Kan hnu ah sniper pakhat photo media sinah a phak ruangah secret thong nan thlak timi thawngpang kan theih cu a poi ka ti kho tuk. Kan tei hrimhrim lai hi ral hi! Lungrual tein le thawng chinchin in kan kal khawhnak ding ahcun nan riantuannak cu kan dangh ko u. CNA le CDF cu ka tanh tukmi an si caah dothlennak a thazaang a dernak hnga lo ka vun tialmi asi. Credit: Chelsea Bawi
Leave a Reply