Chloroquine Hman Kong le US Hruaitu Pawl Ruahnak by Victor Khen Sang

US ram hruaitu pawl cu Covid-19 rai caan karlak vun khamnak caah Hydroxychloroquine le Antibiotic sii phunkhat asimi Azithromycin cawh in din ți ahcun coronavirus khamnak caah ațha tuk ko ti in President Donald Trump le amah ruahnak petu cheukhat nih an dirpi lio ah atulio US mipi nih an bia an ngeih taktak mi top Scientist Dr. Anthony Fauci nihcun aduh rih lo. Cucaah nizan kha fak nawn in an i si hna tiah CNN nih avun țial. Trump ruahnak petu Peter Navarro nih ca (data) zong avun i put i mah sii hi ramkip ah an hman i ațha ti in avun chim lio pi ah Dr. Fauci nih abia atan i “mah na ca chuah pi mi kha chirhchan awk ațha lomi na vun chuah pi, zei bia dah na chim” ati i thin hung ngai in bia an i el len ti asi. Donald Trump le amah ruahnak petu cheukhat nihcun Covid-19 hi arannak paoh in khamnak sii pek hna an duh cang nain Dr. Fauci nihcun hi zawtnak hi chikhat asi lo, caan laak ahau, kum khat in thla 18 kar cu caan kan laak ahau ti in adirpi peng ve.

Nihin tiang ahcun US ah mizaw zapi (total cases) hi 337,000 leng an si i athi cang mi hi 9600 leng hrawng an si tiah HIKA hin an tial. Britain Prime Minister Boris Johnson cu nizan kha sizung tiang tlik pi asi nain nihin cu zeihmanh thinphan ding asi lo, adam colh ko lai tiah BBC nih an vun thanh țhan ve. Italy le Spain ah mithi nikhat hnu nikhat an zor cuahmah ko caah atuning te incun innchung ah i khar khumh piak le minung i hlat deuh in kan cawlcangh mi nih thilțha achuah pi hrim ko ti zong alanghter caah thla dih incun tlangrai hi adai lei apanh hrim lai tiah ruah chan nak aum ngai ko cang. Japan ram zong aherhning in lockdown tuah ve ding in an Prime Minister Shinzo Abe nih athanh ve cang. Cun khuaruah har asimi cu Coronavirus achuaknak Wuhan khua in meng 580 lawng ahlat mi Taiwan cu nihin tiang ah Covid-19 in azawm mi 350 an tling lo i athimi 5 lawng an si tiah the The Nation News nih ațial. Vuleicung ah Covid-19 tlangrai in țhabik in ai veng khomi cu Taiwan asi tiah CNN zong nih thangțhatnak ca ațial. Wuhan in achuah ka ah khan ramleng aphanh hmasa mi cu Taiwan asi nain vekvak tiah an kham colh i an ram an vun khar i hmunkip in an vun phih khawh colh mi hi khuaruah har an si ti asi.

Nizan nai ah Britain siangpahrang Elizabeth II nih bia chimmi i “Ni athlang țhan lai i leng kan chuak țhan lai, hawikom he kan i tong țhan hna lai, kan vun in tuar rih ding caan arat zong ah i hnem ko rih hna usih” atimi ah khan Sarah Ferguson (Queen Elizabeth afapa Andrew i nupi hmasa) nih lehnak catawi te avun țialmi bia kha ahman tuk ka ti ve.

“Mother Nature has sent us to our rooms.. like the spoilt children we are. She gave us time and she gave us warnings. She was so patient with us. She gave us fire and floods, she tried to warn us but in the end she took back control.”

“Akan hringtu bantuk asimi kan vulei pi nih hin ahrinmi vulei cung minung vialte hna hi ngakchia nawl ngai lo te bang innchung ah lut dih uh avun kan ti caan aum, cun ralrinnak phunphun avun kan chimh caan zong aum, kan caah alung zong asau zungzal fawn ko, zei maw caan ah rili tilet in akan zuan hnawh i zei maw caan ah meitlang puak le meikaang hna in akan hro tawn, asinain adonghnak ahcun amah lila kha adai țhan tawn e” tiah ațialmi nih mi thinglung asuk ngai ngai.

 281 total views,  1 views today

This function has been disabled for Chin 11 News.