Chinram sersiam tu dingah mi dingfel MPs kan duh/herh bang in ramdang pem Chin mi zong thlen (change) kan herh ve

By Sang Hre 

Kum 50 leng den cikcek le hroh cang mi ram, cu ram lak hmanhah a sifak bik mi ram, Khrihfa ram asi ko nain eihmuarnak a sangbik mi kan Chin ram sersiam thannak dingah mi dingfel cu kan duh dih. Kan kawl cio. Kan ram hrim nih sazuk nih rial ti dai a hawt bantuk in mi dingfel – eihmuarnak a do mi – ram a daw taktak mi ramkhel riantuan tu le Pathian riantuan mi kan herh hringhren ko hna. Laitlang – Chin ram lawngah maw miding fel cu kan herh hna lai? Thlennak (change) cu Laitlang lawng nih maw a herh? Laitlang ca lawng ah maw biachim le holh kan thiam hna lai? Laitlang kan kaltak mi kan unau bantuk tein ramleng a pem mi Chin mi hi i thlen (change) kan herh ve ko. Chin ram – Laitlang ahcun mi thangcho – mifim, mi thiamsang hmuh cu a har deuh hrim ko lai. Pawngkam nih a pe deuh rih lo kan ti lai cu. An mawh hrimhrim lo.

US, Australia, Canada, New Zealand, Norway, Denmark, Sweden tbk in kan pemnak ram ah khuasak, riantuan ko bu le kan pawngkam ah zei tluk in ram dang mi nih phung an zulh le mitha an tam. Ni fa tin in kan mit nih a hmuh. Kan hna nih a theih. Organisations, companies le Churches hna ah hin fimthiamnak (skills) a ngei mi – mi dingfel hna hmunhma an pek hna ning le hmai an kalter ning dan hna hmu cuahmah ko buin a lungfim kho lo mi upa kan tam tuk mi hi lung a fak hringhren.

Nitlak ram – ram thangcho hna sin ah a pem mi Chin miphun nang le kei (mino he, upa he) zong thlen kan herh hringhren ko. Ahlei bik in kan lungput, kan ziaza hna hi thlen an herh.

1. Kan pemnak ram ah zei hmanh cawn can mi um tung lo in a thei le a hngal ngai ah kan i ruah mi lungput.

2. Khrihfabuu le community ah hmunhma lak – upa si kan duh tuk ngamsam mi lungput le uarnak. Kan zual hna ngai hna. Acheu cu thih ngam in politik tha lo tiang a tuah ngam mi le a chuah pi mi kan tlawm ti lo.

3. Cawn cannak le thiamnak a ngei deuh paoh hmunhma pek lo pin ah, hmunhma an hmuh
lo nak ding in lam kawl. Thil ti kho deuh an um ah le an ke hlenh phel khawh chung in phelh i timh. A niam tuk mi lungput.

4. Mah khua le pengtlang pin ah zei hmanh hmuh khawh ti lo. Mah le pengtlang holh men hna hi Chin holh ah a ruat top mi ngaikuang lungput le hmuhnak.

5. Nu le pa nih mah hmanh ca thiam lo – zei thei lo ka si ti i theih ko buin fa le Secondary
college a kai cuahmah mi zong – inn cawk duh le ruah ah factory ah rian tuan ter mei. Mah pawl cu a miak deuh tiah a hmuh le a ruat cuahmah mi lungput.

6. Kan pemnak ram ah secondary (high school) in a kai kho mi mino si ko bu ah -motor cawk duh men le sianginn a kai kho ti lo mi tleirawl upa deuh – mah duh tlong in a vak kho mi bantuk men in thanchonak a pek kho tuk theng lo mi rian ah luhlinh in luh.

7. Biakinn hi Pathian thangthatnak a si ti i fiang loin thil thar rumro langhthlarnak ah ruah rian mang i va le thei lo kar lak ah a thlithup in thil cawk hmang in innchungkhar “hell” ram bantuk a ser mi lungput.

8. A miak tuk – a hlawk tuk ti I Cozah phung le phai he ai kelh ti thei ko buin tuah/tuan chih peng mi lungput. Phungbuar in rian tuan hi fim hna le thil tha bantuk a ruat mi lungput.

9. Khrihfabuu he community he zei thil tuah paoh ah thil tha tuah cuahmah mi ah dir le I khop lo in mah tenh mi hawi le phu (group le party) ser peng duhnak lungput. US le Australia ah a tam bik ko rua. US lei upa nih an ka chim ngei theo.

10. Pulpit cungah Pathian bia cu chim phot ve. Aleng ah le ramkhel rian tuan bantuk in politik cawlcanghnak ah a thli thup in a cawlcang cem tu le a rak sawh tu bik rak si theo.

Hi tluk thlen a hau mi dirhmun ah kan um ko buin ralkap le kawlram thatlonak kong hna chimceih kan thiam ngai chep bei rih.

Kawlram kong hna an tial/chim tawn ve ah khin kan ning an zak. Ka thling a za theo tawn. Mah vial zuu ding peng ko bu ah midang cawnpiak a thiam ngai mi mah hngal lo bantuk kan si sual tawn ko hlah maw ti bu in >>>>>>>

Note: Kan duh taktak ahcun zei thil paoh hi thlen khawh a si. Mi zei dah ka si ti i theihnak
le mah le sining i cohlannak nih thlennak hi a chuah pi theo.

 216 total views,  1 views today

This function has been disabled for Chin 11 News.