Chinram Ralthawh A Fak Chin Lengmag, A Runrun In Ral Kan Zaam Cang

Chinmi a ruunpi in Ralzaam dirhmun kan phanh hlan in India/Mizoram ah ritsii cu zuar le cawk pengmi a rak si kha Mizoram palek le cozah nih ritsii an tlaihnak kong newspaper,Tv le cozah websites hna ah an thanh pengmi a si ko.
A tucu a ruunpi in ralzaam dirhmun kan phak tikah thilfate le rak tuah peng ko mi zong kha ralzaam cherhchan hmangin hraanhnawh, auhnawh/diriamhnak holhka kan tong cuahmah.

Bawmh lio mi le bawmhherh mi dirhmun kan si tikah kan hmurtawi ding kha hngalh cia tein an kan den,an kan phomh cuahmah,an kan den rih te lai .
Mah kan i kham khawhnak dingah cun ritsii kha zuarlo in um hau,nangmah ralzaam na silo zongah na miphun ralzaam hna ca kha faakpi in zawn na ruah piak a herhtuk.

Dawtu kan hngalh lo cun dawt lo mi si kan i huah zau ko lai,ngabawm pakhat chung i nga pakhat a thut cun ngabawm ningpi in a thutter ti si khah.
Cucaah kan va dornak hmun le ram sining hoih in umto thiam le zulh i zuam hna usih.
Dolung le sobul karah kan um tihi theih peng bu in umkal le cawlcangh thiam hna usih.

Relchap>>>>Kawlram buainak kongah UN le ramdang nih kawlram mipi duh ningin an kan tlangtlak bal lo i, mipi an kan dirkamh bal fawn lo,an caah a miaknak umlo mi ah thukpi an i sawhkalh duh lo, an hmurka le cathanh in ralhrang thiltuah lungtlin lonak an langhter vial,mah cu an tuah peng rih fawn lai.

Kawlram huappi in ralhrang dohah kan lung aa rual fawn lo,Chin hriamtlaibu lungkhat taktak in dirtti har hoi,pengtlang cio ah hiden agenda he i uam tthup cio si fawn tikah zeitin kan ralpa kan nawr khawh lai?
Chinram hriamtlai dih lak nih Kan sinak vialte kaltak in pakhat ah kan i fun/ kan ralpa kan i fian taktak hnu lawngah Chinram ah teinak kan hmuh khawh lai, nan zumh lole nan sinak kaltak dih ulaw pakhat ah hun i fun chun hmanh uh sih,a phi kan hmuh ko lai.

Cun, khua nupa le Laihlum kan mifim le thiam hna he kan ttuantti thiam le lung i khah a hau, ralkap le a mipi lung i khah lo cun lohma a kal hartuk.
Khua nupa le kan mifim nih kan ralkap duhnak hmuh piak thiam i,kan ralkap hna zong nih kan mipi, khua upa le khua nupa hna duhnak hmuh piak thiam a biapi tuk ve.

Mahti kan kaltti thiam kha a biapi tukmi si, za ah za cu lung i rual a har,75% kan i rual cun, teinak lam panh a si ko caah khua nupa le kan Chin ralkap hna nih,nan duhnak veve kha khat le khat hun i hmuhthiam piak hmanh uh,teinak a phi a rak lang ko lai.

Ramleng nih kan dohhtlennak caah chawva in an cawl tikah chawva thawh tu hna kha upat pek ding a si ko, nain ram chung um khua nupa le hruaitu hna kha zeitluk in an biapit ve tikha philh awk ttha lo si fawn.
Kan fawi le harnak taktak a chungril mithmuh le kuttongh in a hngal le thei tucu,ramchung um mipi/khua nupa hruaitu hna kha an si.
Cucaah khua nupa hruaitu le kan ralkap hna kha duhnak i zulhpiak thiam le i hmuh piak thiam veve a herhtuk.
“Lungrual cu teinak a si”

Be the first to comment

Leave a Reply

Your email address will not be published.


*