Chinram Ralkap Nih Khuami Mipi Cu Zaannak Ding Vulei Khur I Cawh Uh Tiah Ralrin An Pek Hna, Pumpak Cio Nih Neih A Herh Bak

Chin ramkulh, Mindat khuami hna cu van ral le hriamngan ral in i runven nakding ah bomb khor i cawh cio dingin nizan April 14 ah CDF Mindat nih ralrinnak an pek hna, tiah theih a si.

Mindat mizapi nan him nakhnga CDF Mindat nih, ralrin peknak cathanh kan chuahmi nawl a ngai lomi cu dantatnak kan in pek hna lai, tiah an langhter.

SAC ralkap nih, Mindat peng chung ah hriamngan le vanlawng in kahdohnak an tuah lengmang ruangah Mindat khuami hna himnak dingah CDF Mindat nih cun atu bantuk in bomb khor i cawh ding in an theihter hna.

“Bomb khor i cawh cio dingin atu le tu thawng kan in thanh ko hna bu nain, nawl ngai loin nan i cawh lo ahcun dantatnak kan in pek cang hna lai,” tiah CDF Mindat nih cun cahanh an chuah.

Mindat peng ah a luancia April 7 in 10 tiang khan kahdohnak a chuak i, SAC ralkap 18 an rak thi. Cu pinah April 11 ah SAC ralkap Jet Fighter nih voi li bomb a thlak ruangah phungki sianginn pakhat le tualchung mi inn pakhat an rawk i, ramlak tlong varit hna zong an thi, tiah theih a si.Crd.. TCP