China Taza An Cuai

Tuluk cozah taza an cuai lai? Anmah ruangah virus a karh i anmah nih kan ram ah thihlohnak le chawleh zatlaknak a chuahter, an ti. Sihni pa pakhat nih Dallas biaceihzung ah Tuluk cozah cu rungrul hriamnam an serchuahnak ah an daithlang i an zuhter. An zuhtermi zawtnak rungrul ruangah zatlaknak fak tukin kan tuar. Tuluk cozah nih kan liamh hna seh tiah, taza a va cuai hna.

Lawyer Larry Klayman le a Freedom Watch phu nihcun vawlei pumpi minung an thihlohtermi ruangah US $ 20 trillion liam hna seh, tiah biaceihzung ah an tazacuainak ca an va chiah cu si. Florida lei pa zong nih biaceihzung ah a tazacuainak ca a va chiah ve.

UK Prime Minister Mr. Boris Johnson zong China cungah a lung tling lo tuk. Fox News zong ah Tuluk lei mawhphurhnak le tazacuai khawhnak ding kong lawngte an thanh. Tuluk cozah tazacuai ding kong nihcun Laimi sin zongah a hlanh ve. Tuluk taza cuai dingin ready in um cio cu a si.

An facebook cahmai ah Tuluk cozah tazacuai aa timmi an tam. Laimi lawng kan si lo, Kawl zong an tampi ve ko. Tulukram cu pulrai ruangah taza cuai khawh si lai maw? Bloomberg thawngthanhnak nihcun, “Nation-states are immune from such lawsuits” tiah a tawinak tein an leh. “Ram cozah pawl cu mah bantuk tazacuainak in an ikham kho” tiah. Cuai khawh an si lo, a ti.

Tuluk ram Wuhan khua in aa thawkmi pulrai zawtnak nih Nitlak ram pawl a den hna ning cu a zual hma. Cu a zualhma cemmi pawl cu vawlei a rak hnintu le a rak uktu ram pical lawngte an si. A ṭhangcho cang timi “Developed Countries” lawngte an si.

Tazacuai an duhmi ram cu IMF ningah, “developed” cazin ah ai tel rih lo. A ṭhangcho liomi ram “Developing Countries” a si. Kawlram he a level aa khat. Tazacuai an timhmi cu cuai khawh, cuai phung a si lo ding an hngal hnga lo maw?

An hngalh diam ko lai. Ramkhel minung pawl zertiannak phun khat tu a si. An ram hruaitu pawl nih rammi kilven ding an itimhlamhnak ah an rak chambaunak mipi an thinlung ah a luh khawh lo nakhnga, midang cungah sualnak tlakter an timh tu khi si deuh.

Credit: Salai C Alexander

 183 total views,  1 views today

This function has been disabled for Chin 11 News.