China Nih Test An I Palhmi Kong Company Pawl He A Thlithup In Hnatlaknak An Tuah Mi Nih An Phozarpiak Hna

(Adongh tiang na rel khawh ahcun China virus kong nai fiang cikcek lai)

WUHAN, China (AP) — Virus nih a den hmasabikmi Wuhan ah hin Covid test tinco hi awngbali paoh tlukin a har, tiah virus a tlunka ah khan khuami hna nih an chim.

January lio ah khan sizung i piah dingin khuami hna cu suimilaam sautuk chung an i tansi (line) hna i, a caan le bangah cun innchung lampi kap i an chiahmi miruak pawng hna ah an dirter tawn hna. Mizaw dirhmun in sizung luhter dingah mitampi cu test tuah an tingco kho hna lo. Test ai tuah mi mitlawmte hmanh cu khuacaan ah cun an test result hi ai palh fawn rih, ningcanglo piin negative an piahpiak tawn hna.

China ah hin virus hi karhso tuk lem lo dingin kham kho dirhmun an i ngeih ko nain, China’s top disease control agency hi a thlithuptuk in le phaisa miaknak mit lawng an au caah, a hunghung in test tuah kho lo in le buainak tampi ai chap vima nak hi a si, tiah Associated Press investigation nih an langhter.

Testing system kong i thil ai ningcan lo ruangah cun scientists pawl le officials pawl nih virus zeitluk i a karh a ran hi an theiphan kho ti lo – cu zawnte cu virus ai thok le cangka China nih a tawlrel a tlolhnak a ruangah pakhat a si ve. Top Chinese leaders pawl nih mipi ralrin pek an tlolhmi le WHO nih thawng an thanhmi zong an khampiak hna, tiah tuante in khan AP nih thawngthanhnak a tuah bal. Cu zong cu China nih a hmasa tein a karhlan ai palhnak a langhtertu a si. Cu an i palhnak vialte an vun i fonh tikah cun, January in Wuhan ah ai thokmi virus cu a karh ciammaam i, vawleipi a cuul dih hnu ah, minung 64 million a tlunh hna pinah, minung 1.5 million hrawng a thah cang hna.

China’s Center for Disease Control and Prevention nih test kit desigs le test kit phawtnak nawl cu a hleice in anmah officials pawl he pumpakin pehtlaihnak a ngeimi Shanghai company 3 lawng an pek hna, tiah report nih a langhter. Company he lungtlinnak an tuahmi cu thlithup (backdoor) in an tuahmi a si i, public health system phung tangah a thlitein an tuahmi a si, tiah doctor, CDC riantuantu, health experts le company chungbia a theitu telhin minung 40 interview an tuahmi siseh, cun AP nih a fawkkhomhmi chungbia keng capar a zaza in siseh, contracts an tuahmi, message an i kuatmi le emails siseh, cu vialte tehte chirhchan in Investigation nih a langhter.

Thawngthanhnak le test kit pawtnak nawl an pek hna ruangah The Shanghai companies — GeneoDx Biotech, Huirui Biotechnology, le BioGerm Medical Technology – nih the China CDC hi phaisa an pek hna, tiah cu ti phaisa an i peknak kong a theitu (min langhter bel a duh lo) nih a chim. Company pakhat cio nih an pekmi phaisa hi 1 million RMB ($146,600) a si. Phaisa mizei set sin a phak, timi belte theih lo a si.

A tu hi CDC le pa can ah ai ngeihmi National Health Commission nih hin a dang scientists le organizations pawl hi anmah tein an i sermi test kit hman a senh hna lo. Coronavirus avoihnihnak ai nolh hnu ah khin “nanmah le nan nawlngeihmi ning tein central labs ah virus samples kua u” tiin NHC nih Wuhan sizung a cah hna. Zeicahtiah cu hnu lawngah test hi thanchoter khawh ding khi a si hnga. Virus cases hliahnak dingah cucu khakha a herh, timi an tamtertuk ruangah le anmah Shanghai company 3 nih an sermi test kit lawng an uarhlei peng mi nih hin virus tawlrelnak hi a nawnnok dih.

Jan. 5 le 17 karlak i case thar pakhat te hmanh a um ti lo, tiin China nawlngeitu hna nih thawng an thanh. Angaingai ti ah cun, an data nih a langhter nih cang cu lio i a zawmi hi minung a zaza an si. Virus cases thawngpang a daihnak a ruang hi mipi sin ralrinpeknak, mipi a bu in i ton lo dingin le khuatlawn phih dingin officials pawl an khulvai a hnumtuk bia a si. Tuantein an tawphawh a zan ruangah vawlei pumpi cuul lo dingin virus hi an kham khawh lai le kham khawh lai lo hi cu ai fiang lo nain, a si ka tein hngephngap tiin nam colh hna sehlaw virus a karhnak hmual hi 86% tluk thawngin an kham khawh lai, ti cu a fiang ko, tiah study an tuahmi nih a langhter.

Company 3 nih test kit an sermi an phaak tikah cun, a tam u cu thitha in rian an tuan kho lo i, tlamtling in a phi a langhter kho lo na, lih in negative a piahpiak na, an si hna. Cu hnu cun technicians pawl nih test kit hman cu an zenh ve cang i, CDC zong nih a cohlanpiak hna lo hnu ceu in khin test kit cu an vun tharchuah than ceu khi a si.

Test kit cu a tlawm pinah ai palh le lek fawn i, Wuhan i mizaw 19 ah 1 hrawnglawng hi test tuah an si fawn i, Jan. 31 ah khan cu pakhat te lawng cu positive ah pom a si, tiah Imperial College London nih a langhter. Midang cu test tuah lo na, asiloah lih in negative piahpiak a si na, cu ti cun an inn lei ah an tlunter vuk hna i, an khua ah virus karhter ding vial lawng khi a si cang.

Cawngsaya Peng Yi, 39, cu Jan. 23 i khuh a vun i thok lawng ah khin Wuhan sizung panh in nazi 8 cung a vai tansi. A cuap pahnih ningah virus a um kha CT scan nih a langhter ko na khin, sizung um dingah test tuah a tong lo.

Jan. 30 ah test cu a vai tuah, asinain negative na si, ti a si. A taklinh daih lei a panh lo tikah, test tuah than dingin a chungkhar nih official pawl cu an nawl hna.

Feb. 4 ah avoihnihnak test ai tuah than i, cu tikah cun positive na si, ti a si. A tlaituk cang caah, zarhhnih thum a rauh hnu ah Peng cu a thi ruangmang.

“Test tuah hi a tlawmtuk, a um lo ngacha khi a si..Positive ka si, tiin nai namhneh khawh lo ah cun, sizung chung na lut kho lai lo. Zeihmanh kan tuah khawhmi a um ti lo, tiin doctor nih an ka ti,” tiah Oct. i interview an tuah lio ah Peng hringtu a nu Zhong Hanneng nih mithli he a chim.

Testing kongah China hi a min a lang huaha lo. Bianabiaah, Germany nih a sermi test kit han cu Jan. 12 i China nih virus a thlah hnu in WHO nih an i bochan taktak mi sui (gold) hriamnaam ah ai cang. Asinain, US belte ah cun WHO nih a hmanmi design cu CDC nih a hman a duh lo i, amah tein test kit ser ai zuam ve. Asinain, CDC nih a sermi cu ai palh i, China nak hmanh in a raudeuh lehlam.

A dang ram cu China nih a tonmi sinin fim an cawng i thiltha an chuahpi. China cu pulrai phun khat a thar in a tuar hoi. Zeibantuk pulrai dah a si i, test zeizat dah tuah a hau lai, timi bel theih khawh a si rih lo.

“Ai thokka te a si ko rih. China cozah nih a sining an hlathlai lio pi a si,” tiah University of Glasgow ah professor a si i, China cozah nih coronavirus an tawlrel ningcang a dothlattu Jane Duckett nih a chim.

China hi virus a hmu hmasabik ram a si caah, i ua-a le cawngor in an um mi nih hin faaktuk in a chiatchuah hna nak hi a si.

“Company 3 lawng test kits na phawtter hna caah hin test tuah a chamhbaunak hi a si. Test tuah tlolh mi nih caktukin case a karhter, mithi a tamter hi a si,” tiah Council on Foreign Relations ah global health ca i senior riantuanhawi Yangzhong Huang nih a chim.

Hi kongah China’s foreign ministry le China’s top medical agency a si mi the National Health Commission nih zeihmanh an chim rih lo.

“Thiltha kan tuah. Rian kan i zuam. Vanchiat rumro ah hi virus hi kan tong. Hihi a biapituk,” tiah July i video conference an tuah lio ah China CDC lubik Gao Fu nih a chim.

*****Century pakhat chungah a thawngbikmi virus ca i test kit tuah an fialmi company 3 hi industry lakah minngei an si hrimhrim lo. Wuhan-based company le bang cu retuai bang ruah lo in a vun tuai chommi khi a si. A chacha lo ah, a company inn le lo cu virus an hmuh hmasatnak bik ah a ummi an si fawn rih.

“Kan khuaruah lawng a har ko. Thil um bal lo khi a si. Hi company pawl hi a theih kan theih balmi a si lo. Ruahpak lo pi khin, ‘khah nan hman dingmi test kits cu company an vun in kuat cang hna hih. Midang sermi cu nan hmang lai lo,’ ti a vun si ko,” tiah min langhter a duh lo mi engineer pakhat nih a chim.

A liamcia kum 3 lio ah khan conference room pakhat ah BioGerm an dirh i, an CEO nih test kits caah zeitin dah a hmemi le mi an tamnak market ah hin chaw kan lehthal khawh lai, tiin a rak chim bal. GeneoDx ah hin riantuantu 100 nak tlawm lawng an um. A dang amah he ai zuammi company pawl ah chin cun riantuantu zatammpi asiloah a thong tian in an um, tiah Chinese corporate records database Tianyancha nih a langhter.

Hi company 3 hi resources siseh, experience siseh a ngei lo mi an si. Cozah official he pehtlaihnak an tuah khawh dingin lam an sial sawhsawh bia a si.

The Associated Press kut a phanmi chungbia keng email le capar a zaza telhchih in, company catarmi pawl zoh tikah Beining le Shanghai ah a ummi China CDC researchers le hi company 3 karlak ah pehtlaihnak faakpi in a um, ti a lang. Company 3 an credit report la kho dingin AP nih thazaang a chuahmi cu Chinese regulators pawl nih an khampiak i, ‘hi credit report pawl hi cu pulrai a karh lio chungah hin cun confidential ah kan chiahpiak mi hna an si,’ tiin an chimpiak diam hna.

Public health remhsiamnak dingah Chinanak kum tiampi chung thazaang an chuahmi le, a thawngmi markletplace, siiai company he cak chinchin in riantuan thok an i timhmi vialte cu China officials pawl an pumpaak miaknak caah nontoihtu men an si, tiah a dang ai zuammi company in executive minung 7 nih an chim. President Xi cozah chan ah hin China hi eihmuarnak chungah a pil chinchin cang. Asinain, China health system chung i mipi le private karlak i a fekmi ramri a um lo mi nih hin thanchonak caah cantha a serchuah khawmi a si ko rih, tiah industry chungbia a theitu pawl nih an chim.

China CDC le test kit a sertu company 3 karlak hnatlaknak tuahmi nih China law a buar le buar lo theih fian a si rih lo.

“Ziknawhnak kong a chimtu law an buar hrimhrim lai. Nawlngeihnak an buar, pumpak caah cozah he ai pehtlaimi deal an tuah, pumpak duhnak tuah lo dingmi nawl an buar theu lai, tiin biahalnak a um. Pulrai a tlun lio a va si pek ah, hi company 3 nih CDC lei phasa a langhtermi hi solhphelh awk a tha lo mi a si,” tiah China i American Chamber of Commerce ah chairman hlun le Beijing-based corporate attorney James Zimmerman nih a chim.

Zeibantuk phaisa kuatnak hmanh hi record tuah le capar in fim a si hrimhrim lai, tiah ziknawh kong i China law nih a langhter. CDC le company 3 hna kar i deal an tuahmi hi capar in tlen a si le si lo kongah AP zong biafiang a thei kho rih lo. Hi kongah record tuahmi a um lo, tiah CDC riantuantu pakhat belte nih a chim.

Ziknawh kongah biahalnak a um len ko nain, faktukin kokek hartonnak a tlun lio caan i lakhruakin cozah nih midang rian a fial hna tikah special law ai hman tawn. Cucaah, tutan i company 3 rian a pekmi hna zong hi cu special law ningin cozah nih a tuah le a si theu lai, tiah expert pawl nih an chim. Ram chung minung le inn le lo kilvennak dingah hin, test kit telhchih in, emergency response technologies i hmaithlak dingin China cozah nih hin ramchung company pawl hi biatak tein rian a hneek tawn hna.

“Har ton lio ah hin cun thil sining hi ai dang tawn. Kan ram nih kan sunghsakmi a hnuarsuangtu thil a tlun caan paoh ah hin cun a herh ningin special phung hi ser khawh a si. Cucaah, kei cu hnawhman in an kong ka ceih lai lo,” tiah eihmuarinak a ralchanhtu law ai hmaithlaitu Beijing-based attorney Lesli Ligorner nih a chim.

A um bal thenglo mi hi virus a sining hliah khawhnak ding i a herhmi testing chamicals kan chiah i, cu chemicals humzual rian hi China CDC nih tuanvo kan lakmi a si, tiah CDC guidelines nih a chim. Asinain, zeitin dah kan serchuah ning a si lai, timi belte cu fiangin a chim lo. A dang emergency in an sermi thil pawl hi cu zapi theih in langhter an si tawn nain, CDC nih an sermi test kit kong hi record ah a lang lo, tiah AP nih a chim.

China CDC fund an pekmi hi nai kum hrawng khan cun a tumchuk ngai cang i, research a tuahtu pawl hi private sector i rian a tlaimi hna nakin an hlawh zong a niam deuhdeuh cang. A liamcia kum 10 hrawng khan cun CDC riantuantu tampi cu private sector rian lei ah an i mer hna.

CDC a chuahtaktu lakah hin BioGerm a dirhtu Zhao Baihui ai tel ve i, anih hi Shanghai CDC microbiology lab ah chief techinican hlun a si. CDC a tuan lio tein khan, 2012 laifang hrawngah khan Zhao nih BioGerm company cu a dirh hmasa cang, tiah AP kut a phanmi emails le chawva record nih a langhter. Kum 5 hnu ah khin, dollar thong tamial man test kits cu amah a riantuannak lila a zorh hna i, a cawtu lak zongah amah lila ai tel ve, tiah AP kut a phanmi record nih an langhter.

2017 i CDC a chuahtak hnu in, cozah officials pawl he phaisa tom luhchuahnak contract a tlai than – a vapa a tuannak Shanghai customs officals he $60,000 man rian a tlai. Cu hnu cun, Shanghai’s Pudong district i CDC officials pawl he $8,400 man rian a tlai fawn. Cu kong cu phone le email in in an hei hal nain a let duh hna lo.

Company 3 lakah pakhat a si mi GeneoDx hi cozah he pehtlaihnak tha taktak ai ngeih, zeicahtiah hi company hi China’s cabinet nih direct in an manage mi state-run company SinoPharm i a tengnge pakhat a si. GeneoDx nih cun tor le cheng in test kit cu ram chungah a kuat i, amah a serchuahmi thanchoter tim leh lam lo in, a business kauter chinchin awkah ramdang technology tu heh tiah a fawkkhomh, tiah a riantuannak kong a theitu China CDC riantuantu pakhat le company posts mi hmangin theih a si.

Shanghai ah a tlungmi pulrai kongah, 2019 Oct. ah khan GeneoDx nih CDC traning conference an tuah. Training a hruaitu CDC official Tan Wenjie cu nehhnu ah test kit sernak rian kutritu dingah rian pek a si colh, tiah AP kut a phanmi chungbia an tialnak capar nih a langhter. November ah khan, Tan’s institude sinin $137,000 man test kits a zuar.

Comment asiloah interview tuah dingin an sawm nain GeneoDx nih a let duh hna lo. Tan he interview tuah dingin NHC zong nih a let duh hna lo.

GioGerm i sawmmi te lawng kai mi meeting ah siseh, cun an sermi cawngia dingah a dang company nih conference an tuahmi zongah cun, cozah le private sector karlak an i pehtlaihnak a fekfuan lo ngai, ti a lang. WeChat ah BioGerm group join tuah dingin China CDC staff pawl sawm an si. WeChat hi Chinese message application a si i, nehhnu zongah an CEO sinah Zhao zong nih a test kit zorh bal, tiah CDC riantuantu le AP nih a hmuhmi screenshot nih an langhter.

A pathumnak company hi Huirui, ti a si i, test kits kongah tuanvo a ngei mi CDC offial Tan he cansaupi ai theihngal cangmi an si. 2012 lio tein khan coronavirus test kongah Tan he Huirui an founder Li Hui hi cauk an rak chuah bal. Cun 2015 lio i MERS ca i test kit zong kha Tan’s institude he cun hmunkhat te ah an rak ser bal.

Emergency testing chemicals ser dingin ka company hi CDC nih a ka fial pah lengmang, tiah interview lio ah CEO Li nih a chim. CDC designs ning tein coronavirus caah testing chemicals serpiak dingin Jan. 4 le 5 ah khan China CDC i Tan’s lab nih an ka chonh, tiah a chim. Tan he pumpak in pehtlaihnak nan ngei maw, CDC ah pekmi na ngei maw, tiin bia an hal nain a let hna lo.

“Pulrai thar a tlun mi tawlrel dingin CDC he rian kan tuanti nak caan hi ni hnih khat men a si lo, kum hra hrawng a si cang. Punghman thil a si cang,” tiah Li nih a chim.

Theih sitsai lo mi Company hmetete 3 he pehtlaihnak an tuah mi kong a linhsatbi caan cu Januarh ah khan a si. Cu lio caan i a thehfian rih lo mi pulrai nih China siseh, vawlei pumpi cuul dih in an dirhmun viatle thlenpiak dih a timh hna lio caan a si.

Catialtu: Chelsea Bawi