Chin Ram Chung Covid-19 In A Zawmi Hna Kum 6 Hngakchia Le Hringtu A Nu Dirhmun An Hun Langhter Than

Chin ramkulh Tidim khuapi chung siizung ah a um mi hna Covid-19 mizaw nufa hna pahnih cu nihin tiang ah cun zeihmanh thinphan ding a um lo tiin Tidim sizung uk a si mi Dr. Zaw Myint Nain nih cun a chim.

Hi kong he pehtlai in Dr. Zaw Myint Nain nih a chim mi cu “Hi nufa hna dirhmun hi felfai tein kan zoh lengmang ko hna i nihin tiang ah cun an sining hi zeihmanh thinphan ding a um lo. Cun a fapa kum 6 hngakchia te zong hi a ngandam nak hi a hlankel bantuk in a si.

Cun an sining hi thinphang deuh a si ko tiah kan ruah a si ah cun Tidim sizung ah si loin hmundang a that deuh nak ah kan thial hna lai” tiah a chim hi a si. Hi hna nufa hi June 19 ah khan India ram in a rak kir mi an si i Chin ramchung Tonzaang pengkulh Hai Cin khua ah Facility Quarantine an chiah mi hna an si.

Cun Facility Quarantine an um hnu July 9 ah khan a fapa kum 6 cu Covid-19 positive a si khan an hngalh i cu hnu July 19 ah khan hringtu a nu Kum 54 zong positive a si ve tiah an hngalh kha a si.

Chin ram chung ah hin Covid-19 positive hi minung 12 hmuh an si ve cangĀ  minung 10 cu dam tein an chuak dih cang hna. Atang mi nufa hna pahnih zong hi a rauhhlan ah an dam ve ko lai tiah ruahchan nak a um ko.

Source: Chin World

 179 total views,  1 views today

This function has been disabled for Chin 11 News.