Chin Ram Cheukhat Cu Ei Awk Rawl An Ngeih Tilo Caah Ralkap Sakhan Ah Rawl An Hal Hna

Chin ramkulh Paletwa pengkulh chung I Miza khua ah a um mi hna Pyi Taung ralzam pawl hna cu ei awk rawl an ngeih tilo caah tuzing suimilam 11 ah khan ralkap sakhan ah rawl va hal ding in an kal hna.

“Tuzing suimilam 11 ah khan minung 12 hna cu ralkap sakhan ah rawl hal ding in kan kal hna nain facang an ngeih ve lo caah thaizing ah rak ra than te uh tiah an kan ti. Cun lamdang kawl in India ramchung ah rawl va phir ding in kan chimh ko hna nain ralkap nih nawl an kan pe lo” tiah rawl hal ah a kal ve mi pakhat nih cun a chim.

A tulio I kan ei mi hi kan hnu deuh lio ah an kan bawmh nak mi facang le changreu pawl kan cawh I nunnak menmen in kan ei mi lawng a si ko. Miza khuachung ah rawl a um hrim ti lo tiah zong a chim chap.

Miza khuabawi U Hoih Law nih a chim mi cu “Paletwa lei zong in facang pakhat hmanh a rak lut lo, India ram lei zong in a lut lo, khuachung ah le zeihmanh cawk ding a um ti lo, facang tun khat ah tingkhat zong in cawk ding hmuh khawh a si ti lo” tiah a chim ve.

Tatmadaw le AA I kahdoh nak ruang ah mawtaw le tilawng lam vialte phihkhar dih a si hnu cun Paletwa pengkulh chung ah a um mi hna cu ei-din ding ti le rawl an har chin lengmang hna I facang a chia ngai mi pawl hmanh tunkhat ah tingkhat in cawk ding an I hmuh kho ti lo.

Source: The Chin Journal

 196 total views,  1 views today

This function has been disabled for Chin 11 News.