Chin PASAL TTHA Panga Nan Hmuh Hna Ahcun! Lung A Fak Tuk Ee!

Hakha hmunkip ah kawl ralhrang le palik nih an hmanthlak an vun tar mi panga hi kan caah PASAL TTHA an si. Nan hmuh hna nak poh ah an ti ahal ah cun ti rak dinh hna u, an rawl a ttam ah cun rawl thawbik nan neih mi rak pe hna uh. An mit a kuh ah cuh na ihphah le puan tthabik kha rak phah piak hna uh.

Anmah bantuk Nusal ttha le Pasal ttha tamtuk an hung chuah thlauhmah rih lai. Chin miphun hi kan van a ttha tuk. (5 Gentlemen from Hakha in Pictures posted by MAH terrorists are our HEROES) Credit: Salai Bawi Lian Mang

Relchih ding: March 12 ah Hakha Sii-innpi cu ralkap le palek nih an luh hnawh hna i an thawl hna ca ah sii-inn ah thlop lio mi mizaw zual 30 le sii-inn riantuantu 315 nih sii-inn an chuah taak tiah kan theih. Ralkap Council nih CDM a tuah mi Hakha Sii-inn riantuantu hna cu rian ah maw nan luh lai CDM dah nan tuah rih lai? CDM nan tuah ahcun quarter in chuak uh tiah an thawl hna. Ralkap 20 hrawng le palek 30 fai nih an luh hnawh hna i atu bantuk in an thawl hna hi a si.

Hi kong he pehtlai in Hakha Sii-inn Uk Dr. Mang Biak Kung nih, “Tuchun (12.3.2021) ni ah Hakha sii-inn cu mi thalo hna nih an kan luh hnawh. Sii-inn ah thlopbul cuahmah mi mizaw zualhma 30 le sii-inn riantuantu 315, inndawng 115 nih kan chuah taak. A kan fimtawltu Hakha mino le mizapi cung ah lunglawmhnak tampi kan ngei,” ti in a Facebook cahmai ah a tial.

Sii-inn quarter in aa thial mi riantuantu hna cu Hakha sang kip mino nih thil thiar an bawmh hna. Cun, motor ngei hna zong nih manlo in an phorhpiak hna. Hakha sii-inn cu ralkap sii-inn a si lo, mizapi sii-inn a si ca ah a rauh hlan ah mizapi kut chung ah chiah than khawh kan i zuam hna lai, ti zong Dr. Mang Biak Kung nih a tialchih.

Sii-inn a luh hnawhtu ralkap le palek cu zaanlei suimilaam 6:00 hrawng ah an kir nain sii-inn ah ralkap tlawmpal cu an taang rih. Zei maw zat ralkap le palek an kir cangka in sii-inn kutka cu mino nih tawh an hrenh tiah kan theih. Hakha Sii-inn lawng siloin Chin Ramkulh chung ah Falam le Tedim sii-inn zong atu bantuk in palek le ralkap nih luh hnawh in an thialter hna tiah kan theih. Credit: The Hakha Post