Chin Miphun Nih Kan “Covo” Lak Khawh Dingah NLD Tanh Usih

Kan “Covo” lak khawh dingah NLD tanh usih.

(3.10.2020)

A bikin mah tein khuakhan-lairelnak timi (self determination) hmuh ding hi tlangcung hriamtlaih pohpoh an hmuichon/kawl a si. Chin ‘Covo’ lak khawh dingah CNF nih 1988 in nihin tiang a zuam cuahmah ve.

2008 phunghrampi ruangah CNF ‘tinhmi’ cu ralkap nih pakhat hmanh a pek duh lo. A min in Peace Talk (ၿငိမ္းခ်မ္းေရး စကားဝိုင္း) an ti i meeting cu ralkap nih a tuahpi lengmang ko nain biatak tein ruahpiak a timh hna lo. Vawleipi hmuhnak ah Peace kong an ceih lengmang ko, ni khatkhat cu Kawlram hi daihnak a um te lai tiin zumh hna seh tiah meeting cu a tuahpi lengmang ko. A neknuai (petty) tehna cu a pek ko hna nain a biapimi pawl cu pakhat hmanh pek a timh hna lo.

Chin minung tampi ruahnak ah Peace Conference an tuah tikah hin tlangcungmi duhmi pek le pek lo hi Daw Su nawl a si rua an ti.  Tlangcungmi le Daw Su dirhmun hi a khat rih ko.

2008 phunghrampi ah a tel lomi kong vialte ralkap kut ah a um dih. Ralkap aiawhtu nih ‘Yes’ a ti le a dih ko, ‘No’ a ti zong a dih ve ko. Aho nih “Yes” ti ko ti khawh a si lo. Daw Su nih kan duhmi a kan pek duh lo caah Chin party min in kan cawlcang lai timi hi thil sining hngalh lo ruangah a si. Federal democracy e, cu e, timi hi 2008 phunghrampi pinlei in chim ding lawng a si.

Thimnak ah teinak hmuh zongah chuakpi khawh a si lomi bia a si. CNF hi kum (32) tiang a nung khawh ko, a um rih ko lai. CNLD hi thimnak ah teinak hmuh loin kum (30) a um kho lai lo, teinak hmuh lawngah saudeuh dirh khawh a si lai.

2008 phunghrampi a um hlan ah cun duhmi hal khawh cio a si. Hmuhnak lam zong a um kho men lai nain hi phunghrampi ruangah zeihmanh ngahnak lam a um ti lo.

CNF nih kum (32) tiang a rau cang nain atu tiang a hmuh khawh lonak hi amah santlailo ruangah a si lo, hi phunghrampi ruangah lam a pit dihnak a si. Tlangcungmi dang zong cu thiamthiam an si ve.

CNF hmanh kan ‘Covo’ lak duh ruangah kum (32)  tiang ram tangah rethei le sifak a tuar i leidip cungah it le ei dirhmun ah a um rih. Cu lakah 2018 in dirhmi kum (2) te lawng a si rihmi CNLD nih kan ‘Covo’ lak dingah kannih hi kan tanhpi cio u tiah ‘Slogan’ a vun chuakpi tikah politics sining a hngalh lomi ngakchia tampi caah cun si tak, miphun tanh ding a si an ti i, CNLD, CNLD tiah an aukhuang cio ve. Politics cu ramri um lo, duhmi poh tanh khawh a si ko.Tanhmi belte sullam ngeimi party ah tanh lawngah thathnemmi tanhnak a si lai.

Tlangcungmi duhmi le herhmi ‘Covo’ lak khawh lo dingin a kan khamtu hi 2008 phunghrampi hi a si. Hi phunghrampi a rawkral lo dingah a zohkhentu le a dirkamtu hi Ralbawizik thlahmi ralkap kozale (166) le USDP in teinak a hmuhmi Hluttaw Kazale pawl an si. A lenglei in Ralbawizik nih a dirkam peng hna.

Hi 2008 phunghrampi ruangah zeihmanh cawlcang kho lomi dirhmun in nihin dirhmun a kan phaktertu hi Daw Su a si. Daw Su hi um hlah sehlaw Kawlram hi a tlaunak a sau tuk cang lai tiah Kachin ralbawi Bochoh Kunmaw zong a chin vemi kha carelmi pohpoh hmuh a si.

2008 phunghrampi ruangah zeihmanh cawlcang kho lomi thil sining a fiangmi upa vialte atu hi cu miphun min in zeihmanh tuah khawh ding a um lo an ti cio bantukin Dr. Lianghmung Sakhong, Dr. Suikhar, Pu Zotum Hmung le Bochoh Kunmaw pawl zong nih kanmah tlangcungmi lawng nih ‘Covo’ hi kan lak kho lai lo, NLD he komh in 2008 phunghrampi hi remh or a thar ser khawh lawngah  “Covo” hi hmuh khawh ding a si tiah fiang tein an chim ve cang. NLD tel loin Tlangcungmi “Covo” hmuhnak lam a um lo, Kum (2) fa CNLD chinchin nih ‘Covo’ a lak khawhnak lam cu a um lomi “Thli ah Tlakrawk Inn sak” bantuk a si ko.

Ralkap uknak in luatnak hmuh hmasa a herh caah Luatnak a kan kawlpiak khotu Daw Su le a party NLD hi tanh rih usih. Phunghrampi tlingmi, Ralkap uknak in luatnak kan hmuh cang hnu cun kan duhmi miphun le tanh kan duhmi party ah hnangam tein tanh le dirpi cio ding si ko.

Tlangcungmi lawng nih kan lak khawh lomi Covo hi Daw Su he lak khawh dingah NLD hi tanh cio usih.

Catialtu: Laiki Chozah