Chin Miphun Ni Thawhkehnak Le Tuanbia

Chin Miphun Hna Chinram Kan Rak Luhning: Chin Miphun cu Professor G.H Luice nih Hukawng tlang fiang hrawng an phak hi AD 400 ah asi tiah a tial.Dr.F.K Lehman nih (The Structure of Chin Society timi cauk a tialnak ah Chin Miphun hna Kawlram an phak cu AD 750 hrawngah asi a ti.AD 300 hrawngah hin Tibet ram ah saunawn an um hnu AD 400 hrawngah chuahtak in AD 750 ah Puta-U chaklei Kachin ram in an rak lut tinak asi ati.

Kalaymyo,Khrihfa Nubu (Women Fellowship Golden Jubilee)Megazin tial ningin Chin Miphun Kalaymyo an phak cu AD 900 ah asi.(AD 1374) thawk in Governor a tuan mi Kyi Taung Ngyo nih Chin Miphun cu a hrem tuk caah Chin zmiphun hna cu tlangpar lei ah thek hram an rak i thawk.Falam Peng Simpi Khua,Tawk Khua cu AD 1390 ah an vun pha.Kawlral an tih caah an chuahtak than i Zotlang an phak hi AD 1400 hrawng asi.Lungzarh khua le Phailenzawl tibantuk an hun tlak hi AD 1450 hrawng ti asi.Cuticun Laitlang an cun phan.

Chin Miphun Cu Kawl Uknak Tangah Kan Um Bal lo: 1885 ah Mirang nih Kawlram adihlak in an vun tei i Chimram cu 1892 ah a vun lak ve.1895 cun tha tein an vun uk khawh cang hna.Mirang nih an dohhlat cikcek hnu ah “Chin Hills Regulation” ti mi uknak Upadi a tuah i Kawl le India he fonh loin a dang tein a rak uk hna.

British Cozah nih Chin Miphun hna cu 1896 kum ah (1896 Chin Hills Regulations) in siseh,Kachin Miphun hna cu 1895 kum ah (1895 Kachin Hill-Tribes Regulations) in siseh,Shan miphun hna cu (1922 Federated Shan States Act) in siseh, Rawn um Burma (Burma proper) hna cu (1935 Burma Act) in siseh a dangdang tein uk mi kan rak si hna.Hi hmun (4) hna hi British cozah nih a uk hna hlan ahcun amah tein ai uk mi an rak si hna.A dang tein ai rak uk mi kha zalawnnak (Independent) kan hmuh hnu in Panglong hnathlaknak minthut ruangah ram pumpi pakhat ah ai rak cang mi asi i Union Of Burma dirh tti dingin (Feb 12,1947)Panglong minthutnak hi rak um hlahsehlaw Pyithawngsuh ti mi zong hi a um ve hnga lo.Min an thutnak a ruang pathum a um.

1.Miphun sinak ah i tlukruannak. 2.Mah tein duhmi chimrel khawhnak .3. Mah tein uknak awlngeihkhawhnak hna cu lungtlinnak a rak um caah si.Cuticun Jan 04,1948 ah Independence cu Kawl he hmunkhat kan vun hmu tti hna. Falam Conference :Falam Conference cu February /19-22/1948 tiang Falam khua ah rak tuah mi (Chin National Conference) a voikhatnak Chin Special Division (Chin Tlangkulh Meeting) ah a bik in rak ceih mi cu Zeitindah kan Chin ram hi hmailei ah kan hruai lai timi kong asi.Culak ah a biapi in ceihkhan mi hna cu;

(1).Ngandamnak(Health) (2).Fim cawnnak(Education) (3).Pehtlaihnak le (Tranpotation) (4).Ramukbawi uknak hloh in Democracy uknak in ukding kong hna hi an si hna.Ramukbawi uknak hlohin Democracy phunglam in uknak ding No.4nak cu Feb-20 ni ah ceih a rak si.Mah hi lio Conference ah Chinram hmun kip in minung 5000 reng lo an rak kai. Ramukbawi uknak hrawh i zaukphung uknak hman dingin Tidim Myone in U Thawng Za Khai nih biatung a rak dirh, Falam Myone in U Tum Mang le Kanpalet Myone in U Thang Pawng nih an thohkhan. Duh lotu Mee (17) long an rak si.Dohnak a pel te hmanh um loin kan Chinram cu Democracy uknak phungin uk dingah hnathlaknak an rak ngei.Phundang in chim ahcun kan Chinram te cu Bawi chung le Zatlang nih lungkhat thinkhat tein Democracy ramah an tunmer ni a rak si.

Ramuk Bawi Hna nih Lungtling tein Democracy Uknak An Cohlan mi a langhnak:Chin Affairs council hruaitu Chin Affairs Minister thimnak ah Bawi lei ttang Pu Vum Ko Hau le zatlang lei ttang Vom Tu Mawng pa hnih mee an rak i cuh. Cu lio ah hin Haka peng Ukbawi vialte nih an ai aiawh in an thimmi asi ruang ah Panglong minthu mi Pu Kio Mang hi Haka ukbawi in Haka peng MP asi. Cu ruang ah 1947 Kawlrambupi uknak phunghram a ttialtu hna ram bupi phunghram a ttialmi ram hruaitu chungah arak i tel ve mi pa asi.Amah zong nih Zatlang lei tang Pu Vomtu Mawng cu Vote a rak pek.Ramuk Bawi asi nain uknak thlen hnu ah MP zong a tuan chih i Ramukbawi rak si ruangah MP tuan cu ati i MP rian cu a rak chiah.Mi dingfel tak asi a lang.Cuticun Bawifa Pu Za Hre Lian te hna zong hi cuticun MP ah an rak thimnak hna cu asi.

A ngaite ahcun Halkha MP tthing hna vialte hi hlanchan ruahnak in kan ttial hna ahcun Bawichung hrinthlak ti aa ruatmi longte an rak si. Pu Ralhmung Nguntual bawichung, Pu Hrang Mang amah hrim hi TT.Farawn Cenhrang ukbawi, Pu Ro Thang Hlawnching bawi, Pu Hrang Nawl apa lei ah Zathang hrihhruai bawi, anu lei in Hripi bawihrin thlak, Pu MangTling Cinzah bawi, Paw Khuaming Tingsi bawi chung ti ban tuk in an si dih ko hna. Asina in roco in Bawichungnih ichanh mi uknakphung nakcun mipi thimmi hruaitu hna nih uknakphung cu an I-thim deuh dih.Buainak pelte hmanh tuah loin Mipi duhnak Democracy uknak cu an rak dirh khawh.Ramuk Bawi uknak hi Chan a dawi lo mi uknak asi ti an hngalh tuk ve caah Democracy uknak cu Kaphnih ,Zapi hnathlaknak in rak i thim mi asi.

Chin Miphun Ni Aa Thawknak: Kawlram bupi chung ah i uk ttinak phunghram kan vun tuah tikah milu tam deuh miphundang nih kan nunphung kan holh te hna kha an kan chilh khawh mi asi ti kha Chin Affairs Council hruaitu hmasa hna ah Pu Vomtu Mawng (Minister of Chin Affairs Ministry), Pu MangTtung Nung Parliamentary Secretary of Chin Affairs Ministry, le Pu Lian Tthum (Chairman or speaker) of Chin Affairs Council a rak si mi hna nih fiang tuk in an rak hmuh chung khawh caah kan miphun himnak hnga Miphun Pi Ni cu ngaih dingin an rak tuak cang.

Cucaah Chin affairs Council avoi (7) nak 1950 October, 9 ni ah Chin Miphun Ni ( Chin National Day) cu kum fatin February ni (20) ah tuah dingin Kanpalet Myone MP Vomtu Mawng nih Miphun pakhat kan si ve caah ‘Miphun Ni’ kan ngeih a herh ko tiah biatung a dirh i, lungtlinnak a um caah hnatlaknak an ngei. Zei ni dah aa tlak bik lai tiah an thim i kan Chin miphun ni caah ai tlak deuhmi nithum an rak thim hmasa;

1.Chinmi hruaitu le Frontier Areas Committee of Enquiry an rak i ton ni April 19,1947;1 Chin Special Division Act a rak nun ni Oct12,1948;2 Ramuk bawi phung uknak hloh in democracy phung kan rak i thim ni Feb 20,1948 ni hna hi an si hna.

Feb 20 ,1948 kum charhchan in Miphun ni cu tuah dingin Chin Affair Council nih rak fehter mi asi.Mahbalte Ramuk bawi hna uknak hloh in Democracy uknak an rak ser ni theng a si ruangah si loin Kan Chin Miphun tuanbia hi kan zohthan tikah February thla cu kan Miphun hna ramkhel lei cawlcangh thla hrim a rak si ruangah asi.

1.Feb 20, 1918 kum ah Chin Miphun hna fimcawnnak leiah thanchoternak ( 20 Feb 1918 – ခ်င္းအမ်ိဳးသားပညာေရးျမင္ွ႔တင္ေရးအဖြဲ႕)ti mi a rak chuak. Feb 20 ,1928 kum zongah Politics lei hruainak ah a lu bik tiah ruah mi tlangcung mi hna lungrualnak (ခ်င္းေတာင္ ညီၫြတ္ေရး အဖဲြ႕) zong an rak dirh.Cutin an van ser khawh hnuhah March 24-25, 1933 kum ah Chin miphun he aa pehtlai mi vialte huap dingin Chintawng Lungrualnak ti mi cu Chin miphun hna lungrualnak(ခ်င္း အမ်ိဳးသား ညီၫြတ္ေရး အဖဲြ႕ )tiin an rak thlen.

3.Feb20,1938 Kanpalet khua ah mipi thongthum leng nih duhlonak an langter ni thla a rak si. Avoi (1)nak bik”Chin Miphun Ni” cu 1951 kum (Mindat) khua ah tuah a si i cu lio ahcun rampi Vuancichoh Prime Minister U Nu zong a rak kai kho ve.Rangoon khuapi i an rak tuah lio 1959 kum zongah rampi President Soa Shwe Thaik nih a rak telpi hna.Cu long siloin ambassador hna zong an rak kai ve.Cu nih a langhter mi cu Chin Miphun Ni ti mi hi Cozah nih pawm mi asi tiah ruah khawh asi.

Biatlang Komh:Cuticun kan tuanbia zoh tikah Chin Miphun hna hi kanmah tein Lai a rel mi miphun, kanmah tein kan tuanbia aa tial mi miphun,Mahlemah aa zum mi miphun kan si.Hmanhsehlaw Ramkomh dirhmun in kan vun dir tikah Chin miphun hna nih miphun kong kan cawlcanghnak a duh lo mi Kawl pawl nih Parliament chan 1956-58 tiang Chin Miphun Ni cu hrawh dingah hramhram in an hun i zuam.Tawhlanzi Council a van kai i U Newin nih cozah a van ting tikah Mahsalah chan in Chin Miphun Ni cu tuah ti lo dingin an kan chuh i Chin State Day ti tuin tuah dingah hramhram in an kan hun nawr.Na-O-Tah Ralkap chan ahcun Chin State Day ti hmanhin tuahternak nawl an kan pe ti lo i Chin Miphun hna nih mahle si khawh ning cio in miphun ni cu tuah a rak si.CNF kan Pale thawngin Chin Miphun Ni cu 2012 kum thawk in nihin ni tiang kan Chinram ah zalawng tein kan vun tuah kho cang.

Sep 24, 1948 (ဖဲြ႕စည္း အုပ္ခ်ဳပ္ပံု အေျခခံ ဥပေဒ)ningin Special Devision) ti a rak si.Chin Pengkulh Ni(ခ်င္ျပည္နယ္ေန႔-Chin State Day) ti mi zong cu Jan 3,1974 (ဖဲြ႕စည္းပုံ အေျခခံ ဥပေဒ) ningin cozah nih hmanter mi asi.Miphun dang hna nih serpiak mi ni asi.Chin Miphun ni Feb 20 cu Chin miphun Pupa hna nih tuanbia an kan ser piak mi ni sunglawi ni asi .Cucaah Chin Miphun ni cu Chinram (Chin State)chung longah a um mi he long pehtlai loin Chin miphun dihlak he aa pehtlai mi asi.Cucaah Chin Miphun Ni cu kan Chin Miphun hmelchunnak (Identity) a langhtertu asi bantuk vawlei cung khua za ramkip um Chin Miphun hna nih kilven cio dingah tuanvo kan ngei.

By: Al Bik Lian Zathang

 

 186 total views,  1 views today

This function has been disabled for Chin 11 News.