2021 June 4 in rian herh ah khual ka tlawng. Khi India ramri in ka tlawng i Thantlang Peng Khuahring Tlang, Tlangkhua khua ah zaan khat ka riak. A thaizing June 5 ah kan khuallam kan peh than…
Tlangkhua kan phak zaan ah ka naupa Salai Phun Sang nih, “Ka upa…ka dawt nan umnak ah ka power bank ka philh i na rat tik ah ka put te. Cun, nangmah zong kan ngai tuk… rak tlung cang… na rawl chuanmi ei ka haw tuk,” a ka ti.
Cun, ka kawipa Salai Lai Kulh Thang nih cu zaan thiamthiam ah, “Kawi nan rak pha deeng ma. Kei na umnak ahkhan ka um cang. Rak tlung zokzok uh…atu hi kei minung… lio a si. Rak tlung zok ko uh. Kan ngai bak hna hih,”a ka ti ve.
– Cu ticun ka um i zaan kan i hngilh. A thaizing June 5 kan pha. Ka naupa Salai Phun Sang nih, “Ka dawt tuni cu ka hawile kan ngai tuk hna… ka Uu Par sin ah ka sam kaa va riam lai,” a ka ti. Aw vaa riam… na sam sau tuk cang ka hei ti chap rih.
-Khuallam ah ka si thiam rih ko… ruah a sur thli a hrang, minmei a zaam. Ruah a vun haan… khual ahcun zaanriah ei kan i zaal cuahmah… cu lio ahcun phone a ra, “Kawi… na naupa Phun Sang nunnak a liam thawng na thei maw” an ka ti. Ka zum lo… ka chawnh dih hna.
Ka zum hlei lo… ka chawnh than hna… ka tap… a ti awk a tha lo… kan khuallam cu kan peh… khua pakhat ka phak ah kawi…”Na kawipa Lai Kulh a thi,” an ka ti than… ka vawlei a pit.
Phun Sang nih a ka timi cu, “Upa… ka dawt… rian na ka sokpi ka ngah. Zeihmanh kan cawkpiak kho rih lo ka ngaithiam,” a ka tichap. Lai Kulh nih, “Kawi… kei cu nan sin rat ka duhnak a sau cang nain ka sang minung pawl funtom an hau ta rih,” a ka ti ve.
An lungduh te hmanh in rian an tuan kho rih lo. An lungduh tein an tuan kho hrimhrim rih lomu. Ram caah nunnak pek hrim an tih lo. Kan umti hna nak hmun ka pha than… nan muithlam lawng a cuang ko mu… ka kawile
Nan zuun in zei can kodah kan rak tuar lai… Nan phu kan rak hlam hrimhrim fawn lai… Hmailei a taang rihmi kan caan ah nan rauthla in rak kan telpi hram uh. Nan tuan hawile nih upat kan in pek hna! Credit; Salai Muivanlai
Leave a Reply