Ceituk Hna Seh! Ukrain Ralkap Rual Nih Russdia Ralkap Tam Taktak An Thah Hna Pinah An Tank 3 Zong An Hrawh Chih

Ukraine nih Russia Ralkap 54 a Thah hna, Tank 3 a Hrawhpiak Hna
=================================================
Ukraine in chaklei i Russia hriamnam chiahnak inn cu Saturday zan ah khan kan Ukraine ralkap nih an kahpiak hna i, Russia ralkap 54 an thah pinah, an tank 3 zong an hrawhpiak hna, tiah Ukraine cozah nih a chim.

Russia tank T-62 pathum le, Grad MRLS pathum le, Msta-B howitzer pakhat le a dang hriamnam bunh mawtaw kan kah hna, tiah Ukraine Operational Command “South” nih the Kyiv Independent ah an chim.
Russia-Ukraine ral ni 150 a tlinnak ni ah a tu bantukin kahdohnak an tuah hi a si. A tu hi Kherson pengkulh zongah Ukraine ralkap hma an sawt ngai, tiah theih a si.

“Kherson pengkulh ah Russia pawl hmunhma lak heh tiah an i timh caah lihfangfak in heh tiah biadiklo an thlah. Cu thawng diklo an thlahmi nih cun zeitindah a bomhchanh hna? A bawichan hna lo. Kanmah Ukraine lehlam nih hma an nawr deuh, tiah Zelensky nih a chim.
Russia nih Odesa a kah ruangah, a tu bantuk in an hriamnam chiahnak hmunhma ngan Ukraine nih a kah colh nak hi a si. Odesa a kah ruangah kaphnih kan biaruahnak a chiatchuah khawhmi a si, tiah Zelensky nih a chim.

“Nihin i kan rili tilawng dinhnak Odesa khua Russia nih a kan kahpiakmi hi nichuak a si. Russia i a politic dirhmun a mui a chiattertu thil a si. Russia bantuk ram he biaruahti le hnatlaknak tuah, timi cu vun ruat ko hnik u. Zeidah a cang, timi hi vun zoh ko hmanh u. Hnatlaknak kan tuahmi vialte cu Russia nih a Kalibr missile in a hrawh dih ah a cang,” tiin Zelensky nih a chim.


“Tutan i Odesa a kahmi kongah vawleipi hi lungkhat in an um, ti kan hmuh khawh. Odesa Art Museum zong a hrawh chih. Odesa i a ummi hlanlio thil mansung pawl a khen dengmang hna. Cu hlanlio thil mansung pawl cu kanmah Ukraine ca lawngah si lo in, Europe pumpi nunphung ca zongah biapi hla ngai thil an si,” tiah Zelensky nih a chim.

Hi bantuk i Russia a dawhcah loin a umnak tete hi teinak a kan phakpitu hriamnam tha ah an cang te lai, tiin Zelensky nih a chim.
International community nih bomh an kan timhmi thawngpang a than le cangka a tu bantukin Russia nih Odesa a kah hi a si. HIMARS zun 4 siseh, 105mm kuan 36,000 siseh, Phoenix Ghost drones 580 siseh, anti-armor weapons siseh, cun a dang hriamnam le mawtaw chap ding mi telhchih in $270 million Biden le US Congress nih bomh dingin thawng an thanh.

House Armed Services Committee Chairman Adam Smith zong Kyiv a vung tlawng i Zelensky he an i tong. Cu lio ah cun Kazakhstan President Kassym-Jomart Tokayev zong nih Zelensky cu phone in a chonh ve, tiah theih a si.
British Armed Forces nih Ukraine ralkap training an pek hnanak hmunhma tiang UK Boris Johnson zong a vung kal kho i, NATO zong nih nichuahlei a ramri zongah ralkap tamdeuh in chap dingin thawngthanhnak a tuah.

“Buaktlakin chim ah cun, hi thla 5 chungah hin vawleicung ram tampi nih biataktein an kan dirpi, ti hi a lang. Cucu anmah Russia hrimhrim zong nih a al kho lai lo,” tiin Zelensky nih a chim.
“Luhhnawhtu hna caah missiles hi sullam an ngeih lo zia, ni khatkhat ah a fiangte ko lai. A tu ko rih ah cun, a cheukhat missile pawl hi tla lakin kan kahpiak khawh hna. Kan i tinhmi cu missile a ra mi paoh rak thlak khawh hi a si. Cucaah, kan i tinhmi cu, a si khawh chungin chanthar sermi, hmual a ngei deuhmi air defense system hi i ngeih khawh kan i zuam lai,” tiin Zelensky nih a chim.
Feb. 24 in khan Russia nih Ukraine luhhanwh a thok. International nih heh tiah Russia cu an auhnawh, a cungah phihkharnak an tuah len ko nain, nihin tiang cu kaphnih chonhbiaknak a tlam a tling kho hlei lo ah a cang.

Be the first to comment

Leave a Reply

Your email address will not be published.


*