Ceituk Hna Seh! Russia Ralkap A Ting Leng Pi An Thah Cang Hna, An Sung Taktak Cang, An I Ruah Ning In Ukrain An Tei Hna Lo

Russia Ralkap Thimi le Hriamnam Sunghmi
Russia nih Ukraine a tuknak cu thla 11 le ni 1 a tling cang, vawleicung ralkap thazang thawngbik pawl ah ruahmi Russia cu a mualpho chin lengmang cang. Zeibantuk hnasawnnak ngaingai chim ding a ngei lem lo. Tuhrawng hi Bakhmut ah biatak tein cawlcangh ai timh lio asi i cucu NATO le EU nih a thar in bawmhnak pek chấp an i tim. Ukrainnian defense ministry nih Russia nih tuzing tiang u a sunghmi update an tuah ning cu a tanglei bantuk hin a si.

•Ralkap 122,170 an thi cang
•Tanks 3152 an hrawh cang
•Combat Armored Machines (APV) 6284
•Miakpi 2148
•Rocket kahnak motors (MLRS ) 448
•Vanlawng kahnak 220
•Vanlawng 289
•Helicopter 281
•Drones (UAV operational) 1897
•Cruise missiles 749
•Raltuknak tilawng 18
•Ralkap motors 4944
•Special equipment 194
Source: Ukraine Defense Ministry


Relchap>>>>>Tutan Ah Ral Fak Taktak I Kan Thawh Mi Nih That Nak A Chuah Pi Khawh Te Lai Maw Zoh Cio Hna Usih!

Revolution ah Hriamtlai Buu tampi nih thatnak a chuahpi maw timi History in zohnak

Tutan Myanmar ram buai ruangah a hlan kan rak theih bal lem lo mi, Local Hriamtlaiphu tampi an hung chuak, mah le zawn cio ah Ralhraang cozah cu hun doh cio le hunk ah cio a si. Hriam a tlai lo mi hna zong nih Phaisa le Thilri in bawmh cio a si tikah hi Revolution hi hma a kal pah ngai. Cun teinak theipar a chuak ko lai timi zong ruahchannak tampi a um.

A sinain Hriamtlai Buu tam taktak te a hung um tikah le cu hna nih cun an mah le hmunram cio ah nawlngeihnak an lak cio tikah pakhat le pakhat kar ah buaibainak tete a um sual hnga maw ti maw zong phan a um bantuk tein a um pah nak tete zong a lang pah cang.

A hlei in Chin ram chungah (Kalay-Kabaw- Gangaw telhin) Hriamtlai Phu tam tak tak an hung chuak i CJDC Chungtel lawng hmanh 18 an hong tling i CJDC Chungtel a si lo mi hna he cun 25 leng an si. Hi nih thatnak maw a chuahpi te lai chiatnak dah timi hi ruah phu ngai ngai a si i, Hriamtlai Phu a bawmchantu hna zong nih kan Ram hmailei zohchih in ruahnak tampi kan ngeih a herh ngai ngai tiah ka ruah.

A hmasa bikah Vawleicung Revolution ngan bik le fak bik a si ko rua, tiah ka ruah mi Chinese Revolution kong le Second Sino-Japanese War (1937–1945) kong hi hun tial hmasa hna usih, a tawi fian nak in. Second Sino-Japanese War (1937–1945) timi cu Japan le China kar kahdohnak a chuak mi a si. Japan nih a hlan ah China ram kau deuh cu a rak uk a dihlak in uk than a duh caah maw a si, a nawlngeihnak fehter a duh ca dek ah China ram chung lei cu lak hram ai thawk.

Hi lio can te hi Chinese Emperor kan ti Bawinak kha an thlak ka te cu si kaw Nationalist Party of China (NPC) auhnak ah Kuomintang (KMT) kan ti mi nih ram an rak hruai lio a si, A sinain mipi cu an har tuk caah China Communist Party (CCP) timi an hong chuak ve i, Hi hna pahnih nih hin China ram cu an i cuh kan ti khoh lai. Voi tampi hi hna pahnih karah hin kahdohnak a chuak i minung nunnak tampi a liam lawng hmanh si lo harnak fak ngai ngai a chuak. Hi hna Pahnih lengah hin Warlords kan timi mah pumpakin ralkap a ngei ve i Peng cheukhat a rak uk ve mi zong an rak um ve thiam thiam. Cu ramchung ral a fah ngelcel lio ah cun Japan nih a van tuk hna hi a si.

Japan nih China a van tuk le cangka in Ramchung ral cu hngephngap an dai i, Kuomintang (KMT) le China Communist Party (CCP) Party cu hawikawm ah an i ser i, China ramchung um mi Hriamtlaibuu dang vialte zong nih an hnu cu an zulh hna. Cuticun Japan ral cu an mah le an hmun cio pinah hmunkhat bakah an doh ti hna. Thawng deuh le fak deuh in Rallam an sial i ral an tuk khohnak hnga a hlan ah hriam a rak tlai bal lo mi Mipi hna zong kha Trainning an pek hna i Chinese Local Resistance Force timi an dirh, hi phu hi China Communist Party (CCP) le Kuomintang (KMT) nih an pahnih lungtling tein le an mah pahnih thithruainak tein an dirh mi hna a si. An I ruahchan bantuk tein cu Hriamtlai an dirh mi nih cun an raltuknak zongah a bomhchanh ngai ngai hna. Hriam a tlai taktak ve lo mi zong nih thilri thiar le Khur cawh ah an bawmh ngai ngai hna.

Cuticun China le Japan kahdohnak cu ruahlopi in China nih a tei kan ti lai cu. Kuomintang (KMT) cu Cozah puitling le Hriamtha tha a ngei mi an si, China Communist Party (CCP) bel cu hriamtha huaha an ngei lo, an mah nih an serchom mi le an cawkmi tlawmpal cu an ngeih mi a si ko. Asinain lamkipin an i bawmh caah Ral cu an tei khoh.

Asinain Japan ral cu a hung dih i, Naihniam te le dawhria te bakin ral a do ti mi, “Thih ah mual khat ah, nun ah tlang khat ah” tiin ral a tu ti ko mi hna cu, Nawlngeihnak duh ah an mah le an mah cu doh hram an hung i thok. China Communist Party (CCP) nih cun Japan ral an tuk chungah Hriamnam tampi an ngeih chap. Kuomintang (KMT) belte cu a sungh lei in a kal. Ramchungah cun Warlords kan ti mi hna, Kuomintang (KMT) hna le China Communist Party (CCP) hna nih cun Nawlngeihnak cu an hun i cuh ciammam kaw. Ramchung cu Japan ral an tuk lio nak hmanh in a mui deuh i a chiakha deuh. Cun Minung zong tam deuh an thi. Inn le lo zong tam deuh a rawk.

A donghnak ah cun Communist pawl nih teinak an hmuh ciammam le Warlords kan ti mi Mah le Pengtlangah bawi ngang in a thu mi cu an thumh viar hna. Cun Kuomintang (KMT) pawl zong cu Communist lakin ral an sungah caah China ramin an zam hna i, an inn le an lo vialte an kal tak, an nupi le fanau hna he, cu hna cu Cheukhat Formosa (Taiwan) ah an zam, cheukhat cu Burma ah an zam i, a tu tiang Burma ah a um lan mi hna zong an um, Bing zuar ah a min thang taktak mi hna zong an si hna. Cheukhat Taiwan a phan mi pawl nih cun Taiwan cu an kutah an chiah khoh i, A tutiang Taiwan ram cu a hmun rih ve. A sinain China rampi cu hmunhnih ah a cheu kan ti khoh. People’s Republic of China le Republic of China (Taiwan) tiin Ram pahnih ah thencheu a si.

Kei ka duh bik mi cu CNF/A hi lenglei bawmtu a si lo ah, tengnge a ngei mi si loin. Fully Centralize sisehlaw hmailei ah a tha bik tiah ka hmuh. Pengkip nih Hriamtlaiphu kan ngei cio i CJDC Chungtel khi 18-30 kar an si nak cun. CNA nih Hriamtlaiphu War Office le Command Centre nih a herhnak paoh ah a fial khoh mi Ralkap 3000 a ngeih hi a biapi deuh lawng hmanh silo in a him… AA a tthawng kan tit awn, AA a tthawng kan ti tikah hriamtlaiphu fonh tampi a ngeih caah a si lo, Ralkap tampi a ngeih caah a si. KIA a thawng kan ti tikah Kachin Hriamtlai Buu tampi he an ttan tti caah a si lo, KIA Ralkap hrimhrim an tampi caah a si. SAC Ralkap a tthawng kan timi hi SAC he a ttangtti mi Hriamtlai tampi an um caah a si lo. Min Aung Hlaing nih a control mi le a herhnak ah a fial khoh mi Ralkap an tampi caah a si.

Pengtlang Hriamtlai Buu an tam ah hin Chin Ralkap an tthawng a si lo, Hriamtlai an tam ti men men lawng a si. Cu as I caah mipi hna zong nih Chin Hriamtlai lakah hin zei cem hi dah hmailei kan ram caah a tha lai, Ramchung ral le Ramleng ral lakah ho nih dah a kan kilven khoh lai. Hriamtlai buu pakhat le pakhat kar buainak a chuah tikah Ho nih dah a thelh khoh in a daihter khoh hna lai, timi hi tha tein kan zoh a hau ngai ngai.

SAC Cozah thlak a si tik le tei a si tikah hin Pengtlang Hriamtlai caah Central Govt ser khoh a si lo, Local Area a si lo ah Regional lawng ah nawl an ngei kho in an duh te lai. Local Govt lawng an sit e hna lai. A sinain CNA a tthawn ah cun Chin State Govt a ser khoh lai. Zuamcawhtu um lo in Uknak a lak khoh lai. Cu si ding cun C N A ralkap hi kan karhter le kan tthawnter a herh. Ralkap 3000 tal a ngei mi kan si ter a herh ngai ngai. Pengkip le Tlang kipah Battalion Headquarter le Camp a ngei kho mi Ralkap Buu a si a herh. Cu a si lo ah cun Tedim khi ZRA kutah a um lai, Paletwa khi Arakan Army kutah a um lai. Cun Kabaw -Kalay-Gangaw khi Myanmar kutah a um lan te lai.

Chin ram bitter le cheu a duh lo mi nih cun, Hriamtlai Buu tampi um mi hi kan lungfim zawkin CAN fonh khohnak lam a kawl hrimhrim ding a si. Mah peng lawng a ruat mi khuaruahnak nih cun a si kho lai lo, Nain Chin ram le Chin Miphun huap in khua a ruat mi caah cun tuah hrimhrim awk a si. Pengdang le tlang dang nih CNA ah an i fonh khoh rih lo hmanh ah CDF Hakha, CDF Thantlang, CDF Zophei, CDF, Zotung, CDF Lautu, CDF Senthang hna hi cu an Buu cio hi chiatha cangin CNA ah an i fonh viar hi a biapi tuk cang, cun Pengtlang dang nih an hnu an von zulh ve te hna lai. CDF Tonzang zong an ralkap tampi CNA ah an i fonh ti ka theih ah ruahchannak tampi ka ngei ko.
Salai C. Van Din

Be the first to comment

Leave a Reply

Your email address will not be published.


*