CDF Mindat Sinah Ralhrang A Fonh Mipoh Cu Laksawng Ah Sing 50 Kan In Pek Hna Lai

Kan Sinah Aa Fonhmi Ralkap Hna Cu Laksawng Ah Sing 50 Kan Pek Hna Lai: CDF-Mindat: Duhfak hakkau ralhrang hna sal sinak in luat a duh i ram mipi hna kha nu le pa bantukin a cohlang i anmah leiah dir a duhmi SAC ralkap hna cu CDF-Mindat nih lungawl tein kan in don hna. Full Equipemnt in a rak lut/fonhmi hna cu laksawng ah MMK sing 50 kan in pek hna lai. Cu pinah ramleng kal nan duhnak paoh ah kal kho dingin kan in bawmh hna lai tiah August 10, tuzing ah CDF-Mindat nih cathanh a chuah.

A dang: RALKAP UKNAK A CHUAK THAN LAI MAW? Atu lio Myanmar cozah dirhmun hi hlan lio Parliamentary Democracy chan i U Nu cozah he an i lo tiah Myanmar ramkhel kong thiamsang pakhat nih a chim. Kum 2020 thimnak a nai cang i cozah a tlai liomi party nih cozah an tlaih nolh than khawhnak hnga an i zuam bantukin tlangcungmi party hna zong nih fonhtonh cozah (coaliation goverment) ser kho ding tiangin an i zuam ve.
Tutan thimnak ahhin zei party nih teinak an hmuh zongah mipi thimmi cozah tangah a um lomi ralkap lei kha an tlaih (controlled) khawh lo chung paoh cu remdaih biaruahnak ah hlawhtlinnak a fawi lai lo. Ramchung hriamtlaibu hna buainak a daih khawh lomi zong hi zaukphung thlennak ah dawnkhamtu pakhat a si.

Australia National University ah Myanmar ram kong a hlathlai i Ph.D caah catlap (thesis) a tuahtu Hunter Marston nih atu lio Suh Kyi hruaimi NLD cozah le hlan lio Parliamentary Democracy chan i U Nu hruaimi AFPFL cozah he a tahchun.Hunter Marston nih a chim bangin PM U Nu siseh, State Counsellor Daw Aung San Suh Kyi siseh khongton ralkap uknak tangah kum tampi a ummi ram ah zaukphung cozah dirhmun in hmasa cozah nih an chiahtami harnak le buainak tampi an i khinh veve.

Britain uknak in zalonnak hmuh hnuah Myanmar ram cu nitlak lei ram cheukhat hna bantukin President kha tlangcungmi nih a chang-chang in tuan i a taktak i nawl a ngeitu bik Prime Minister tu cu Kawl miphun nih an tuan peng. U Nu nih PM a tuan chungah ramchungah tlangcung hriamtlaibu hna le khatlei in Red Flag, White Flag le Communist ralkap hna ruangah buainak nganpi a rak tong.

U Nu cu biaknak a uar tukmi Buddhist a si i biaknak kong kha ram tampi ah a cawnpiak hna. Ramchungah buainak nganpi a um lioah cozah tangka tampi (kha chan lio Kyat billion pakhat leng) hmangin an pathian sunlawihnak a rak tuah. Cuticun U Nu cozah nih 1961 ah Buddhism cu rampi biaknak ah a ser/thanh tikah Buddhist a si lomi hna nih an duh lo i an buai.

Asinain U Nu cozah kha ramleng pehtlaihnak ah a rak thiam caah kha lioah khan Myanmar ram cu vawleicung ram hna pehtlaihnak ah a biapi bik a rak si. Kha lio i ram thawng a si mi US le Soviet Union pin ah tanh ngeilo ram hna bu zong a rak dirhpi khawh hna. U Nu kutneh ah philh awk a tha lomi cu rammi hna khuasak tintuknak a nuamh khawhnak dingah Pyidawtha Simanking a rak tuahmi kha a si. Mah project tangah rak sermi inn (Apartments), tlanglawng lam le mawtaw lam, inn dang tampi atu tiang hmuh khawh in a um rih.

Prime Minister U Nu kha a hlawhtlingmi ramkhel hruaitu pakhat a si ko nain ruahnak le hmuhning aa dangmi le tlangcung hriamtlaibu hna buainak kongah a a tuahremh kho lo.
Kum 1962, March 2 i Ralbawi Ne Win nih nawlngeihnak a lak hnuin ralkap kuttang ah a um. Cu thok in Myanmar ram cu ralkap uknak tangah kum 40 renglo a tla.

Atu i Daw Aung San Suh Kyi hruaimi NLD cozah zong hi ralkap nawlngeihnak long khawh lo dirhmun ah a um ti kha fiangtein hmuh khawh a si. Ukhruainak a that tuk ko buin ralkap nawlngeih tangah a tlami U Nu le AFPFL cozah bantukin si lo dingin Suh Kyi le NLD nih an i zuam kho lai maw?

Hlan lio Parliamentary Democracy chan i PM U Nu dirhmun le sining kan zoh than tikah Myanmar ram uktu cozah cu ramleng pehtlaihnak le chawkhel rian (sipuaizi) ah zeitlukin an tuan khawh ko hmanh ah tlangcung hriamtlaibu hna he remdaihnak kongah an hlawhtlin lo ahcun a dikmi hlawhtlinnak hmu kho loin a donghnak ah ralkap nih nawlngeihnak in khongton ralkap uknak tangah tlak than khawh a si.TCP

Be the first to comment

Leave a Reply

Your email address will not be published.


*