August 13 in aa thawkmi Mindat-Matupi karlak kahdohnak ah CDF-Mindat nih SAC ralhrang pakhat a nung in an tlaih i, ralhraim cheukhat zong an lak, tiah CNF CEC chungtel upa pakhat nih a langhter.
CNF CEC chungtel upa Salai Bawi Lian Mang nih, “August 17 Mindat le Matupi kar CDF le Kawl ralhrang i kahnak ah Kawl ralhrang 20 an thi, a nung in pakhat an tlaih,” tiah Salai Bawi Lian Mang nih a ttial.
SAC ralhrang he aa kap cuahmahmi CDF-Mindat ca ah thlacampiak ding zong in halnak a tuah.”Tutan an i kahnak hi ni 5 a si cang i hi ninga chung ah SAC ralhrang 50 hrawng an thi tiah thawng an vun thanh. Atu zong an i kah cuahmah rih caah fakpi in thlacampiak hna u sih tiah kan sawm hna. An vun langhtermi hi nizaan August 17 SAC ralhrang sin in an lak mi meithal pawl an si,” tiah a ttial.
SAC ralhrang nih Mindat-Matupi lamkam khuate kiangkap pawl ah mortar bomb in an kah zungzal caah khuami tampi nih an innlo an chuahtak i ruahsur le thlihran lak ah ramlak ah an zaam hna.
CDF-Mindat pawl doh awk ah SAC ralhrang nih Magwe ramtthen chung in ralkap le ralhriam thazaang a chap zungzal caah aralaimi caan chung ah i kahdohnak a zual chinchin kho, tiah CDF-Mindat nih thawngthanhnak ah an langhter.The Chin Journal
Leave a Reply