CDF-Hakha Cu Dirpi Tu Thatuk A Rak Ngei

CDF-Hakha cu aho nih a dirkamh? CDF-Hakha cu ramchung lawng siloin vawlei khuaza ummi Hakha pengmi le Hakha peng chung khuasami poah nih thla khat ah $ 100.00 thawh in bawmh le dirkamh a si. Biaknak bu hna le a dangdang khua le pengtlang hna zong nih dirkamh a si (A min langhter awk a tha lo.)

CDF-Hakha dirkamhnak caah Hakha CDF Support Team of North America (CDFSTNA) cu tha tein committee dirh a si. Cu nih cun US le Canada ummi hna cu a si khawh chungin pehtlaihnak ngeih in rian a ṭuan.

Cu committee tawlrelnak in August 2021 chungah $ 35,000.00 kuat a si. Lewisville, TX area ummi hawikom bu pakhat zong nih Kyats sing 40 renglo an kuat ve. Hi riantuannak ah chan khat chuak Lai pasal le nusal nih tel ve lo ding cu nan lungsia a rem lai lo caah thazaang chuah khawh cio i zuam hram u sih.

Cun August thla caah thazaang chuahtu (pumpak, chungkhar, khua, le pengtlang, khrihfabu hna) dihlak cungah CDFSTNA nih lawmhnak chimcawklo kan ngei. Like pek le share khawh cio i zuam hram hna u si.

Pathian sermi tlukrualnak le dinnak a ṭanhmi poah nih hi rianṭuannak cu an dirkamh i Pathian nih a kan umpi lai i hi kan dothlennak zong kan tei hrimhrim lai tiah a zummi nih thazaang chuah a si.THT

Relchap:August 30, cawn nikhat ni ah tuahmi ASEAN+6 Regional Social Dialogue le NUG Online tonbiaruahnak ah ASEAN Labour Organization hna nih NUG cozah kan cohlan tiah tuanvongeitu hna nih an chim. Hi tonnak ahhin Japan, New Zealand, South Korea le Philipine ram in Labour Organization hruaitu hna zong an i tel ve.

International Labour Organization i a voi 109 nak meeting ah Myanmar democracy kongah bawmhnak pek cio dingin forhfialnak an tuahmi pehzulh in ASEAN Labour Organization hna nih NUG an cohlannak an langhtermi hi a si. NUG cohlangtu ahhin hlutdaw palai tampi zong an i tel. Cu hlutdaw palai hna nih cun anmah le an ram cozah sinah NUG Cozah cohlan dingin an hal cio fawn.

Tu thla, September 14 ah a voi 75 nak UN meeting pi tuah a si lai i Myanmar ram aiawhtu cozah ah SAC maw kan cohlan lai, NUG dah timi biakhiahnak an tuah lai. UN nih Myanmar ram aiawhtu cozah ah cohlan an si khawh nakhnga SAC nih siseh NUG nih siseh an i zuam cuahmah.

ASEAN Labour Organization le hlutdaw palai hna cawlcanghnak nih NUG caah tampi bawmhnak a pek lai tiah Myanmar ram riantuanbu CTUM Chairman U Maung Maung nih a chim. VOA;TCP