CACC Bawinu Foundation Director Pastor Ram Nawn A Thi

The Chinland Post| 2020 April 3 – Chin Association for Christian Communication (CACC) ah Education & Development i Secretary sinak in Bawinu Foundation ah Director a tuan liomi Pastor Ram Nawn a thi tiah chungkhar naihniam le riantuan hawile sin in thawngpang kan theih.

“Senthang peng Phaipha ram Bawinu ah ngaram an riahnak ah a si. Kan theih ning ahcun, an riahnak chak in lung a ril i, a riakpi hawile he cun an tli. cu a rilnak ruang ah a thi ti lawng a si. Biafiang kan hngal kho ve rih lo” tiah Pastor Ram Nawn naihniam nih The Chinland Post ah a chim.

“Atu tiang ah, a thihnak kong ahhin fiang in cun theih a si rih lo. Tiva ram an riahnak ahcun a si. Kan theih ning ah, an riah zaan ahhin, an riahnak a chaklei tlang meikang ruang ah lung rak ril sehlaw a dawh. Cucun, an riakbuk cu zaanmui lak ah zam tak in a tliknak ah i chuih sual in maw silo ah, ketenh in i teng sehlaw cucun, a tluknak ah lung ah a lu fak nawn in i khawnnak in a thihnak hi a si tiah” a riantuan hawi CACC Literature Dept. Secretary Pastor Lai Cung nih The Chinland Post ah a chim.

“Atuhi, a ruak cu Phaipha khuahlun ah an kalpi i, timhlamh lio a si. An rak tlunpi beh colh ko lai tiah” chungkhar naihniam nih cun a biapeh a chimchap.

Pastor Lai Cung nih, atuhi kanmah (CACC) zong a ruak va don ding ah kan i thawh lai kan ti lio pi a si. Kan i timhning ahcun, chun suimilam 12 hrawng ahhin cun kan rak phanh pi lai i, sml. 2 tluk ah a hnubik caanhmannak ngeih in ruakvui beh colh a si ko lai tiah The Chinland Post ah a chimchap.

A thimi Pastor Ram Nawn hi Bawinu Foundation a riantuan hawile cheukhat pangaruk he Bawinu Tiva an ram an riak. Cu an riahnak ahcun, hitin a nunnak liam tiang a ton hi a si.

Pastor Ram Nawn cu Senthang Peng, Hausen khuami a si.

 207 total views,  1 views today

This function has been disabled for Chin 11 News.