Breaking News: Yangon Ah Chin Tlangval Phiilip Thang Faktuk In Nawmsawh A Tong

Yangon myoh, Hmaw Bi myohne i Hngat Phyo Chian hmat Tain ah Chin mino pakhat cu a phone an chuh pinah faktuk in nam in an rak sawh mi ruang a Myoh Ukkala siizung ah chiah a si ko tiah thawng theih a si.

Philip Thang (kum 18) nih thil a ton ning cu hi ti hin a si, August 14 ah khan Ensein in Hmaw Bi ngaktah sianginn leiah kal a tim i motorcycle in a rak dong tu ding hna cu banhla dum pawng in a hngak hna, chun suimilam 1 hrawng ah a si i cu lio ah cun a minung pathum motorcycle in an rak phan ve i Philip Thang cu a phone an chuh pinah namte in fak ngai an rak sawh hnuah an rak zamtak hi a si.

“Nizan suimilam 10pm ah khan operation an tuah i 12 am ah khan an dih, namte in an rak sawh nak hi a fah ngai caah operation zong an rau khun. Asinain kan vanthat nak pakhat cu Chin mi siibawi tha taktak pakhat a rak um ve caah a si khawh chung le a tha bik in an kan tuah piak.

Namte in an rak sawh nak ah a pawpi hi hmunhnih in an rak khen nain vanthat nak ah a rak pem lo hi a si, cun a thin zong tlawmpal cu an rak khenh rih ko nain a ngantuk cu a si lo. A hliam hma a fah tuk caah siizung ah hin zarhhnih chung cu kan um rih ko lai” tiah Phillip Thang a umpi tu Cung Nung nih cun a chim.

Phillip Thang hi Yangon ah Music Training a kai lio mi a si i Hmaw Bi ngaktah sianginn ah Piano a tum piak tu hna a si. Philip Thang a nu zong hi Kaan-Kaw myoh ah a um lio a si i tuchun suimilam 2 ah Yangon a phan ve lai tiah thawngtheih a si.

Ref: Chin World

 165 total views,  1 views today

This function has been disabled for Chin 11 News.