Suimilam 6 Tiang Ralhrang le CDF Mindat Kahnak A Fak Mindat khua chaklei ah ralhrang phu hna le CDF kar nihin zaanlei ah fakngai in kahdohnak a chuak, ralhrang phu nih hmunthum in an doh hna. Chin ramkulh Mindat khua chaklei ah ralhrang phu hna nih an doh hna caah nihin August 16,zaanlei ah Mindat-CDF he kaphnih kar fakngai in kahdohnak a chuak tiah Mindat-CDF sin in theih a si.
“A luancia suimilam 1 hrawng thok in suimilam 6:00 tiang kaphnih kar fakngai in kahdohnak a chuak” tiah Mindat-CDF phu chungtel pakhat nih a chim. Atu ni khuacaan a that lo lio ah hin kaphnih kar kahdoh thawng cu cat lo in theih a si caah kahdohnak hi a fak ngai tiah theih a si.
Nizaan ah Mindat-Matupi meng 16 ah kaphnih kar kahdohnak a chuak i, ralhrang phu lei in minung 20 hrawng an thi tiah theih a si. Nihin zinglei ah Mindat khua nitlak lei zongah Mindat-CDF le ralhrang phu kar kahdohnak a chuak i, ralhrang phu lei nih hmunthum in Mindat mipi vengtu phu hna cu an doh hna.#Khit Thit Media
Relchap: Mizoram cozah nih India ramchung lawng si lo in kan eidin le kan herh mi thil hna kan lak khawhnak dingah Bangladesh he kan i chawn peng ko tiah Mizoram commerce & industry minister nih a chim.
Minister Dr. Lalthangliana nih Assam nih ramri kong tlawmpal buainak a um paoh ah Silchar lam an kan phih piak peng cu tha kan ti lo caah Silchar lam lawng si lo in Bangladesh leiin kan herh mi kan lak khawhnak ding caah kan chawnh peng ko.
Zorinpui, Saisihchuah, Kawrpuichhuah le Silsuri lei international border trade kan lim khawhnak dingah kan si khawh tawkin kan tawlrel peng ko. Bangladesh commerce minister he zong kan i chawn peng.
Caan rem hmasa cem ah a hmunhma hna zohfel tti dingin kan i tim.Bangladesh leiin kan herh mi hna cu mantlawm deuh in kan lak khawh lai.Kanmah sin in a chuak mi zong man tha deuh in kan zuar khawh lai tiah a chim.
Commerce & industry additional director HD. Lalrintluanga zong nih covid ruangah border trade kong hi duhningin kalpi khawh a si lo. International border trade kongah Bangladesh le Myanmar kan chawnh cang hna. Cozah le cozah hnatlaknak kan ngeih a herh i, phungninglo in a kal mi zong cu a um pah ko nain phungning tein tha tein a kal khawhnak dingah kan i zuam cuahmah lio a si tiah a ti ve. Ref; zorin daily newspaper
Leave a Reply