Breaking: Hakha Khuachung Ah COVID-19 Lunghrinh Mizaw Minung Pathum Hmuhchap A Si

Chin Ramkulh, Hakha khuapi chung ah COVID-19 lunghring mizaw minung pathum sin in hmuhchap a si tiah thawng kan theih.

Hi kong he pehtlai in Hakha sii-inn uk Dr. Mang Biak Kung nih, “Atu minung pathum hna hi Yangon in a rak tlung mi an si. Hakha an phaak le cangka in Na-ta-la sianginn ah erhkhumh an si. Atu hi Hakha i kan chek hna nak ahcun zawtnak hmuh an si. Zawtnak hmuh an si mi hi Mandalay lei ah kan kuat hna lai i anmah nih Confirm an rak tuah hna lai,” tiah The Hakha Post ah a chim.

Atu, Hakha i zawtnak hmuh mi minung pathum hna hi Yangon in a rak tlung mi pa pathum an si.

Cun, “Kan nih hi Yangon in a tlungmi kan si. Yangon in kan rak tlun ahhin pa minung pathum nu pali kan si. Nu pali tu hna hi cu Eindwe Hmu zung ah an chiah hnan i an nih cu negative an si. Kan nih zong hi 2020 October 21 in erhkhumh caan ni 21 kan tlin ni a si lai. Atu kan a kan erhkhumhnak i an kan hruaikai ning le tlang an kan tlaak ning hi a tha lo ngai.

Atu Natala ah kan um ni 6 hnu ah tunai te i zawtnak hmuh mi pahnih kha an rak chiah ve hna. An dam pah lo ca ah rak chia ve hna hlah uh kan ti hna nain, chiahnak a um ti lo ca ah nan tlamtling ning khan um ko uh an kan ti i, an chiah hna. A thaizing zaanlei ah an kan chek i cu hna pahnih sin cun zawtnak hmuh a si. Nizan tih ni ah an kan chek than ve i zawtnak nan ngei ti kha a si ve ko. Asinain, Mandalay lei ah an kuat than lai i a fiang lai,” tiah atu minung pathum chung in min langhter duh lomi pakhat nih The Hakha Post ah a chim.

2020 October 17 lawng ah Chin Ramkulh chung COVID-19 mizaw thar Falam ah minung 4, lunghrinh mi minung pakhat le Tonzang ah minung 2 hmuhchap an si.

Atu lunghrinh mizaw minung pathum hna cu Hakha sii-inn ah chiah an si tiah thawng kan theih.

Source: The Hakha Post