BREAKING: Hakha Ah Covid-19 Positive Thar Pakhat Tuzing Ah An Hmuh Than

Tuzing ah khan Hakha khuachung luhnak, Gangaw lam Gate ah MungZua in a rak ra mi mawtaw pakhat cu Covid-19 an ngeih le ngeihlo an chek hna nak ah mawtaw zultu pakhat sin in Covid-19 positive an hmuh than tiah thawng theih a si. Hi Positive an hmuh thar mi hi Gangaw khuathar sang/veng ah a um mi a si tiah an langhter.

Covid-19 positive a si tiah an theih le cangka tein Hakha siizung ah an tlikpi cawlh i tuhi siizung ah an chiah cang tiah zong an langhter ning a si. Cun Mawtaw mongtu pa zong hi tuzing ah khan cun Negative a si rih ko nain GTI FQ ah an chiah cawlh ve ko tiah an langhter chih fawn. Nihin tiang ah Hakha siizung i Covid-19 positive an chiah mi hna le an zohkhanh lio mi hna hi minung 7 zong an si cang tiah thawngtheih a si.

Cu ruang ah Hakha pengkulh chung ah a ummi hna mipi vialte zong nih kan umnak hmun cio in daithlang hrimhrim lo ding ah thawngthanh zong kan si hna. Covid-19 ka si theo lai tiah lung hrinh nak a ngei mi kan um sual zong ah zeihmanh thinpang le ningzah lo tein a naih bik mi ngandam nak lei tuanvo ngeitu hna sinah thawngthanh le check-up zong tuah cawlh ding in forhfial kan si.

Hi pulrai zawtnak hi kanmah le pumpak, chungkhar cio nih kan doh a herh mi zong a si i kanmah ruang ah midang tiang nih zawtnak an ton sual lo nak hnga ding ah i runven zia le zohkhanh zia kan thiam a biapi tuk mi zong a si.

Source: Hakha G A D