Bia Thatha Chim Bu Tein Inn Rangpi A Chuak Takmi President Trump!

Democracy uknak a muru pakhat ai dawh tuk mi cu mipi nih thim ti lo hnu cun nawlngeihnak sangbik thutnak hmun kha duh tuk ko zongah lunglom tein kal tak khi a si. Ka duh ko ti zongah i tleih chih awk a tha lo. Mipi nih thim ti lo hnu cun cungsang thutdenh i tleih chih peng dingah upadi an rak ser chih ti lo.

Power i tleih cang hnu cun power kal tak hi a har kho tuk. Cucaah, Russia, China, Africa ram tampi le Asian ram cheukhat hna nih cun cu power kal tak kha an siang bak lo. Ning cang loin lam ken kip in cu power cu tleih chih peng an duh caah ni hin tiang cu power cu ram tampi nih an i tleih hip chih. Ram hruaitu rian khi an nu le pa ro bantuk ah an i ruah chih.

Adonghnak ahcun cu bantuk minung pakhat silo party pakhat nih tleihhip chih mi hruainak in a kal mi ram hna nih cun democracy uknak phung ai tleih mi cu an rak tih hna i an upat peng ko hna. 2020 US thimnak bal te nitlak ram vialte nih an i uar tuk mi le tleihhip chih mi democracy uknak inntung pi cu a van i hnin ruang mang ve ai. A ho ruang hmanh ah siloin vawilei cungah nuclear hriamnam sang sang tawh a tlai tu President pi a buai caah a si.

President Trump zong pacan i cuh bak in bia tha tha chim bu tein Inn rang pi cu a kal tak ruang mang ve cang. A bia ngaih ah ngeih hna a chia pah thulh. Pasal ciam man ti lo awk a tha bak ve lo. President Joe Biden hruai mi Cozah pi nih vawilei pi zei tin dah a tungmer lai le democracy a thawng ter ning a si lai ti cu a ra lai mi kum 2 le cheu chung cu mit thep loin kan zoh cio hna a hau ko lai hih. Catialtu: Sang Hre