Benjamin Chuahsemnak Khua Ah A Tlung Ta Lai

Benjamin Sum Suahsemnak Khua Ah Tlung Duak Ding

Tufang Myanmar Idol Season 4 ih mipi thinlung ciahneh zettu Benjamin Sum cu Top 3 ah tel in Grand Final tluang ten a kaiso zo.

“Thaizan (December 22, 2019) hi hringtu a nu le media lam ih tuanvo neitu pawl thawn Yangon ihsin nazi 2:00pm ah suahsemnak khua Hmunlai, Kalaymyo lam pan in an hung pok ding” ti thu Nu Lal Din Par (Benjamin Sum nu) in The Chin Voice hnenah simnak a nei.

“Kalay Airport ah hlunghlai zet ih hmuak thei dingin fimthiamnak a rak zir thoknak GCEC tlawng neitu Sayagyi Mang Lian Tlung le phun 9, 10 a rak kainak YCW tlawng Sayagyi James Dar Ro Thang le Kalay ih Chin Pawl in a tulmi pawl tla tawlrel in an timtuah ding thu, Vengpi Baptist Church, Hmunlai ah Benjamin Sum hmuahnak caan hman a si ding,” tin Benjamin Sum nu in a sim bet.

Cun Benjamin Sum nu in, “A hmaisabik ah, Bente hitiang dinhmun thleng thei dingih cawisangtu le thlawsuah petu Pathian ka thangthat. Ramsung ramleng ihsin sumpai thawn siseh, ruahnak peknak thawn siseh, Bente vote theinak ding hrangah tuanvo in laksatu pawl parah siseh, tikcu caan pek ih MMID zuamawknak hmun ih tha in petu zate parah kan lungawi tuk.

Kilkip ihsin a phunphun in tha in petu zate parah lungawinak sim cawk lo kan nei. Grand Final zuamawknak hrang khalah thlacamnak thawn in bawm cio hrih hram uh. Kalaymyo ihsin Bente hmuahnak khalah ra tel cio hram dingah zangfah kan lo dil. Tha in petu nan zate parah Pathian in thlawsuah lo pe cio hram seh.”

Lairawn Meifar

 

 295 total views,  1 views today

This function has been disabled for Chin 11 News.