BBC Thawngzamh Nih Pha-Kanh Mithi Hi 500 Hmanh An Si Kho Tiah An Langhter Cang

Pha-Kanh vawlei minh nak ruang ah a thi mi hi 200 hrawng cu an si hrimhrim ko lai tiah ruahdamh in an rak chim mi a si nain a taktak ah cun hi nak let in an tam kho tiah lei minh lio thihnak in a luat ve mi pakhat nih cun BBC thawngzamh sinah a chim hi a si.

Lei minh nak hmun kha minung a thong hrawng kan um nak hmun a si caah lei minh hnu i a chuak kho than mi hna hi kan tlawm tuk cang. Mi 200 hrawng cu an thi ko lai tiah kan rak ruahdamh mi a si nain a taktak ah cun 400-500 karlak hi an thi ko lai tiah Ko Pyeo Thet Nain nih cun BBC thawngzamh sinah a chim ning a si.

“A thi mi hna hi leivawr nih a chilh mi hna lawng an si lo, ruah sur tuk ruang ah tilu  ngantuk in a rak luang chih mi nih a fanh mi hna zong tampi an um. Hi lio hi keimah zong a taw deuh ah ka um ve lio a si. Lei minh nak hi hmunkhat lawng ah a si lo, kan pawng ah lei minh kan hmuh bak te in ka thazaang dihlak in leivawr cung cun tlang leiah kan zam cio hna.

Cheukhat cu kan luat cang lai tiah an ruah caah hnangam in an umnak hmun bakah tilu nih a rak fanh than hna hi minung tamtuk cu an tlau than ko. Cu ruang ah a thi mi 200 hrawng an si lai tiah kan ruah mi hna nak let in an tam lai, 400-500 karlak hi cu an si ko lai” tiah thihnak in a luat ve mi Ko Phyeo Thet Nain nih cun a chim hi a si.

July 5 ni tiang ah ruak an hmuh mi dihlak hi 174 an si tiah acozah nawlngeitu lei nih cun an langhter. Acozah lei nih thihnak a tong mi hna minung pakhat Ks ting 5 cio le hliamtuar mi hna minung pakhat ah Ks ting 2 cio an bawmh hna. Cun hlathlai tu phu an ser mi hna zong nih tuchun khan an dothlat cuahmah lio zong a si.

Leivawr cimh nak ruang ah thihnak a tamtuk caah hi riantuan hi kan duhthim nak cu a si hrim lo nain zingzaan rawl ei ding ruah ah thihnak thlan tlang ah cung ah dir in nunthap in kan ruan hi a si ko, zeitik ah dah lei minh nak in kan thih lai ti lawng hi kan i ruah mi a si ko tiah zong a chim chap hi a si.

BBC

 169 total views,  1 views today

This function has been disabled for Chin 11 News.