Bawi Zisuh Le Moses Bantuk Daw Aung San Suh Kyi

Catialtu: Van Tum

Bawi Zisuh Le Moses Bantuk Daw Aung San Suh Kyi: Suh Kyi Soisel Cu Pathian Rianttuanmi Le Timhtuahmi Na Soisel Bantuk Asi)

Bawi Zisuh nih vawlei misual luatnak le khamhnak caah a nunnak a pek I a tuarnak, le Moses cu Pathian nih a dawtmi le a thimmi Isarel miphun cu Egypt miphun sal an sinak in luatter dingah a thim bantuk in Daw Aung San Suh Kyi zong Kawlram mipi ralkap uknak ttha lomi kut in luatnak kan hmuh khawhnak hnga England ram in a pasal le a fale cu kaltak in a rak tlung I thongthlak le harnak a phun2, hremnak le soiselnak a phun2 a tuar I federal democracy uknak tling kan hmuh khawhnak hnga a lamkip in a zuam.

Bawi Zisuh nih vawlei sualnak ruangah temtuarnak le harnak a phun2 a in bantuk in kan Pi Daw Suh zongnih Kawlram mipi luatnak le federal democracy hmuh khawhnak dingah a phun2 in a zuam I temtuarnak le harnak le soiselnak a phun2 a in ve/a tuar ve. Moses zong a miphun Isarel sal sinak in an luat khawhnak hnga heh tiah a zuam I temtuarnak le harnak a phun2 a tuar ve. A miphun lila Isarel upa pawl nih an soisel len ve. Bawi Zisuh le Moses nih an temtuarmi harnak a phun2 bantuk cu Daw Suh nih Kawlram mipi caah a tuar ve.

Moses cu Midian ram a um lioah Pathian nih a miphun Isarel luatnak ding caah Egypt ram kal ding in a auh. Exodus 3-4 kan rel ahcun Pathian nih Moses a auhnak kong kan hmuh khawh. Moses nih a nupi le a fale cu a kaltak hna I Egypt ram i sal I a taangmi a miphun cu chanchuah dingin a thawh. Isarel miphun caah cun Egpyt ram in sal I an luatnak tuanbia hi a biapi bik khan a si. Cu sal sinak in luatnak ding caah a hruaitu hna cu Moses a si. Cu ve bantuk in Daw Suh zong England ram I a dawtmi a chungkhar cu a kaltak hna I Kawlram cu Uknak ttha lo ralkap uknak in chanchuah ding in a thawh ve, federal democracy uknak kan hmuh khawhnak ding ah. Kawlram minung million 55 tluk caah a biapi bik cu federal democracy ngah hi a si ko. Mahcu heh tiah a phun2 in a zuam. Amah ca hlawknak, miaknak le a chungkhar le a unau caah a tel bak lo.

Pathian nih vawlei cu a dawt tuk hringhran caah a fapa neihchunte Bawi Zisuh cu vawlei misual luatnak le khamhnak caah a kan pek I Pathian I khuakhan lairelnak cu Zisuh zongnih lunglawm tein a cohlan I a Pa orhlei kam I a bawitthutdanh cu a kaltak I a niamtukmi dirhmun minung ah a cang. Cuti cun vawlei minung vialte sualnak in kan luat khawhnak hnga le khamhnak kan hmuh khawh dihnak hnga caah vailam ah thihnak tiang a tuar/a nunnak a pek. Amah ca tthatnak le hlawknak le miaknak um loin cucu lungtho tein a tuah. Filipi 2:6-8 chungah cucu fiang tein kan hmuh khawh, “Pathian sinak kha a ngeih zungzalmi a si ko nain hramhram in Pathian tluk si awk kha cuh awkah a rel lo. Amah lungtho te tu in cu vial cu a hlawt dih I sal sinak tu kha aa lak; Minung bantuk ah a cang I minung mui in a lang; Mi toiah aa dor I nawlngaihnak lam kha thih tiangin a zulh-vailam cung thihnak kha.” 1 Timote 2:6 zongah kan hmuhmi cu” amah cu mi vialte tlanhnak caah a lu aa pemi a si.” Bawi Zisuh nih Pathian a sinak cu kaltak in vawlei misual luatnak le khamhnak caah a nunnak a pek I kan sinah a um ve. Cuve bantuk in Daw Suh Kyi zong England ram ah nuam tein a um khomi a si ko nan Kawlram mipi luatnak le federal democracy ngahnak/hmuhnak ding caah a rak tlung I harnak le temtuarnak a phun2 tuar in a nunnak a pek i a ttuan ve.

Phundang in kan chim ahcun Daw Aung San Suh Kyi hi Pathian nih Kawlram mipi uknak tha loin kan luat khawhnak ding caah a kan pekmi a si/a thimmi a si. Isaiah 44:23-45:8 kan rel ahcun Pathian nih Babylon sal sinak in Isarel miphun luatnak ding caah Persian siangpahrang Cyrus cu a thim ti kan hmuh. Cuve bantuk in Daw Suh cu Pathian nih Kawlram mipi federal democracy uknak kan hmuh khawhnak ding caah a thim ve. Cucaah cun kan Pi Suh Kyi soisel cu Pathian rianttuanmi le khuakhanmi soisel bantuk a si ka ti.

Kawlram milu million 55 hrawng lak ah Suh Kyi bantuk minung an um lo. Hei thi seh law amah bantuk minung hi hi hnu ah kum 50/60 hmanh ah kan nei kho lai lo/kan hmu lai lo. Amah bantuk mi ropui milianngan hi Pathian nih a kan pekmi an si. Noble Prize a hmuh. Cupin ah doctorate a phun2 60 leng an pek, mintthatnak ah. Mintthatnak laksawng 100 leng a hmuh/a don. Amah bantuk minung hmuh ding an har tuk. Cucaah cun soisel ti loin thlaza tuk campiak uh sih, thluachuah za sawmpiak uh sih law, a nunsaunak ding caah Pathian hal uh sih. A phun2 in ttanpi uh sih/dirpi uh sih.

A temtuar ding chim cawk lo si ko lai. Kum 1988 buainak ruangah tlangcung miphun caah pasal ttha a timi vialte cu ralkap thongthlak ttih le hrem ttih ah India, Thailand, Malaysia, Laos, Tuluk, USA, le Bangladesh ramah kan zaam dih hna. Anmah Kawlpawl zong an zaam viar ve. Asinan Daw Suh cu a zaam ve lo. Kum 10 leng thongthlak a tuar. A phun2 in serhsatnak a tuar. Non-violence hmang in uknak ttha lo ralkap cu a doh hna, Kawlram mipi caah. Kum 2003, May ni 3 lio Depayin khua ah a cangmi kha ruat hmanh uh law zeitluk ttihnung dah a rak tuar.

Amah nunnak an humhim ruangah minung tamtuk nunnak a liam. Amah zong thihnak in a luat. A hnapduk zong a luang dih ti si. A umlo lio ah a dawt cukmakmi a pasal nih a thih tak. A pasal he voithum bak phone in an I chawnh lioah ralkap pawl nih a phone line an chahpiak ti si (VOA Burmese chimmi). Mahtan ahcun a tla bal lomi a mitthli cu a tla ti si/a ttap. Amah a chuahpi a upa nih taza a cuai lengmang fawn. Kawl ralkap cozah nih England ram kir kho tilo in an kham. A kirsual zong le Kawlram chung rak luh tthan kho tilo ding in an tuah. Atu hi amah cozah hruaimi kan si ko nan ralkap nih nawlneihnak tampi an tlaih rih fawn. Ralkap tthat lo ruangah amah lehlam soisel le mawhchiat a tong lengmang fawn. Mipi sinah a chim duh lomi le chim awk a ttha lomi tampi a nei rih lai.

Ralkap nih mah na tuah I na lonh ahcun uknak kan lak rih lai I thongchung ah kan in khumh rih lai tiah bia an kamhter mi zong a um fawn lai a fiang ko. Nan a chim lai lo I chim awk zong a ttha theng lai lo. Anmah pahnih karlak ah bia an I kammi biathlithup a um len rih lai. Ralkap nih Rohingya miphun cungah tthat lonak a phun2 an tuahmi ruangah kan Pi Daw Suh cu ICJ hmai ah ningzahnak a tuar. Ralkap nih thil ttha lomi tampi an tuah ruangah a phun2 in amah lehlam soisel le mawhchiat le volhpamh a tong rih fawn. Mah vialte a tuarmi hi Kawlram mipi ca lawng teah a si ko. Amah caah a tel bak lo ti khawh a si.

Kawlram mipi nih luatnak le federal democracy uknak kan hmuh khawhnak ding ca lawng teah a si dih ko. Atu bantuk in zalong tein thimnak (election) te hna kan tuah khawhnak hi amah a zuam ruangah a si ti khawh si ko. Chin miphun le bang cu kan van tthatuk hi. Vice-president caah Pu Henry Van Thio zong a kan pek rih fawn. Mah vialte thilttha a tuahtu na soisel ngammi hi cu Pathian na ttih lo maw ti hi ka biahalnak a si.

Cucaah cun Suh Kyi soisel cu ngolcang uh sih. Amah na soisel cu Pathian na soisel he a lo I Pathian rianttuanmi le timhmi na soisel bantuk a si ve ka ti. Cunak cun a ca hrangah thlacampiak uh sih. Suh Kyi cu Pathian nih a thimmi le a kan pekmi a si. A nunkhua tuk sau ko seh. Bawi Zisuh, Moses le Daw Aung San Suh Kyi temtuarnak le innak vialte cu an I khat hna I mi tampi luatnak caah an si dih ko.

Daw Suh a party NLD nih atu kum thimnak zongah ram pumpi in teinak hmu seh law amah zong nih ni nikhat khat ah President ttuan te ko seh.

 276 total views,  1 views today

This function has been disabled for Chin 11 News.