Australia Laimi Caah Covid-19 Kongah Ralrinnak Fak Taktak!

Covid19 tlangrai he pehtlai in Thawngthanhnak le ralrin awk tete

Kan theih cio btk in Covid19 tlangraipi cu a tian kho rih lo. Vawlei pi a cul dih cang. Ramkip nih an tuar. Lairam zong a phan ve. Ramkip Laimi cungah a phan sual lai tiah thin domh in kan um hna. Vawlei a si caah cu Covid19 nih a phaakmi hna le Nunnak tiang a liammi kan um caah kan ngeih a chia hringhran ko. Khatlei ah tlangrai nih a phaak ko nain a damthanmi zong kan um hna caah kan I lawm hringhran. Cucaah Covid 19 cu Thihnak btk in ruah hrimhirm lo ding. Tlangrai pakhat kha a si ko.

Tuchun ni tiang ahhin Australia ram pumpi huap in Minung 6949 an zaw i Miung 5889 an dam than cang. Hi chungah Minung 96 nih Covid19 in kan liam taak. Minung 664000 hna hi zawtnak hneksaknak ( Check) an tuah khawh cangmi hna an si. Kan pengkulh Victoria chungah Minung 1423 mi zaw kan um ve.

Cuti ralring tein kan um ko lio ah kan umnak Melbourne khua Laimi zong a hun kan phaak ve caah Fimkhur deuh tein kan um cio a hau. Nizan May 4 ah kan Peng-uk Daniel Andrew nih Victoria ah mizaw thar Minung 22 an um I cu chungan Minung 19 cu Melbourne Nitlaklei Sathahnak ( Cedar Meats Factory) I a tuanmi an si tiah a hun thanh. Cucaah hi sathahnak ah Laimi zong tampi kan tuan ve caah a hun kan phaaknak a si. Tuchun tiang Hi sathahnak I a tuanmi chung in an Minung 45 tluk an hmuh cang hna tiah theih a si. Cu chung in kanmah Laimi zong Minung 5 tluk kan I tel ve tiah theih a si.

Cucaah ralrin deuh kan hun hau hna. Laimi cu aa tlaihchan tukmi kan si caah leikai ah a nuam tukmi kan si hna caah ralring tein kan um lo ahcun I chonhbarh dih a fawite mi kan si.

Laimi chungin Nichuah he Nitlaak he kan si fawn caah umkal, Lenkai cu I ralrin deuh hrimhrim kan hau hna. Thawngpaang a daih lei ah kan hun ruah lio ah kan Miphun sin a hung phaak cu lungthin a dam deuh lo. Cucaah ralrin awk le theih awk a herh tiah ruahmi tete kan hun tialnak a si.

Ralril awk tete kan hunnolh than lai. Chonhkhenh a fawi tukmi a si caah ralring tein kan um hrim a hau.

1. Cozah sermi zulhphung zulh cio hrimhrim ding.2.Lam naih tuk in I chonhkhenh lo ding.3. Leikai tuk lo tein Inn ah a si khawh chung in I Erh rih ding.

4. Kuttawl daithlan hrimhrim lo ding.5. Hand Sanitizer hman khawh peng I zuam ding. ( Hand Sanitizer tam tuk hman tikah kut hna a hmaat khawh caah ti in I tawl deuh ah a tha).

6. Abu in um rih hrimhrim lo ding.7. Kan pawngah Mizaw an um sual ahcun kan I ralring deuh lai nain a herh lomi chimrel hrimhrim lo ding.

8. Mino thisa thawngmi sinah Covid19 zawtnak hrik a cawl khawh lo caah kan pum chung ah hrik aum le um lo theih khawh a si lo nain kan pawngkam I a um mi Kumkhua upa le thitha dermi kha kan hngalh loin kan rak chonh khawh hna caah Lenvah hrimhrim lo ah a tha. A hlei khun in Zawtnak dangdang a ngei I aa thlop liomi hna caah a fawi I tih a nung ngaimi a si.

Mizaw kan um sual ahcun :

1. Ningzah hrimhirm lo ding. Kan pawngkam biachim holhrel ruangah tihtanh le zakzum tbk in um hrimhrim lo ding. Tlangrai cu mizei Cung paohah a tla i a phan khomi a si ko.

2. Covid19 kan si or ka si rua ti kan I hngalh / ruah ahcun mah tein hmundang ah i thlei i chungkhar le pawngkam sin ah chim hrimhrim ding.

3. Thisa a thawngmi caah cun Covid 19 hi Dam a fawimi te a si ko. A dammi a tam deuh pinah sii-ai an hmang hna lo. Cucaah kan si zongah thinphang in um hrimhrim lo ding.

4. Mah thlop in i thlopbul lo ding. Sibawi sinah i zohter hrimhrim ding. Sii dang nih Covid19 Zawtnak hrik kha cawl kho lo in a tuah nain a hnu ah faakkhun i rian a tuan caah ralril le thlopbul thiam a harhmi a si.

Melbourne Nitlaklei I zawtnak an hmuhning hi an zawt hna caah a si lo. Lunghrinh mi an um nain an dinhter hna( quarantine) an chiah hna I an dam than colh ko hna. Tutan cu vanchiat ah a hliammi a aum I cucu Sizung ah phaakpi a si caah an hun check nak in Covid19 zawtnak an hun hmuh hi a si tiah theih a si. Cucaah duhsah in an hun hlathlai le checknak an hun tuah tikah an rak tam ngaingai cang. Tuchun tiang ah Minung 45 tluk an phan tiah theih a si. Hi nak in an tam deuh chin lengmang kho zong a si.

Cu nih a hun langhtermi cu kan sinah Covid19 a phan i kan pawngte ah a um ti a fian caah pakhat le pakhat dawtnak in Thlacampiaknak he bawmhchanh khawh cio i zuam hna usih.

Holh kan thiam lo ruang le zeidang tete ruangah kan lung a hring ko nain Sikhaan piah le bawmhchanh hau kan um sual ahcun kan pawngkam Community Upa sinah siseh, Kan Pastorte hna le. Khrihfabu Upa sinah siseh pehtlaih le theihter I zuam ha usih. Kan Mipi bamwhchanh dingah timhcia tein na pawng teah kan um ti zong theihther than kan in duh ko hna.

Bawmhchanh hau kan um ahcun a tanglei hna ahhin zeitik caan paoh ah chonh khawh kan si .

President : 0403 249 475      Secretary : 0404 091 914

Miphun zawnruahnak he,

Australia Chin Community

eastern Melbourne Inc

 171 total views,  1 views today

This function has been disabled for Chin 11 News.