Australia Ah Covid-19 A Ngeimi Laimi Mi Panga (5) An I Chap!

Victoria pengkulh ah coronavirus zawtnak a ngei mi minung 22 nizan ah an hmuh chap hna. Hi chung ah Nitlak Melbourne I a um mi sathahnak company (Cedar Meat Australia abattoir) ah minung 19 an si. Hi minung 19 chung ah kan mah Chin mi panga zong zawtnak an i tel tiah theih a si. Kan Chin mi chung zong in a tu hi minung tampi an check hna i an result a chuak rih lo mi zong an um rih. Hinak zong in kan tam deuh kho tiah min langhter duh lo mi pakhat nih a chim. A tu zawtnak an hmuh mi hna cu sizung tiang tu cu an phan lo. Inn tu ah an um ko rih hna.

Mah minung 22 chung ah minung pahnih cu ramleng khuatlawnnak in a rak kir mi an si i, quarantine ah an chiah mi hna chung in zawtnak an hmuh cu a si.

Victoria pengkulh ngandamnak lei lutlai nihcun minung 19 zawtnak an I chonhnak hmun hi a company min a langhter lo nain ABC News nih an van hlat tikah Nitlak Melbourne I sahthahnak hmun pakhat a si mi Brooklyn ah a si tiah an theih.

Company lei tuanvo ngeitu nih an chimnak ahcun hmun khat I a tuan mi chung in minung 4 cu an dam lo tiah an thanh. Mah Hnu ah Sathahnak company le Victoria Pengkulh ngandamnak lei tuanvo latu hna he may nikhat ah khan minung 350 cu an zawtnak kan chek hna tiah a chim.

Atu zawtnak thawngpang thar kong he pehtlai in Victoria pengkulh khuabawi a si mi Andrew nih “ nizan ah minung 13,000 cu an check khawh cang hna” tiah a chim. Cozah nih aa tinh mi Victoria pengkulh chung I state Emergency a thanh mi a dih hlan may 11 hlan chung hrim ah minung 100,000 cu an zawtnak zohfel kan I zuam lai tiah a bia a peh chap.

Andrews nih a chim chap mi cu “Victoria ah a za tein zawtnak kan zohfel mi hi minung 56,00 an si cang’ tiah a bia a peh. A tu an test mi hna chung ah a result a fiang rih lo mi tampi an um rih. Mah nak leng in zawtnak hi a karh kho rih mi a si. Nangmah le nangmah na zumh lo I khuh khuh, hatthio tibantuk I na um ahcun vai test colh Victoria pengkulh chung ah Coronavirus test nak hmun 90 ah a um cang tiah a chim chap.

Biapeh

A tu lio ah kan Chin miphun chung zong in mah bantuk pultlangrai kan ton cang tikah daithlan awk akn tha lo. I lenkai hrial khawh I zuam hna usih. Aherh tuk lawng ah leng chuah ding tiah kan cozah nih a kan ti mi nawl ngai tein um cio hna usih. A tu lio a zaw mi nak in kan tam deuh kho hinak in a chiat lei zong a panh kho mi kan si caah kan I ralrin cio a hau ko lai.

Ref: ABC News

 258 total views,  1 views today

This function has been disabled for Chin 11 News.