Armenia Le Azerbaijan Karlak Ah Kahdoh Nak A Chuak, Ralkap A Thi Mi Zong An Tam Cang

I Cuhkalhmi Nagorno-Karabakh Hmunhma kongah Armenia le Azerbaijan Raal an Tho. Nagorno-Karabakh hmunhma i cuh ruangah khahlan Soviet ram ah ai tel balmi ram hnih karlak ah Sunday ah khan faak ngaiin i tuknak a chuak a tlawmbik minung 23 hrawng cu an thi cang, tiin thawngpang theih a si.

An i cuhmi hmunhma hi Azerbaijan ram chungah International nih an pompiakmi a si ko nain, Armenian miphun nih an ukmi a si. 1990 lio hrawnghrang i hi hmunhma then a rak si lio ah khan faak lak in raal a tho bal cang i, cu lio ah cun minung thong sawm tampi an thi.

Hi hmunhma hi kan uk than khawh hrimhrim lai, tiah zumhngamnak ka ngei, tiin Sunday ah khan Azerbaijani President Ilham Aliyev nih a chim. Azerbaijan, Arenia le Nagorno-Karabakh ah Martial Law kalpi dingin tlaang an au cang. Caucasus Mountains i buaibainak an tawlrel khawh ti lo hi kum sawm 30 lenglo a si cang i, tu le tu buainak a um tawn nak hmun a si.

July i ramri buaibainak ruangah minung 16 hrawng an thi i, kum tampi chungah a nganbikmi duhlonak langhternak cu Azerbaijan khualipi Baku ah an tuah. Kan hmunhma laak than kan duh, tiin mipi an au.

South Caucasus hi Caspian Sea in vawleichung markets kipah zinaan le gas an kuatnak pipe (peep) an kalternak hmunpi a si caah, a tu bantuk i buaibainak nih hin vawleicung markets pawl hi a hnursuan ngai ding khi a si.

Hranhramlo in hmunhma chuh a tongmi Azerbaijan ram hi a si khawh chungin ka bomh lai, cun vawleipi zong nih vun dirpi ve u law a tha, tiah Turkey President Recep Tayyip Erdogan nih a chim. Hlan tein khan Azerbaijian pawl hi Trukey miphun an rak si i, Turkey he pehtlaihnak naihniamtein a ngeihpi mi an si.

Russia hi Armenia hi a hawikomtha a si ve i, tutan buaibainak hi a ran khawh chungin kahdaihnak tuah i cabuai cung ton biaruahnak hmangin daihter dingin a nawl hna.

Midang nih lehnak an tuahmi pawl:

  • Hi kongah ka lungre a thei ngaingai. Cucaah nan kaphnih in kahdohnak ngol u law ka duh, tiin UN Secretary-General Antonio Guterres nih a chim.
  • Armenia minung tampi an umnak France zong nih kahdohnak donghter dingin le cabuai cung biaruahnak tuah dingin a sawm hna.
  • Azerbaijan le Armenia he raminnpa a si mi Iran zong nih lamkaltu thlahpiak hna i remdaihnak tuahpiak hna dingin a duhnak a langhter.
  • Hi buaibainak a dongh ding hi US i kan duhnak a si, tiin President Donald Trump nih a chim.

Turkish nih hlah maw an ral a thatter hi aih?

Sunday i an i kah lio i an hmanmi hriamnaam pipi pawl cu nai hrawnghrang kum i an hmanmi hriamnaam lakah a nganbik an si ko la. An i cuhmi hmunhma i “Nanmah nih nan kan kah hmasa” tiin khat le khat sual an i phawt tonh zungzal tawn. Tutan cu ralkap thazaang in an i kah lawng si ti lo in, thawngpang kongkau zongah raal an tho cang. Ral an i tukmi kong thawngpang official tein zalong tein laak hi a fawi ti lo. An kan onh sitsai ti lo.

An kan chuhmi kan hmunhma kan laak than, tiin Azerbaijan nih an chimmi thawngpang cu Armenia cozah nih an pompiak duh lo. Azerbaijan ralkap tampi an thi, tiah Armenia lei nih an chimmi cu Azerbaijan lei nih an pompiak ve hna lo. Cu lawng hlah, Azerbaijan cozah nih a ram chung internet hmannak a rengh, a bikin social media ko hi a rengh khun hna.

Turkey nih thathotuk in bomh dingin a chimmi ruangah Azerbaijan hi a raltha chinchin mi a lo cang. Turkish ralkap thazaang bomhnak thawngin kan hmunhma kan laak khawh than cang lai, tiah August ah khan Azerbaijani defence minister nih a rak chim bal.

Presentational grey line

Zeitindah raal an thawhmi a karhzau chinchin ning a si?

Nagorno-Karabakh i mipi khuasaknak hmunhma le regional khualipi Stepanakert cu Sunday zingka khan an vun kah, tiah Armenia defence ministry nih a chim. Nagorno-Karabakh ah a thimi hi 18 an si i, cu hna lakah cun kan ralkap hi 16 an si i, a dang 2 cu nunau le hngakchia an si. Hliamhma a pumi 100 an si, tiah a hmun ah a ummi nawlngeitu nih an chim.

Armenia nih bomb in an kan kah caah, chungkhar pakhat a khen hna i chungkhar member 5 an thi. An i cuhmi hmun ah a ummi nawlngeitu (Armenia) pawl nih martial law kalpi dingin le, ralkap thazaang tuahtamh dingin nawl an chuah le cangka Armenia cozah nih a ram pumpi ah tlaang a au colh lawlaw ve.

Martial law, timi cu ralsa nam (emergency) a hauh tikah, ralkap lei nih cozah le civial cozah vial hna i an nawlngeihnak vun chuh (phungning tein) tak duak khi a si.

Kan sunhsakmi kan ram kilven awkah ready in um u. Azerbaijan in ciamnaam tein doh a kan timh cang hih, tiin Armenian Prime Minister Nikol Pashingyan nih a rammi pawl cu thawng a thanh hna. A tu hi a ngan ngaimi raalpi thawh dawhdang kan si cang. Cucaah, vawleicung ram hna zong nih hi buaibainak hi a daih khawhnak hnga hun kan tlaangtlaakpi cio dingin kan sawm hna, tiin a chim.

Sunday kahdohnak kan tuah lio ah khan raal hna an helicopters 2, drones 3 le tank 3 kan hrawhpiak khawh hna, tiin Armenia lei nih an chim. Kan helicopter 1 cu ai rawk taktak ko. Asinain a chung ummi pawl cu an him dih. Anmah Armenia an air defense system 12 hrawng hi kan hrawhpiak lehlam hna, tiin Azerbaijan lei nih an chim. Asinain, cu an chimmi cu Armenia lei nih an cohlang lo.

Armenia ralkap nih an kan kahmi pawl lehrulhnak tuah dingin thawng taktakin cawlcanghnak ka tuahter hna, tiin Azerbaijan President Aliyev nih a chim. Armenia nih kan ram an kan chuhmi laak than khawh dingah ai zatawk dingmi ralkap thazaang in lehrulhnak kan tuah khawh hrimhrim lai, tiah ka zumh, tiin President Aliyev nih a chim.

Armenia ralkap lei nih tutan i anmah lei an sungh zatlakmi kong thitha in an chim duh lo nain, Nagorno-Karabakh an zapi nih cohlan lo mi an president nih a chim ve ningah cun Armenia lei in kan sunghmi a um ngai ko, ti a si.

2px presentational grey line

Nagorno-Karabakh – Biapihla tete

  • Hi hmun hi tlaangcung hmunhma a si i a kauh hi 1,700 sq miles a si
  • Hlanlio tein khan Armenian Khrihfa le Muslim Turkey pawl nih an tlaakmi a si
  • Soviet chan lio ah khan cun, Azerbaijan ram i mahtein ai ukmi pengkulh pakhat a rak si
  • International ah cun Azerbaijan ramchung ah khumh a si ko nain, khusami tamdeuh hi cu Armenian miphun an si
  • 1990 ah a thomi raal ah khan minung 1 million tluk hi hmunhma ngeih lo in an um i, minung 30,000 hrawng an thi
  • 1990 ah a thomi raal lio ah khan a dangtein ai pheumi Armenian phu pakhat nih Azerbaijan i khuakihriang pawl cu an laak chap hna.
  • 1994 kahdohnak donghter a si hnu in khan khat le khat i rualremnak le covo zong tiaceu in tinco khawhnak lam a um kho cang
  • Hlanchan tein khan Russia hi Armenia i a hawikom tha a si

Credit: Chelsea Bawi

 116 total views,  1 views today

This function has been disabled for Chin 11 News.