An Mah Kut In Sermi Bak In SAC Ralhrang Sakhaan An Phomh Hna

NUG Kuttang PDF Wetlet Nih Hloh An Duh Hna Caah An Tuk Mi Bo Cakei Phu Nih Kutsiam Meithal Lian In Rallokap Sakhan An Kah

Ankah mi Rallokap Sakhan: Sakai Ramthen, Wetlet Peng Sinmaka Sakhan. A kap tu LDF phu hi Kan hnu zarh ah NUG Kuttang PDF Wetlet nih an kah mi Bo Cakei te phu kha an si. PDF Wetlet nih a nung in tlaih an duh ko nain Bo Cakei cu azam manh. A ralbawi chuekhat cu an thlah rih hna lo. Dalaan bantukin an hrem hna / an thah hna. NUG nih an hlat lio asi. A sual mi cu Bo Cakei siseh, PDF Wetlet siseh, dantat an si tiah an thanh cang.

11 November 2022, ah Bo Cakei te nih kutisam bomb le Meithal lian in an kah hna. Minites 20 -25 chung an i kah. Uirual cu maw ka nu kan khamh tuah u, kan lo dih cang tiah an kio len. An kah mi Bomb le kuan vialte Sakhan ah an tla dih. Uirual a thih zat kan theih khawh rih lo tiah Bo Cakei nih ati. Hmapu in a aihram lenmi au kan theih hna tiah a ti. Rallokap nih khua chung ah Hriam ngan an kah lengmang i mipi an kan thah lengmang caah tu bantukin kan kah hna hi asi tiah Bo Cakei nih a ti.

November 7 ah Sinmakan Sakhan um Uirual nih, Khua chung ah Hriamngan an kah caah, Nu 1 a thi, kum 2 ngakchia pa hma fak pi in a tuar tiah Bo Cakei nih a ti.
NUG Kuttang lo LDFs phu 5 i fonh in an kah hna. Bo Cakei nih a hruai hna. (ဗိုလ်ကျားကြီးအဖွဲ့၊ ကျားသစ်နက်ပြောက်ကျားအဖွဲ့၊ ACID အဖွဲ့၊ မတ္တရာပြည်သူ့ကာကွယ်ရေးအဖွဲ့နှင့် လျှပ်စီးပြောက်ကျားအဖွဲ့)

Fianternak: NUG sual phawtnak capar asilo. Kawlrawn PDF hi 500 dengmang an um. NUG kuttang ah 200 leng an um. Adang cu NUG kuttang lo lawng an si. Chinram lawng ah Pengtlang CDF an tam asi lo. Kawlraw lei ah an tam deuh. Nain mah le mah aa kah mi an um tuk theng lo. CHIN MI zong mah le mah i kah ti hla usih.
CDF phukhat nih 60MM an siam ve. Timit ah an hmang le a alh khawh lo an ti.
Source: Bo Cakei Facebook. Irrawaddy Burmese Edition / Mizzima News.

Relchap>>>>Lungrualnak In Teinak Ah
===================
SAC ralkap cu nawlpeknak pakhat tang i an um caah lung i rual lo bu zongin an i funtom kho. Chinram dohthlennak ralkap hna hi nawlpeknak pakhat tangah kan um khawh lo caah i lungrual kan herh tuk. Nawlpeknak pakhat tangah um cu ahopaoh nih kan duhmi a si nain atu kan dirhmun ah cun a si kho lomi a si.
Asinain thachiat ding a si lo. A ruang cu nawlpeknak pakhat tangah um lo bu zongin kan hmuitinh ah lung i rual khawh a si ko.

Mirang phungthluk ah “Maimomh hmanh nih an i lungrual ahcun Chiandeih zong an hren khawh (When spiders unite, they can tie down a lion)” ti a um. Dohthlennak ralkap hna kan i lungrual ahcun kan thiamnak le hriamnam hme hmanh seh law uknak ṭhalo hi kan tei khawh ko.
Lungrual timi cu ruahnak le hmuhning i khah viar khi a si lem lo, hmuhning le ruahnak i dan buin rianṭuanṭi khawh hi LUNGRUAL cu a si.

Chinram ah pengtlang hoih in hriamtlai kan um cio i kan ruahnak le hmuhning aa dang liangluang ko lai. Asinain thil pakhat ah surlu bang kan i funtom dih ko. Cucu uknak ṭhalo tei a si. Zeiruangah dah tangka kan thawh? Zeiruangah dah hriam kan tlaih? Cucu kan i fian cio mi a si.
Atu i kan dirhmun cu kan Laiholh i “Thlan kam ah dir/thih ri le nun ri ah um” timi kha a si. Thlan kam ah kan dir bu hmanh in kan i lungrual khawh lo ahcun Chin miphun nih kan ca le holh chungin LUNGRUALNAK timi biafang hi kan hlonh a hau hnga!

Nihin ah cun uknak ṭhalo tei ding hi i hmaithlak cio ko usih. A tei hmanh kan tei hlan ah tei hnu i covo le umdan ding kong ruah len a hau lo. Uknak ṭhalo hi kan tei hmasa a hau. Kan tei hnuah a simi paoh si te ko seh.

Kanmah le kanmah kan i doh zong a si kho, kan tei hlan nakin kan buai deuh zong a si kho. Asinain cucu a si rih lomi an si, a si khomi lawng a si. Atu i kan ton cuahmah mi le a tak in a cang cuahmah mi tu hi i hmaithlak phot ko usih. Kawl nih “A hnu i buainak cu a hnuah tuahremh ding a si (နောက်ပြသနာ နောက်မှရှင်း)” an ti bantukin kan tei hnuah a cangmi cu kan tei hnuah tuahremh ding a si ko lai.
A cang cuahmah mi hmanh kan tuahremh khawh rih lo lioah a cang rih lomi kong i kan buai ahcun zeitindah lohma a kal khawh hnga! Hmailei ca cu ruah phung, tuaktan phung a si, asinain thaizing ca na ruah tuknak ah nihin na rian tlolh ding a si lo.

BC chan lio i Latin caṭialthiam Publilius Syrus nih “Lungrualnak a umnak paoh ah teinak a um zungzal (Where there is unity there is always victory)” tiah a rak chim. American ramkhel thiamsang Thomas Paine zong nih “Milu zat ah si loin kan lungrualnak ah kan ṭhawnnak cu a um (It is not in numbers, but in unity, that our great strength lies)” tiah a chim ve.

Lungrualnak kong cu tampi chim len a hau lo, a ṭhatnak kan theih dih. A ṭhatnak kan theih cio ko caah a tak in i rual cang usih. Hmailei ah zeidah kan lawh lai ti chim khawh a si lo. A zungzal in lungrual khawh zong a si fawn lo. Asinain tutan khuapau dohthlennak ah kan lung aa rual ahcun kan miphun tuanbia aa thleng hrimhrim lai ti tu cu ka chim ngam.
Salai CP Lian
CEO, The Chin Post

Be the first to comment

Leave a Reply

Your email address will not be published.


*