American Pawl Kutchung Ah Tiktok A Um Ding Cu A Si Kho Lo Tiin Tuluk Media Pawl Nih An Langhter Cang

Tuluk (China) nih an ramchung ah Technology company pawl an chung thilri vialte fir piak dih ding in American nih TikTok company cawk an duh mi ruang ah hramhram in namneh nak an tuah mi hna ByteDance Company kong ah hin lehrulh cham nak kan tuah hrimhrim lai tiin China Daily Media nih cun nizan ah khan thawngthanh nak an tuah.

China nih Technology leiah thiamsang pakhat ansi ve bantuk in American hi vawlei cung ah Pakhat nak dirhmun ah a um i China hi nehsawh le zeirel lo bantuk in a um ding le Technology leiah zohchuk mi kan si ding hi cu kan duh lo, cu ruang ah America nih cawk ding in an timhtuah cuahmah mi Tik Tok Company kong ah dai tein kan um awk a si lo tiah an langhter hi a si.

President Trump nih US ramchung humhim nak caah i runven nak caah tiih Tik Tok Application vialte US ramchung ah phih khar dih ding in thawngthanh nak a tuah hnuah Microsoft Company nih Tik Tok i ByteDance Company cu cawk khawh nak ding ah ni 45 chung ceihhmai nak le ruah tti nak caan kan ngei tiah nizan ah khan thawngthanh nak an rak tuah ve hi a si.

Cu kong he pehtlai in ByteDance le Huawei company cung ah American cawlcangh nak le riantuan nak hi China ramchung chawlehnak le thancho nak hrawh duh nak ruang ah a si tiah The Global Times thawngzamh ah cun an langhter ve.

Cun American hi Technology lei ah an tthawng tuk i vawlei cung a uk khawh mi ruang ah hin China nih American Company vialte cung ah lehrulh nak le zuamcawh nak kan tuah khawh nak hnga fimthiam nak leiin kan thangcho cuahmah ve ko tiah zong an langhter.

Source: MIzzima

 151 total views,  1 views today

This function has been disabled for Chin 11 News.