Afghanistan ram nupawl zaang an hei fah ning hi cu, nu nih covo an ngeilo

Taliban nih a lakmi Kabul khuapi ah nu hna nih duhlonak an langhter Afghanistan ram khuapi Kabul ah nu phukhat hna nih August 17 ah duhlonak an langhter.

Taliban tupung hna nih Afghanistan khua lipi an lak hnuah “deihnak kan duh, kan ral hlun hna cu leh rulh kan cham hna lai lo, Islam hna zulhphung rikhiah mi chung in nu hna i caantha/herhbaunak cu kan upat lai” tiah a chim.

Raltha ngai in a dir mi nu hna nih Taliban pawl cu duhlo langhternak ding ah Kabul khuachung lam cung ah lamzawhnak an tuah. Anmah cu riantuan nak nawl,fim cawnnak,humhim ten minung hawi ,bu riantuannak ah um nak nawl le ramkhel lei ah tel khawhnak nawl hna cu an hal tiah Iran thawnghlat tu Masiya nih a twitter ah biachim nak he a langhter.

Afghanistan cu Taliban nih 1996 in 2001 chung tiang a lak i Islamic Sharia phung tang ah nu hna cu riantuannak nawl Taliban hna nih pek lo in an kham hna.

Nu hna nih sianginn kai nak nawl a um lo hlei ah, nu poh nih an pum za pi an hmai tiang in bukha puan cu an i aih lai cun pa pakhat a tel lawng ah innleng chuahnak nawl an ngei tiah thawngzamhnak hna nih an langhter.TCP