AA Ralkap Hna Nih Mipi Ralringnak An pek Cang Hna

Ralhrang In Chinram Ah Thil Man Olten An Zuar – Ralhrang ralkap cun Chin ramkulh sungin Hakha, Falam le Tedim khawpi pawlah thil man olten an zuar ih, an zuar hnu reilo ah mipi lamin an lei thluh ringring tin an sim.

Ralhrang ralkap cun thil man a keel hnakin 20% tlukih man loin Hakha Khawpi ah eiin phunphun an rak zuar hmaisa bik ih, mipi in reilote hnuah an lei thluh. Avei hnihnak hrang ralhrang cun Falam khawpi ah thil man olten an zuar peh ih, falam khawpi khalah an zuar hnu reilo ah mipi lamin an lei cem.

Avei thumnak hrang ralhrang cun September 14 ah Tedim khawpi ah man olten eiin phunphun an zuar peh ih, Tedim khawpi khalah leitu mipi an tam bangin reilote sungah ralhrang zuarmi an lei cem tin Tedim ih um pawl cun an sim.

Tedim ih um pakhat cun “Tufang cu nikhat pum nasaten hnatuan khal sehla sa kan lei ding asile tikal 25 lo bak kan lei thei cuang lo. Cutikah man olten thil zuartu an um cun mipi lamin an lei ding siko. Man olten an zuarnak hmun cu mipi lamin an pan ringring a si,” tin a sim.

Ralhrang ralkap cun September 10 ah Hakha khawpi ah man olten eiin phunphun an rak zuar ih, September 12 ah Falam khawpi ah an zuar peh. September 14 ah ralhrang pawl cun Tedim ah man olten eiin phunphun an zuar peh ih, Chin ramkulh sungin khawpi dang khalah zuar peh vivo an tum tin thu a suak.

Myanmar ram a buai tikah thilri man a let thum rori’n a kai ih, mipi harsa pawl mangbang vansang in an um thlang. Cutikah thil man lolten zuarnak hmun le a lakih peknak hmun tivek ah mipi an khat ringring thlang.

PDF 8 An Thi – Sagaing ramthen Kawlin myone pintar khua kiangih doawknak ah PDF 8 le khuami 2 an thi tin mipi ralkap cun thu an suah.

Kawlin PDF thuphuangtu cun “Ralhrang mipum 100 hrawng an si ih, nazi 3 sung tluk kan kap aw. Kan doawk caan a rei tikah kan ralthuam a thlau aw ih, cerek kan haidaih aw nawn lo. Cutikah ralhrang lamin thazang tamsawn’n in nor ih, pDF 8 le khuami 2 an kap that. Doawknak ahcun anmah ralhrang lam khal thi an tam tuk ve a si,” tin a sim.

Kawlin Revolution KR cun “Doawknak ah PDF 3, Pah-khah Phah 5 le khuami 2 an thi. Khuami pahnih thi lakin pakhat cu CDM tlawng saya a si. September 12 ah ralhrang thawn nasaten do aw kan si ih, kan umnak lam Internet le phone line a that lo ruangah duh vekin mipi thu kan lo than thei lo phah a si,” tin thu an suah.

AA In Mipi Ralrinnak An Pe – Rakhine ralkap AA cun Rakhine ramkulh sungah ralhrang pawl an finkhawm aw rero ih, cumi ruangah kannih AA khalin lamzin ceknak felfaiten kan nei ding tin mipi ralrinnak an pe ih, an theihter.

AA cun “Ralhrang ralkap cun tui zarh sungah nasaten Rakhine ramkulh dungih um an sakhan pawl hrang mipum, ralthuam, eiin, le thildang tul neuhneuh pawl cu leihnuai zin, tipar zin le tlunzuang zin tiangin an phur rero ih, an khawlkhawm aw. Curuangah ralhrang hmanmi lamzin pawl kan cek thlang ding.

“Bangladesh ramri ih ralhrang sakhan kan lakmi khal ralhrang pawl cun luah kirsal an tum tuk ih, ralthuampi le tlunzuang hmangin in kap rero. Rakhine ramkulh sung le Paletwa peng sungah doawknak sosang sinsin suak thei a si ih, cumi ruangah felfai zetin lamzin cek thlang ding kan si.

“Curuangah, leihnuai lamzin le tipar lamzin ih sukso vak mipi phurtu nan zaten nan suahvah ding tikah Rakhine mipi uktu hnenah thuhla simthei hmaisa ringring uhla, AA lamih cek nan ton tikah thuthlun zetin ummen uh. Kanmah AA in theihter hmaisa loin vaksuak hlah uh, kanmah theih loin nan vaksuak ih thil pakhat khat nan tong pang asile AA in mawh kan phur lo a si,” tin thu an suah.

NUG In Thailand Company Ih Dawimi Pawl An Bawm – Thailand ram Electric cetzung ih hnatuan Myanmar mi 170 pawl cu September 13 ah company neitu in a rak dawisuak hai ih, hna nei lo,fehnak ding thei loin an buai.

Cucu, NUG lamin an theih tikah Thailand ih um NUG palai Ye Min cu a hmun rori ah a feh ih, Company neitu pawl a biak hnuah dawisuakmi Myanmar mipawl cun zangnadomnak ah mi pakhat Thailand thawng 10 tlun ciar an ngah ding.

Ye Min cun “Tu ahcun an buainak kan remfel sak zo. Mi pakhat ah thawng 10 bath ciar an ngah ding. Cetzung sungah kan lut thei ih, an hotu pawl thawn kan be aw thei. Cetzung ahcun Myanmar hnatuan 2000 hrawng an umih, 270 lawng an dawisuak. An dawisuaknak san khal hna an tuan tha lo tin an sim.

“Tu ahcun hna an tuan peh theinak ding, hmundang company ih an tthawn theinak ding le Passport an renew theinak pawl kan dilsak thluh ih, cupawl khal siannak an pe thluh. Thailand cozah in hnatuan dawimi thawn pehparaw in daan thazet an nei ih, cumi hmangin kan tifel thei a si,” tin a sim.

Thailand ih Myanmar Embassy palai Wae Lin Maung cun “Hna an tuan pehsal duh asikhalle an tuanter theisal zo. Hmundang ah an tthawn duh asikhalle thawn theinak an pe. Buainak an ton tikah Thailand ih Myanmar mipawl bomtu kan theihter hngal ih, ziangkim an buaipi thluh zo a si,” tin a sim.

NUG cozah cun kan dung zarh lam khalah Thailand company ih dawisuakmi Myanmar mipum 200 hrawng khal an rak buaipi zo ih ,zangnadomnak pek thluh an si.

Russia Le China In Ukraine Thu An Rel Ding – Russia president Putin le China president Xi Jinping tei pahnih an tonawk caan ah Ukraine buainak thuhla an rel ding tin Russia lam cun thu an suah.

Russia president Putin le China President Xi Jinping tei pahnih cu Uzbekistan ram ah tongaw ding an si tin Russia lam cun thu an suah. Uzbekistan ram ih tuah dingmi Shanghai Corporation ah Putin le Xi Jinping tongaw ding an si.

China president Xi Jinping hi China in covid 19 natnak an tuar hnuah tuitum cu China ram suahsan in ramleng a tlawn veikhatnak ding a si. Shanghai Corporation cu september 15 le 16 ah an tuah dingih, Putin le Xi Jinping tei pahnih cu a hranten hmaiton ih biakawk an tum.

Ram pahnih president in ziangtin Ukraine thu an rel ding timi cu theih a si hrih lo ih, leitlun ram tamzetin Russia an hrem rero laiah China cu Russia tuanpitu ram pakhat an si.

Be the first to comment

Leave a Reply

Your email address will not be published.


*