AA Nih Paletwa Pengkulh Chung Ah Signboard Vialte Thlen Dih An Timh Cang

Chin ram thlenglei ah a um mi Paletwa pengkulh chung ah khua luhnak hau-ka i an tar mi hna signboard vialte cung i Chin State tiah rak tial mi vialte cu Rakhine State tiah thlendih an timh cang caah a tu hi rian an tuan cuahmah cang hna. Rakhine ralhrang pawl AA nih hin Paletwa hi kan lak lai i kan ram chung ah kan chiah cang lai ti hi official tein thawngthanh nak cu an tuah lo nain AA cawlcang le an thil tuah mi pawl nih hin Paletwa cu pengkulh le ram chung vialte lakdih an i timh mi a si ko ti cu fiang tein a langhter ko.

Cun Paletwa ram chung ah Rakhine miphun milu thongkul (20,000) hrawng hrambunh in khuasa mi kan um tiah an rak chim mi zong kha bia hmanhlo a si. Paletwa myoh chung ah hin Rakhin miphun hrambunh khuasa hi milu thong thum (3,000) tluk an um hna i hmundang Paletwa pengkulh chung ah a um mi hna he an dihlak in milu thong nga (5,000) hrawng lawng hi an si.

Cun Paletwa pengkulh chung ah chawleh nak ruah le leh-laang in a um kal mi hna Rakhine miphun paohpaoh hi an dihlak milu in 12,000-13,000 karlak hrawng lawng an si lai tiah an ruah domh mi hna an si. Cun Rakhine ralhrang a si mi AA nih Paletwa hi an ram chung ah ser anduh nak bik a ruang cu Kala Htan tiva kuang hrawn ah a um mi tu-hmawng vialte hna le kokek thing man fak pawl vialte hna khi hmailei Rakhine miphun nih kan tangka luhnak le kan miphum cawm kho tu a si lai tiah an ruah caah a si.

Cu ruang ah Chin ram nih kum saupi chung miphun a cawm kho tu ding le hmailei ah Chin ram thancho ter kho tu a si ding mi Kala Htan tiva kuang hrawn  kokek thing man ngai vialte hna khi humhim zia an thiam nak hnga ding hi a biapi tuk mi a si. Cu vialte cu a tu ah cun ralhrang AA kut ah phak dih ding dirhmun a si cang caah kan Chin miphun hna nih lungfim tein kan dir kamh zong a biapi ngai mi a si.

Source: Southern Chin Land

 286 total views,  2 views today

This function has been disabled for Chin 11 News.