AA Nih Paletwa Peng Chuh An Kan Timh Mi Hi Zum Loin Na Um Rih Sual Maw?

Laimi upa lungfim le CNF upa vialte zong nih Paletwa cu AA nih chuh an kan duh ti kha an hngalh dih. Zei tuah awk an hngalh lo le an ngamh lo ruangah an aukhuan awk tluk in an au lo bia a si. Nain tlawmte cu cawl an i tim pah cang ko. Nain Laimi aa fimter țung i a fim tak țung lomi nih cun an zum lo. International Boundary kan ngei an ti. UN um ko an ti. Aa seng lo tak khi a si. Paletwa Khuapi sawhsawh bak ah khin Rakhan an tam deuh ti hmanh an hngal lo. Hakha peng ah Laimi lawng te kan si bantuk in Paletwa zong khi Laimi-Chin an si dih rua an ti. AA kha aa dor taa mi sawh ah an ruah hna i, an kir nolh te lai an ti. An mah AA hmanh nih kir țhan kong an chim bal lo. kan lak lai ti lawng piangpuh in an chim.

Mirang uk chung vialte kha Paletwa cu Arakan Hill ah rak chiahmi a si. Khuate vialte zong ah Rakhan khua tam tuk a um pin ah caholh zong ah Rakhan nih influence a tuah dih mi a si. Mirang chan zong ah Chin hills a si bal lomi Kalay-kabaw hmanh kan ta kan ti ve ahcun Rakhan chinchin nih cun Paletwa kan ta an ti nak ding khi rel cawk loin a lam an ngei. Hriamnam sernak hmanh tuah an i tim cang. Micheu ve nih cun Chuh an kan duh ti cu an pom. Nain AA pawl kha Rakhan state hmunrawn ah an cawl khawh lo ruang ah a si rua an ti. A si hlei lo. AA cu Arakan ram vialte ah fek tuk in an duhnak paoh ah an cawl kho ko. Paletwa chuh hi an mission pakhat hrimhrim ah a rak i telmi a si.

Rakhine ram buainak le harnak kong ah Cathanh tampi an chuah lengmang. Nain Paletwa kha Chin state ti ah an chim bal lo. Karen Human right bu hmanh nih Rakhine ram ah Ralkap nih nuhrin covo an buar nak cathanh an chuah ve i, Kawlral kap nih Paletwa hrawng ah an lainawnnak vialte kha Arakan ah an telh dih. Chin timi hrim an chim sual lo. Hi bantuk hi voikhat hnih te lawng si loin voi rel cawk lo a si cang. Min Aung Hlaing Hakha a rat hmanh ah Chin state ahcun raltuknak a um lo a ti men. Paletwa kong ah kan aw a din tuk ti kha a fiang.

CNF upa te nih cathanh an chuahmi kha, i rinh hna hlah seh law, an thanh bantuk khan Ralkap țhawnternak cawlcang hram cang ko hna seh. Caan țha bik a si. A thar dirh a fawi bik lio caan zong a si. Lungkhat in Paletwa kong ahcun kan i fut a herh. AA nih an kan chut bal lai lo ti le an kan chuh lai timi kong zong ah i al ding um lo. Kan ram hrimhrim i, an kan nautatmi vial hmanh ah hin fak piin leh awk kan si.

Note: a tawinak te lawng ka țialmi na fian lo ahcun ka cabia dang tam deuh rel. Tangcheu hmanh nih fian awk in ka țial hna. Mifim paoh nih cun ka cabia tlangkhat tiang in an hrawm.

Credit: Siang Bawi

 254 total views,  1 views today

This function has been disabled for Chin 11 News.