AA Nih An Tleih Mi U Hlah Kyaw (Salai Isaac Khen A Pu) Cu A Ruak In An Char

AA ralkap nih an tleih mi U Hlah Kyaw a thih nak kong cu a tupa a si mi Chin ramchung Sipin vuanci hlun Salai Isaac Khen nih a facebook tuchun ah khan a rak tial.

U Hlah Kyaw a thih nak kong he pehtlai in Media pakhat khat nih Interview nak an ka tuah zong ah lehnak zeihmanh ka tuah hna lai lo tiah Salai Isaac Khen nih cun a chim. Hi kong he pehtlai in Khumi Media nih pehtlaih nak an ngeih ko nain zeihmanh chimrel mi le bia leh nak a ngei hna lo.

U Hlah Kyaw a thih nak kong he pehtlai in Salai Isaac Khen nih a chim mi cu “Kan hnu deuh thla chung ah khan khuami hna raw lei awk an ngeih ti lo ruang ah facang phir ding in an kal hna lio ah AA ralkap nih an rak tleih mi Keimah (Salai Isaac Khen) kapu cu a ruak in nizan tihni ah khan an hmuh I nizan ah khan ruakthlah thlacam nak zong an kan tuah cang tiin a chungkhar nih nihin ah thawng an ka thanh.

Zeihmanh sualnak a ngei lo mi minung pakhat nunnak a liam mi ruang ah chungkhat kan si bantuk in fak piin ka ngaih a chia. Kapu  a luat khawh nak hnga ding ah keinih zeihmanh ka tuah khawh mi a um lo ruang ah hin fakkhun in ka ngaih a chia fawn.

Keimah a ka daw mi kapu, keimah zong nih ka duhdawt mi ka pu U Hlah Kyaw na thlarau tu sertu Pahtian taangnem ah I din ko cang seh. Ral thawh nak hi dih cang ko seh. Hi kong he pehtlai in zeibantuk Media hmanh nih Interview an ka tuah zong ah zei kong hmanh ka chim lai lo” tiin Salai Isaac Khen nih cun tuchun ah a rak tial.

Source: Khumi Media 

 208 total views,  1 views today

This function has been disabled for Chin 11 News.