AA Hriamtlai Thun Myat Naing A Nupi Le Fale An Tlaihnak Kong Ah Interview An Tuah Mi

A nupi le fale an tlaihnak kong Thun Myat Naing a pasal bak uar a um kho tuk. AA hriamtlai an bawibik a simi Thun Myat Naing a nupi le fale cu Kawlram cozah duhnak in Thailand cozah nih Chiang Mai ah an tlaih hna.

Cu kong he pehtlai in Thun Myat Naing cu interview an tuah i bia tampi a chim. Cu a chimmi chung a lungput uar a umnak te hun langhter ta ka duh.

A mah nih a chimmi chung in ” Ka nupi le fale an tlaih mi hna i hringtu pa pakhat sinak cun ka thin a phang i ka lung ai nuam kho lo. Sinain ka nupi le fale lawng ka ruat lem lo. Rakhine ramkulh ah ngakchia a thimi tampi an um. An nu le an pa caah zeitluk in a fah lai. Nai ah Kawl ralkap nih ngakchia pakhat an kah i a nunnak a liam. A nu le pa caah zeitluk in a fah hnga.

Rakhine ramkulh ahhin Kawl ralkap nih sualnak ngei loin a phunphun an puh hna i an tlaih mi hna, an hremmi hna le an thah mi hna an um ko.

Hodah misual an si timi kan i fian a hau cang. Rakhine mipi nih an kan cohlan i Rakhine mipi kha hram ah i bunh in dothlennak kan tuah mi ahhin kannih cu  vawlei cung nuhrin covo upat bu tein riantuanmi kan si. Dothlennak a tuah mi kan si.

An mah Kawl ralkap bantuk in an vawlei le an hmunhma ah kal in an nupi le an fale hi kan tlai bal hna lo. Kan duh ahcun khoika hmunhma poh ah kan tlaih khawh ve ko hna. Sinain kha bantuk kha a dik lo ti kan theih ruangah kan tuah lomi a si.

Kawl ralkap nih tu bantuk in sualnak a ngei lomi an tlaih hna i an thah lengmang ko rih hna ahcun kanmah zong an vawlei ah kal in Kawl ralkap tuah ning bantuk tuah hi ready kan si ve ko. Kawl ralkap nih mahhi thil an tuah mi ruangah AA cawlcanghnak a zor lai tiah an ruah sual lai. Kan cawlcanghnak hi a pel te zong a zor hlei lai lo i kan thangzang kan chuah chinchin nak tu a si deuh lai. Cu hlan nak in buainak zong a zual chin kho.

Ka nupi le fale luatnak ding caah vawlei cung nuhrin covo phu hna le a dangdang hna he kan i zuam cuahmah ko. Thailand cozah nih hriamtlai phu kan cawlcanghnak mah bantuk in hnahnawhnak an pek hi an palh bak. Cu hlan ah Thailand cozah cu dothlennak a tuah mi tlangcung mi hna a kan kengkawi tu a si tawn.

Ka nupi le fale hi Kawl ralkap nih an sualnak a lamkip in an kawl hna. An sualnak an hmuh ti lo ruangah Black list ah an chiah hna. Kawlram cozah tawlrelnak in Thailand cozah nih an tlaih mi hna  a si tiah a chim.

 

 417 total views,  1 views today

This function has been disabled for Chin 11 News.