AA Hriamtlai Pawl Nih An Tlaih Mi Hna Chin Mi Minung 4 Hna Lakah Minung Pathum An Rak Thlah Hna

Thawngpang tha tuk a si. Ngandam tein an rak thlah hna i Paletwa khuapi chung ah hnangam tein an rak phan tiah thawngtheih a si. Aluan cia July 29 ni ah khan Chin ramchung Paletwa khuapi leiah a kal mi hna minung pali hna cu AA ralkap pawl nih an rak tlaih hna.

Cu an tlaih mi hna minung pali chung ah minung pathum hna cu tuzanlei (August 25) ah khan an rak thlah than cang hna tiah thawngtheih a si. AA ralkap nih an rak thlah than mi hna minung pathum nih an chim mi cu zeihmanh hremnak le fahnak an kan pe lo, kan dam, kan tha ko tiah an chim hi a si.

Asinain anmah lakah an tlaih chih ve mi Ko Aung Soe tu cu an rak thlah than rih lo caah lungrethei in kan um rih ko tiah harsa bawmhnak ah an hruaitu a si mi Salai Kyaw Aung nih cun a chim.

Zeiruang ahdah hi minung pali hna hi AA ralkap nih thlakhat chung an hren hna, zeidah an tuah ter hna ti mi kong theih duh ah Chin-Media nih pehtlaih an timh ko hna nain tuzan tiang ah khan cun an pehtlaih khawh rih hna lo caah zeitin dah an rak thlah than hna ning a si le an hren hna chung ah zeidah an tuah ter hna ti hi fiang tein theih khawh a si rih lo.

Thaizing leiah cun pehtlaih khawh an si theo lai tiah zumh nak zong a um i thawngpang fiang deuh le tling deuh in mipi sinah phozar than a si cawlh ko lai.

Source: CHIN-Media (Burmese-Hakha translate)

 109 total views,  1 views today

This function has been disabled for Chin 11 News.