A Tha Kho Taktak Si! 2021 Hi Laimi Kan Kum Tha A Si Hrimhrim Lai!

2021 kum hi Laimi kan kum tha a si. Zeithil poh hi kaphnih in zoh thiam a herh. Kap khat lawng in thil kan zoh chung cu zeitikhmanh kan i tinhmi kan phan kho lai lo. Tutan kan ram a buai mipi kan lung a kekkuai ngakchia in tar tiang ralkap kan hua dih.

Sinain khua vun ruah nolh tik ah zeitluk in dah tutan Kawlram buainak nih Laimi thathnemnak a chuahpi kan ti si cun. ….1) Lungrualnak a kan pek. Zeibu ti um lo. Pengtlang khua thleidannak um lo. Hmunkhat ah ral kan do ti.

2) UN ah palai kan tuan. Dr SaSa cu Kawlram aiawh tu dingah UN palai rian pek a si. Chin mi nih tuanbia thar kan tial than. 3) Ram le miphun dawtnak kan ngei deuh. Tutan thil cangmi nih a ho cio poh ram le miphun zawn ruahnak le dawtnak a kan ngeihter.

4) CNA /F le mipi pehtlaihnak a fek chin. Tutan cu tlangcung hriamtlai pawl nih anmah le miphun cio an runven hna bang in kannih zong kan ralkap CNA nih an kan ven ve caah mipi le CNA pehtlaihnak a fek deuh.

5) Ramkhel lei ah zeitluk dah kan si timi kan i fiang. Tutan ah Chin mi ramkhel ah zeitluk in dah kan san le kan niam timi a lang. Cun a ho dah or zei party dah Chin ram a daw taktak i hmailei ah a ho dah vote pek ding timi a kan fian ter.

6) Mi bawmtu kan si zia a lang. Tutan Kawlram buainak ah heh tiah Chin mi ram chung ram leng in kan cawl. Thazaang siseh phaisa chawva kan chuah cio hna. Kanmah tluk in tlangcungmi a tangmi an um lo.

7) Kawl nih an kan bochan ning a lang. Kan pa Van Thio telh in Chinmi kan pale tampi ralkap nih anmah lei tel dingin an sawm hna. Rian an khinh hna. Nain a tam deuh nih an cohlang hna lo.

8) Chunmang a kan ngeihter. Cucaah Laimi cu miphun hme kan si nain kan nauta lo. Midang mei a ummi si loin a lu ah a ummi kan si. Credit: Tlung Ceu Thang