A Tha Kho Taktak: Ralkap Uknak A Duhmi Party Hruaitu Pawl

Catialtu: Laiki Chozah 

Ralkap uknak a duhmi party hruaitu pawl. (20.7.2020)

1962 – 2015 tiang kum (53) chung nawlngeihnak 100 ah 100 cu ralkap kut ah a um. Nunchung nawlngeihnak vialte ralkap kut ah um dingin a sertermi Phunghrampi cu 2008 kum ah mipi hmaiah langhter a si i “2008 Phunghrampi” (2008 Constitution) ti a si ve.

Hi 2008 Phunghrampi ah Kuli (porter) phorhter ding a tel le tel lo cu hngalh a si lo nain 2010 August 17 tiang cu Ralkap kuli phorh a um rih tiah UN nih Satellite (cutuh) in a hmuhnak a langhter caah India le Malaysia a phanmi pawl lakah 2010 Aungust 17 hlanah Kawlram in a chuak cangmi lawng ralzam taktak an si tiah biaphuannak (statement) a tuah. Kawlram ah a hnubik ralkap kuli phorhnak cu 2010 August 17 a si timi philh cio lo ding.

2008 Constitution hi ralkap uknak nikhua sauternak le himnak caah sermi phunghrampi a si caah a rawkral lo nakhnga biakamnak he nunchung dirkamtu le zohkhentu dingah minung tampi an chiah hna. Cu dirkamtu le kilvengtu pawl ah tlangcungmi zong an um ve.

2015 rampi thimnak ah NLD nih teinak a hmuh cangka in a aupimi bia cu “2008 constitution hi kan remh lai” ti a si. Remh khawh a si lai, remh zong a fawi ko rua tiah an ruat cio. Vawleicung ram fim pawl zong remh khawh dingin an ruat cio ve.

Remh dingin NLD nih hmalaknak a ngei taktak tikah cun remh a har ning an lung a fiang. Vawlei-
cung ah remh a har bikmi Phunghrampi a si tiah vawleicung mifim pawl zong an hngalh ve nain NLD caah biapibik pakhat a si caah 2019 ah remh hram an thawk. Ralkap 25% ruangah zeihmanh tlam a tling kho lo. Chim duhnak cu ralkap bawi pawl himnak le nawlngeihnak caah sermi 2008 phunghrampi a si caah zeitik hmanh ah hrawk ding le remh ding cu ralkap timhnak a si lo timi minung vialte hngalh dih ding a si.

Democracy timi cu mipi duh ningin hruainak ti a si nain 2008 phunghrampi ruangah ralkap duh ningin hruainak tangah um lengmang ding a si cang. Hluttaw ah ralkap nih 25% a tel chung cu ralkap bawi pawl duh ningin kalpi zungzal ding a si caah mipi duh ningin hruaimi ram kan duh ahcun hi hluttaw ah ralkap 25% hi a tel ti lo dingah mipi dihlak pum khat ah dir in cawlcang a herh.

2015 thimnak ah miphun party tampi a um ko nain ralkap uknak in luatnak hmuh a herh ning le miphun party tanh zongah san a tlai lai lo tiah a hngalhmi vialte Democracy a duhmi le a duh ningin a kalpi kho dingmi NLD an tanh dih caah NLD cozah nih kum (5) chung a kan kalpi i thil țha tampi a kan tuahpiak nain ralkap kut in luatnak lam cu a hmuh kho rih lo. Term (2)nak a kai than tikah lam dang a kawl than ding a si.

Ralkap uknak kan duh lo, kan ramchung ah daihnak kan duh, tiah cu e, kha e, tiah an aukhuang ciammam I NLD cozah a kai hmasa lioah zei bia hmanh kan thei lo. Kum (1,2) hrawng a vun kal hnuah NLD cozah kut ah hmuh ding le tong ding a um lomi an hngalh tikah NLD cu a tha lo, Daw Su nih tlangcungmi caah zeihmanh tuahpiak a timh lo, federal state a kan pek duh lo tiin miphun party tanh cio dingah an cawlcang than. Kan ram daihnak le Federal hi Daw Su kut ah a um lo, 2008 phunghrampi a kilvengtu ralkap kut ah a um timi hngalh lo ruang maw a si, hngalh buin a chimtermi maw an si hnga!

Atu cu nunchung a rawkral lo nakhnga nunnak thap in zohkhentu le dirkamtu ralkap party ‘USDP’ panh in party tampi (30) hrawng cu USDP he komhnak an ngei cang. NLD nih cozah a kai kho lai lo, kannih pawl komh in cozah kan ser lai tiah ton biaruahnak a ngei tawnmi party pawl ah CNLD zong a tel ve. USDP upa cheukhat nih kannih USDP lawng nih 2008 phunghrampi kan remh khawh tiah mipi an hlennak hi maw an zumh tuk hnga! Democracy duh taktak loin mah le chungkhat thatnak caah mipi a hlenmi maw kan si ko hnga! A poi hringhran ko. Zumhtu pakhat si ve I “Miphun party nih teinak kan hmuh ahcun State Cozah kan si lai” timi bia tehna chim ngam cu aw!

Kan chimmi bia hi mipi nih cuaithlainak an tuah lengmang ko. Result a chuak tikah hmaikhah lonak a um khomi thil a si. Nunchung rawkral loin ralkap nih kan ram uk peng dingin sermi “2008 Constitution”
Kilvengtu le Dirkamtu USDP he a komhmi party vialte cu mipi duh ningin ram hruainak a duh lomi ralkap kut tangah um zungzal a duhmi party hruaitu pawl an si.

 299 total views,  1 views today

This function has been disabled for Chin 11 News.