SAC Ralkap Nih Thantlang Khuachung Ah Jet Fighter In Bomb A Thlak
Tuzan suimilam 9:30PM hrawng ah SAC Ralkap nih Thantlang khuachung ah Jet Fighter hmang in bomb voi khat a thlak i a kir ṭhan tiah kan theih.
Caan zeimawzat a rauh hnu ah SAC Ralkap Jet Fighter cu hung kir ṭhan in Thantlang peng hmun pakhat va hel in a kir lei suimilam 11:4PM hrawng ah Thantlang khuachung ṭhiamṭhiam ah bomb 2 a thlak ṭhan tiah theih a si.Crd.. TCP
Relchap>>>>>>Uknak Lak Le CDM (Part 1)
====================
Dawr hngah in ka ṭhut lioah pa pakhat cu khengkuar i put pah khin kanmah lei ah a van ra cuahmah, naih deuh khin dawr kutka kam tiang a van ra. Aw…. zeidah khengkuar i put pah cun kan dawr ah a rat hnga ti khi ka ruat.
Cu tlawmpal ah cun Arkio (ကြက်ကင်) ka bawm ve uh tiah a kan ti (a holh ka theih hlan ah cun Mizo mi ah ka rel), aw.. kanmah lei mi pei a si ko hi tiah ka lungchung tein ka chamele ti. Ka nau he kan i zoh i, um rih ko sehlaw voidang ah mu kan ti. Ka bawm ve ko uh, mah le mah dakaw kan si hna hi a van ti ṭhan, cu tlawmpal cun aw si le pakhat tein kan in bawmh ve lai mu ka ti i a zuarmi Arkio lak ding in a pawngah ka fuh. Arkio cu ka lak khawh in kai lawm tuk mu a kan ti i a ratnak lam lei ah a kir ṭhan.
Aw! cu pa cu ka hmuh bal mi a lo tuk ti khi ka ruat. A kal hnu ah cun khua zaza ka ruat, khoika ah dah ka hmuh bal aw..ka ti, khoika ah dik ka hmuh bal ko, ka theih tuk mi a lo ko tiin sau ngai kaa ruah hnuah fiang tuk in ka van hngak than.
Aw… zeiti ṭha kan ram cu pei SAC nih hramhram in uknak a lak fam cu, a rak umnak (……..) ah a mah tawk tein nuam tuk in khuasa mi le cozah rianṭuan mi a rak si ve ko nain atu ah cun mi khualkhua ah ningzah ruat loin Arkio a zuar ai cang. Nupi le fa chungkhar zohkhenhnak ding caah tiin mi khualkhua ah ralhrial dirhmun in a ṭhu sawhsawh lo mu..
Mifanau pa a chuahsemnak khua ah khan cun bochanmi a rak si pin ah nun nuam ngai in khuasa a rak si ko mu, a tu ah cun….
Aw… si lo ka khuaruah a pial sual lai ti khin lungcan kaa vun i pe ṭhan nain, cu pa kong thotho cu ka lung ah a chuak ṭhan. Upat awk a tlak tuk, nun nuam ngai in thlatin thlahlawh a hmuhnak le chungkhar an pawcawmnak rian cu pei ram le miphun caah an pek ve cu, a umnak hmun ah a dingmi lam zulh in phaisa a kawlmi ka hmuh tikah ka upat tuk, ka hnarno a ka ṭam i coka lei ah ka kal…..
CDM a tuahtu hna hi an umnak cio ah mi pek chom le mi pek ding bawh in an ṭhu dir hrimhrim lo, an si khawhtawk pawcawmnak caah rian an ṭuan ko.
Ralhrang nih hramhram uknak a lak ruangah an duh lo mi uknak cu dohkalh in CDM a tuahmi hna hi fak ngai in thinlung hma a tuarmi an si, an pumcawmnak rian le an dirhmun (rank) sangsang kaltak in ralhrang a dohtu an si ve caah, kan pawngkam ummi CDM hna hi upatnak he kan chawnh piak hna a herh ko.
Note: Ramri hmunkhat ah a tak in ka hmuhtonmi
By. Anna Par (Journalist of The Chin Post)
Leave a Reply